La XDLA va facer campaña pa que se cumpla la toponimia

La XDLA comprométese a esplorar les víes alministratives y xudiciales pa que la llegalidá se cumpla. La Xunta pola Defensa de la Llingua Asturiana (XDLA) denuncia'l parón nel procesu d'oficialización de los topónimos tradicionales y la falta d'usu que tien per parte de l'Alministración asturiana la toponimia tradicional que se foi oficializando. Espliquen qu'ente 2005 al 2010 aprobándose la toponimia oficial de mediu centenar de conceyos, a razón d’unos ocho conceyos cada añu, anque nel 2011 namás s’aprobare ún. "La llegada del Gobiernu de Foro nun ameyoró esi númberu, porque nel añu que gobernaron namás s’aprobó otru conceyu más. Pero la cosa nun foi a meyor col Gobiernu de Javier Fernández. Nesti añu y mediu, nun hubo más aprobaciones, cuando se sabe de casos como Santu Adrianu que pasaron per toles fases alministratives y lleven aguardando años a que s’oficialice la toponimia en Conseyu de Gobiernu". Y añeden qu'otros conceyos tienen en marcha’l procesu dende hai años. La organización llamenta especialmente la falta de compromisu cola toponimia, que nun la emplega l'Executivu: "La llegalidá toponímica ye papel moyao". Critiquen la falta d'usu na páxina web del Gobiernu asturianu y na RTPA. Tamién que'l Serviciu de Política Llingüística nun use lo qu’ella mesma promueve al traviés de la Xunta Asesora de Toponimia. La XDLA comprométese a esplorar les víes alministratives y xudiciales pa que la llegalidá se cumpla. "Vamos empezar una campaña de reclamaciones a l’Alministración asturiana denunciando l’incumplimientu sistemáticu de los decretos d’oficialización toponímica". Fonte: Quéyeho!