La XDLA denuncia la persecución al asturianu en Mieres

La Xunta Pola Defensa de la Llingua Asturiana refugó dafechu esti vienres la escusa dada pola Policía Llocal de Mieres, de nun entender asturianu, pa poner multes d'aparcamientu a persones que llevaben el permisu d'estacionamientu de la Casa la Cultura del Conceyu escritu n'asturianu. "Naide con dos deos de frente pue pensar" que se trate d'esi problema, señala la organización, que barrunta que lo que pasa ye que la Policía Llocal nun aceuta la llingua. Con un comunicáu nestos términos, la Xunta criticó duramente l'actitú de la Policía Llocal, asina como la del Gobiernu municipal, d'Izquierda Xunida, al tomar la decisión de retirar los permisos redactaos n'asturianu pa solucionar el problema. A xuiciu de la Xunta, trátase d'un "espectáculu llamentable que tán dando, primero la Policia Llocal, al multar a ciudadanos por nun dar por válidu un permisu d'aparcamientu pa la Casa de Cultura redactáu n'asturianu, y dempués del Conceyu de Mieres al decidir solucionalo quitando l'asturianu d'eses autorizaciones". El problema, pa esti coleutivu, ye que "servidores públicos niéguense a aceutar como normal la llingua qu'usa la población de Mieres a la que sirven". "Cola escusa de que l'asturianu nun ye oficial, ponen per delantre esos argumentos llegalistes antes que ser tolerantes y tener bona voluntá. ¿Nun entienden l'autorización o nun la quieren entender? ¿Son illegales agora tolos ciudadanos de Mieres y van quedar nuna situación d'inseguranza y desprotección xurídica? ¿Multarán a los ciudadanos que falen cola policía local por nun los entender?", llamenta la Xunta. CRÍTICA A IX POR "DOBLAR" La XDLA denuncia "los niveles d'intolerancia llingüística que tenemos que sufrir n'Asturies, y lo que ye tovía más intolerable ye ver cómo un gobiernu municipal democráticu, encabezáu por un partíu que defende la oficialidá y los drechos plenos pa los falantes d'asturianu, dobla de manera tan vergoñosa cuando daquién acusa d'illegal l'usu del nuesu idioma". "Lo que tien tola traza de ser un problema personal col responsable de la Casa de Cultura de Mieres tán amazcarándolo con lleis y reglamentos, y el resultáu ye que l'usu normal de la llingua asturiana nun permisu d'aparcamientu acaba eliminándose por orde del señor alcalde", añade la nota. La Xunta "esixe la intervención inmediata de los responsables pa reestablecer la normalidá nesti absurdu y frenar l'alarma social xenerada énte la indefensión en gran parte de la población que se sabe custodiada por unes "fuerces de seguridá" que nun los entienden o nun los quieren entender, y por un equipu de gobiernu que lo almite y que, coles sos decisiones, apóyalo". Fonte: Asturnews