L’asturianu va tar representáu en París na xunta de la ONG ELEN de defensa de los idiomes minoritarios
Payares 21, 2013 por Pablo R. Guardado
Xosé B. Álvarez, representante de Rellaciones Internacionales d’Iniciativa pol Asturianu, va tar presente’l sábadu en París pa participar na xunta xeneral d’ELEN. Esta ONG de carauter européu trabaya pa defender les llingües minoritaries.
European Language Equality Network (ELEN) ye’l nome d’esta organización ensin ánimu d’arriquecimientu perteneciente al Conseyu d’Europa y con sede en Breizh. Fundada en Strasbourg nel 2011 pa reemplazar l’European Bureau for Lesser Used Languages, representa a 42 llingües de 23 estaos europeos, ente ellos l’asturianu gracies a qu’Iniciativa pol Asturianu ye miembru del coleutivu, y tien como fin defender los derechos de los idiomes minoritarios y trabayar pola so revitalización.
Nesta primer xunta xeneral añal d’ELEN va esponese la situación sociollingüística na que s'atopen toles llingües representaes na ONG y van desendolcase les llinies a siguir pal añu 2014, amás d'abrir grupos de trabayu nuevos colos que dotar de mayor capacidá d'aición a la organización naquellos casos que seyan d’urxencia mayor. Nel conceyu, Álvarez va aprovechar tamién “aprovechará esta ocasión pa reforciar les rellaciones con otres organizaciones europées que trabayen pola proteición y promoción d'otres llingües minoritaries y afondará na necesidá de xunir fuercies a la hora de demandar a tolos gobiernos compromisos específicos pa coles llingües en mayor peligru”.
Hai que destacar qu’esta cita ye la segunda a nivel européu na que participa Iniciativa pol Asturianu, que’l 16 d’ochobre tuvo presente nel Parllamentu Européu p’asistir a la conferencia ‘Radiodifusión en llingües minoritaries: ónde tamos, ónde debíemos dir’.
Fonte: Asturies.com
Bona noticia.
ResponderEliminar