“Tenemos una década p’aplicar les demandes y correxir los puntos febles que manifiesta esti estudiu sociollingüísticu”, apuntó González Riaño

• . Los asturianos siguen apostando mayoritariamente pola oficialidá del asturianu

Xosé Antón González Rianño, presidente de l'ALLA

 El presidente de l’ALLA, Xosé Antón González Riaño, afala al Gobiernu a que conoza los datos del III Estudiu Sociollingüísticu d’Asturies y qu’aplique polítiques llingüístiques en función de los mesmos. Sitúa’l plazu pa desendolcales en diez años.

 “Los datos d’esti III Estudiu Sociollingüísticu d’Asturies son aplicables pa facer una verdadera política llingüística. Lo que quieren los asturianos en rellación cola política llingüística recuéyese y resúmese xustamente nesti avance de resultaos. Dende l’Academia de la Llingua Asturiana lo que correspuende facer ye encamentar al Gobiernu del Principáu d’Asturies que conoza los datos  y qu’aplique polítiques llingüístiques en función de los datos d’esti estudiu, que va tener una vixencia posiblemente d’una década. Tenemos una década p’aplicar les demandes y correxir los puntos febles que manifiesta esti estudiu sociollingüísticu”, aseguró González Riaño.

 Mentes, el so autor, Francisco José Llera Ramo, al ser entrugáu pola postura de la popular Mercedes Fernández, que venceya la llingua asturiana y el Plan Pilotu esperimental de Promoción del Usu del Asturianu col nacionalismu radical, respondió que, “falando en plan taberna, ye una patochada. ¿N’Asturies hai un problema de nacionalismu seriu, que plantegue una ruptura del escenariu políticu? Pa nada. Ye una posición política, un argumentu mui fráxil y un racionamientu mui probe ente una midida bastante moderada, nada agresiva, porque nun hai obligatoriedá nenguna”. D’igual forma aseguró que “ye un error venceyar la llingua con una batalla ideolóxica”.                                          Fonte: asturies.com