10/5/09

Ñaz l'Instituto de las Lenguas de la Península (ILPI)


L’Instituto de las Lenguas de la Península (ILPI) que tendrá la so primer sede en Benasque (Uesca) nagua por contribuyir a l’aceutación social de la pluralidá llingüística n’España. Nel so aniciu, formen parte del núcleu impulsor del proyeutu una docena d’sociollingüistes de les Universidaes d’Alcalá, Barcelona, A Coruña, Girona, País Vascu, Santiago, Valencia y Centro Superior de Investigaciones Científicas. Tamién va cuntase col sofitu d’escritores billingües y especialistes d’otros estaos. L’ILPI promoverá cursos de formación nes llingües de la Península, congresos y espublizaciones empobinaos a facer normal ente la sociedá española la convivencia harmónica de les sos llingües.

Afiten los impulsores del Instituto que la mayoría los países del mundiu son plurillingües y la esistencia de varies llingües nel so territoriu constitúi una riqueza, non un llastre.Poro, plantegaron que ye posible que la sida de les dificultaes españoles s’alcuentre nes especiales carauterístiques del so plurillingüismu.Los casos más frecuentes son, o bien el d’una llingua nacional que coesiste con modalidaes llingüístiques mui minoritaries y desprestixaes, o bien de varies llingües nacionales que se falen de forma esclusiva nos sos respeutivos territorios.El casu español nun s’axusta a dengún d’esos modelos. Per una parte, el castellanu se fala y s’entiende nel conxuntu del Estáu y non solo nos territorios onde ye llingua materna; per otra, más del 40% de la población vive en territorios billingües, de mou que’l plurillingüismu español ye d’una magnitú infrecuente n’Europa. L'ILPI ñaz con una voluntá conciliadora. Nun quier promover estudios nin dar normes rellatives a cada llingua d’España en particular, nin tampoco se propón orientar les polítiques llingüístiques. Concíbese como un muérganu de fomentu d’aceutación social del plurillingüismu n’España. Esperamos que’l casu asturianu forme parte d’esti entamu.

3 comentarios:

  1. ¿por qué non un Institutu de Llingües del Arcu Atlánticu? Yá ta bien de tanta península "ibérica" los asturianos nunca fuimos íberos y amás estos iéricos pasen de nós los asturianos.

    ResponderEliminar
  2. Los ibéricos que se preocupen polo ibérico y nos dexen en paz a los asturianos, que somos astur-celtes y non ibéros.

    ResponderEliminar
  3. Pero ¿non tamos n'a península ibérica? ¿o ye que tamos dientro del paísi bretón o vivimos en Escocia? non entiendo a "anónimo", creo de vive en un planeta extrañu o en un país que'l restu de los asturianos non conocemos. Hay que tener los piesi n'el suelo hom... y non desvariar.

    ResponderEliminar

Los comentarios tán pendientes de moderación. Espublizaránse lo primero dable.