5/7/17

El Mercantil impide rexistrar los estatutos d’una empresa n’asturianu


 Cuatro Gotes Producciones nun pudo rexistar los estatutos de la empresa por tar redautaos en llingua asturiana, según denuncia Iniciativa pol Asturianu. El Rexistru Mercantil obligó a esta sociedá a presentar una copia de los mesmos en castellanu.
 “Pese a que la notaría onde se roblaron los estatutos nun tenía nengún problema en faelo n'asturianu, informando al Rexistru Mercantil, según espliquen dende la empresa, esta institución obligó a presentar la documentación cola so versión en castellanu, lo que supón una clara restricción de drechos llingüísticos pa unos ciudadanos que quieren faer la so actividá profesional usando la so llingua propia y oficial de la empresa”, espliquen dende Iniciativa pol Asturianu, que recuerda que dicha productora sí podría presentalos en catalán, eusquera o gallegu ensin nengún problema, “pero nun pudo entregalos na llingua propia del territoriu onde se crea”. D’igual forma señalen qu’hai precedentes d’otres firmes que sí pudieron facelo nel pasáu, polo que califiquen esti casu “d’un importante pasu atrás”.
 El coleutivu que trabaya pola normalización del idioma en tolos sos ámbitos destaca la importancia del campu empresarial pa esi fin y critica que “les iniciatives que busquen promover l'usu del asturianu nun atopen más que problemes, mesmo cuando se quier etiquetar un productu n'asturianu –como yá se vio nel pasáu con delles empreses a les que'l propiu Gobiernu d'Asturies-yos punxo problemes– o cuando se faen xestiones cola alministración usando l'asturianu –como-y ocurrió a la cooperativa El Nocéu cola Seguridá Social–”.
 “La falta d'oficialidá xenera numberosos problemes que-yos impiden usar l'asturianu con normalidá en tolos ámbitos a les empreses qu'usen l'asturianu. Por ello ye un bon momentu pa recordar que pese a qu'estes discriminaciones podríen evitase inclusive ensin oficialidá y acordies cola llexislación vixente, la única forma de da-y normalidá al usu del asturianu en tolos ámbitos ye faciéndolu oficial”, sentencia Iniciativa pol Asturianu.       Fonte: asturies.com

1 comentario:

  1. Prou que va costar aconseguir poder usar als Registres les llengües cooficials (no va ser fins als 2000, parlo de memòria), sense ser cooficial encara ho teniu pitjor.

    De fet us tracten com a qualsevol que vulgui registrar una societat en farsi. Teniu els mateixos drets.

    ResponderEliminar

Los comentarios tán pendientes de moderación. Espublizaránse lo primero dable.