La XDLA pide "asturianizar" la RTPA

La RTPA nel papel del procesu de normalización llingüística    La organización solicita al Gobiernu, partíos y demás entidaes sociales que defendan el papel del mediu nel procesu de normalización llingüística.    El Conseyu de Gobiernu va aprobar esta selmana la segunda llei de reforma del sector públicu, que va centrase na reorganización de la Radio Televisión del Principáu d’Asturies (RTPA) p'axustala a la llei audiovisual nueva y a los criterios d’austeridá. La Xunta pola Defensa de la Llingua Asturiana (XDLA) recuerda que la llei actual señala ente los sos oxetivos la promoción de la cultura y la educación, “con especial protección del bable, mediante la promoción del so usu y espardimientu nos medios de comunicación social”. La programación n'asturianu supón un 5% de la emisión na TPA y un 2% en RPA, mentes que l'asturianu nun tien presencia na web corporativa. "La reforma de la llei de RTPA tien que valir pa recoyer esplicitamente la necesidá de que la televisión y la radio autonómica xueguen un papel fundamental nel procesu de normalización social del idioma".    Llamenten qu'hai díes de la selmana nos que nun hai programación n’asturianu y muéstrense preocupaos pola "grave ausencia" de programación infantil y noticies n'asturianu. La XDLApide al Gobiernu d’Asturies, a los partíos con representación parllamentaria y a toles entidaes comprometíes col idioma que defendan que la llei nueva dexe claru’l papel del mediu na promoción del idioma y de la cultura asturiana, dalgo que tien que valir pa que se produza una asturianización, en tolos sentíos, de les emisiones. Proponen la creación d'un Conseyu Llingüísticu —con presencia de l’ALLA, Universidá,Dirección Xeneral de Política Llingüística y profesionales— encargáu de velar poles emisiones atendiendo a criterios de gradualidá y discriminación positiva, amás de calidá nes emisiones y normalidá con norma nel usu del idioma, teniendo tamién en cuenta la utilización del gallego-asturianu y el respetu a la toponimia oficial. Piden que RPA y una de les dos canales coles que cunta TPA -A7 y A8- emitan dafechu n’asturianu. Pegollu del autogobiernu    TPA rexistró n'ochobre un 4,7% de cuota de pantalla, lo que supunxo una cayida de 7 décimes respectu a un mes antes y el peor datu nesti mes de la so historia. A7 foi la cuarta autonómica menos vista: namás superó a Telemadrid (3,9%), Nou (3,8%) y Castilla-La Mancha Televisión (4,1%). "Ye fundamental que los asturianos vean a los medios públicos como un serviciu que forma parte de la so identidá y como un pegollu fundamental del so autogobiernu, dalgo fundamental p’asegurar el futuru de la cadena y la so aceptación social. Nun queremos qu'a RTPA-y pueda pasar lo qu'a la Radiotelevisión Valenciana".    Fonte: Qué ye ho!com