En Bimenes vienen de cellebrar la so vixésima primera Fiesta de la Oficialidá, siendo plenamente coscientes de que, si bien ye cierto que tienen abondo de lo que tar arguyosos, entá queda muncho por trabayar nel ámbetu la normalización llingüística. Poro, nel actu istitucional previu a la folixa, aprebaron les ordenances municipales d’usu del asturianu, que tendrán de guiar los pasos de los yerbatos a la hora de concretar en fechos la oficialidá, sabiendo qu’esta ye’l primer pasu imprescindible, que non el caberu, pa caltener viva la llingua nacional.
La que foi considerada por votación popular la Meyor Noticia l’Añu 2.016 nun tuvo l’ecu que cabría esperar d’un fechu tan relevante. Seique’n dalgunos conceyos -Mieres y Llaviana- se dio rempuesta a la presión ciudadana a traviés d’unes Ordenances d’usu asemeyaes a les de Bimenes, son asgaya los que siguen pendientes de facer esti trabayu, ya’l pasu definitivu de declarar la oficialidá nun abulta cercanu nin siquiera nos teóricamente favoratibles a la llingua.
Los diez conceyos nos que tienen poder de gobiernu los partíos que se posicionen a favor de la oficialidá incluin al 70% de la población asturiana, polo que una aición decidía pola so parte implicaría pocu menos que la oficialidá pa la gran mayoría de los asturianos. Mieres y Llaviana dieron un pasu alantre, seique non completu, pero sigue ensin tratase el tema con seriedá nos conceyos de Castrillón, Grau, Illas, Llangréu, Riosa, Teberga, Uviéu y Xixón.
Dende Andecha Astur valoren perpositivamente l’actitú del conceyu “l’actitú del Ayuntamientu Bimenes, declarando la oficialidá del asturianu y calteniéndola pesia les presiones y represiones, costitúi un exemplu de coherencia y una referencia obligada cara a avanzar pasu ente pasu na reconocencia de los drechos llingüísticos del Pueblu Asturianu” y anima a Podemos y a IU a “francer cola so cola so política de “xestos ensin fechos” siguiendo los pasos de Bimentes ya enfrentando’l modelu de represión llingüística calteníu por PP y PSOE col silenciu compliz de Foro y C’s .
Arriendes del actu institucional, la folixa de la Oficialidá cellebró’l so ya tradicional hermanamientu con Miranda do Douro, conceyu hermán nel que’l mirandés, llingua fia del asturianu, ye oficial, inagurando un monolitu col llema La nuesa alma ye la nuesa tierra. Darréu entamó la xinta popular y la xornada de folixa propiamente dicha, con xuegos pa la reciella, música, danza, concursu d’echaores de sidre ya’l conciertu d’Anabel Santiago comu preslle de esta cita ineludible pa quien se llame defensor del asturianu. Fonte: infoasturies.com
No hay comentarios:
Publicar un comentario
Los comentarios tán pendientes de moderación. Espublizaránse lo primero dable.