10/11/13

Cellebrada la concentración pola oficialidá de la llingua asturiana en Mieres


Cellebrada la concentración pola oficialidá de la llingua asturiana en Mieres  La protesta entamada por Conceyu Abiertu por Mieres axuntó a varies decenes de persones énte l'Ayuntamientu Mieres.


   
   Esti sábadu dende les 13:00 la Casa Conceyu de Mieres acoyó la concentración entamada pola pataforma municipalista Conceyu Abiertu, qu'axuntó a decenes de persones pa denunciar la represión llingüística exercía nel conceyu pola Policía Llocal, que según denunciaron dende CA "viola los drechos de les persones asturfalantes con total impunidá". El  baberu de la concentración cuntaba col llema de la mesma, "L'asturianu llingua oficial", nesta reivindicación polos drechos de los asturfalantes.

    Amás, tal como desplica Conceyu Abiertu por Mieres, "les persones concentraes dixirímonos depués a la cercana sede de la Policía Llocal pa siguir cola protesta. Ellí una compañera de Conceyu Abiertu por Mieres intervino pa denunciar la vergoñosa situación xenerada y l'actitú oportunista, compliz ya hipócrita del gobiernu de Mieres, gobernáu por IU-LV. Na intervención tresmitió que l'únicu garante pa que se respeten los drechos de los asturfalantes ye la declaración d'oficialidá de la llingua propia n'Asturies y el Conceyu de Mieres".

  Amás, la plataforma conceyil afitó que "valoramos positivamente la rempuesta xenerada y nuevamente pidimos la oficialidá de la llingua propia. Pa finar, insistimos en qu'IU, tanto nel nuesu conceyu como nel país, nun ye opción valible y seria pa algamar los nuesos drechos llingüísticos, como nun lo son les fuercies polítiques sucursalistes qu'hai na Xunta Xeneral"
Fonte:   Infoasturies.com

4 comentarios:

  1. Maminina, qué pena da. Decenes de persones, diz. Bueno, sí, dos decenes de persones, contaes colos deos y coles dees.

    ResponderEliminar
  2. Perbién fechu y bien dignu d'aplausu pero asistió poca xente pal mio gustu.

    ResponderEliminar
  3. Si nun hai sofitu de la xente nun hai na que faer, vese qu'en Mieres del Camín la inmensa mayoría pasa olímpicamente de la tema, asina vamos perbién...

    ResponderEliminar
  4. Hi estic d'acord. Organitzar una protesta i que hi vagin "varies decenes de persones" és contraproduent.

    Si no es pot mobilitzar la gent, cal posar-hi imaginació i plantejar altra mena de protestes.

    I, sobretot, organitzar campanyes de sensibilització. Que tothom sàpiga què està passant amb la seva llengua.

    ResponderEliminar

Los comentarios tán pendientes de moderación. Espublizaránse lo primero dable.