29/10/10

Remocique de Llingua Blog [hestoria de la bloguesfera]



Llingua blog ye la primer páxina tipu blogue que axuntó les rss de dellos blogues n'asturianu pa poder ver les sos actualizaciones cada vegada qu'espublizaben daqué nuevo.
Allá en setiembre de 2007 espublizábamos en TrayasgayA l'entamu d'esta páxina de sindicación de blogues. Nesi tiempu namás había un llistáu de nomes de blogues n'asturianu nomáu Directoriu LogAstur, que anguaño nun ta operativu. Foi entonces cuando conocimos lo que yeren los rss na Escuela de Seronda que se cellebró en Xixón, los díes 28, 29 y 30 d'abril de 2007. Esa foi la primer vegada que delles persones que facíen blogues en lligua asturiana se xuntaben pa falar d'ello y pa sentir falar a otra xente llegaos de dellos puntos del estáu. Nuna d'eses charres esplicóse lo que yeren los rss y teniendo en cuenta que inda nun había ná nesi tema, aplicao a la nuesa bloguesfera, entamamos a caciplar con ello.
El resultáu foi Llingua blog una páxina que n'aquella época cubría un vacíu na nuesa bloguesfera. Fízose coles ferramientes que ufiertaba blogger y ensin tener munchos conocimientos. El principal fallu que tenía yera claru, les entraes más recientes nun se poníen na parte d'arriba y había que buscar les actualizaciones polos nomes de los blogues en llugar de polos posts más recientes. Nun tardaron muncho en salir otres páxines de sindicación de blogues, feches con más medios, conocimientos y meyor resultáu. Al esistir estes páxines con muncha más visualización, decidimos dexar Llingua blog como yera nun entamu, a mou de documentu gráficu de lo que foi la prehestoria de la nuesa bloguesfera, calteniendo los sos fallos y asina foi demientres dellos años.
Pero aprovechando les nueves ferramientes que blogger nos pon al algame la mano, copiando delles de les ferramientes que facíen de wordpress el sitiu más completu (al nuesu entender) pa entamar un blogue, remocicamos Llingua blog, iguando dellos de los fallos del entamu y meyorando la visualización de les últimes entraes de los blogues que tenemos sindicaos al apaecer na parte d'arriba l'actualización más nueva. Sicasí, na parte d'abaxo siguimos calteniendo la versión orixinal de Llingua blog.

Fonte: Blogue Trayasgaya

3 comentarios:

  1. Ya hai mas de doscientos blogues nasturlleones lo que ye tou un esitu.

    ResponderEliminar
  2. Sí ye un éxitu y va a más, agora solo falta que Areces proclame la oficialidá de la llingua, ¿dixe Areces? oh non, horror y terror ¡vade retro!

    ResponderEliminar
  3. Qué agoreru yes compañeru, Areces tá deseyando la oficialidá pero aguántasela con estoicismu y voluntá, non ves que'l pesoe col apoyu de los sos amiguinos nel chiringuitu (tán toos percontentos ya impórteles un comín la fala asturiana y la xente) tien munchu tesón escontra l'asturianu tras munchos años de llucha del pueblu pola oficialidá?

    ResponderEliminar

Los comentarios tán pendientes de moderación. Espublizaránse lo primero dable.