La revista Estoyu de Trabe espubliza’l so númberu dos, con reportaxes, artículos, crítiques y entrevistes alrodiu los llibros asturianos espublizaos nos meses últimos. Amás, la revista inclúi fragmentos d’obres na so sección “Pa facer boca”, onde apaecen cachos d’“El extraño viaje”, d’Ovidio Parades, y el poemariu “Lo peor del bon tiempu”, d’Héctor Pérez Iglesias.
Ente los conteníos atopamos a Pablo X. Suárez, que fala de «La novela asturiana y yo», Iván Cuevas col artículu «El tiempu de les posibilidaes», Miguel Rodríguez Monteavaro, que trata’l tema «A lliteratura nova en galego-asturiano», y la presidenta del Gremiu d’Editores d’Asturies, que fai una reflexón sobre lo que pue suponer la llegada del llibru dixital, lo mesmo que l’escritor Ovidio Parades.
Les entrevistes d’Estoyu 2 tán dedicaes a David Artime Coto, autor de la novela La bufanda, una de les obres n’asturianu que más sonadía algamó nos últimos tiempos; tamién conversen con Silvia Cosío, responsable de Suburbia Ediciones.
Fonte: Asturnews
Llarga vida pala revista n'asturianu Estoyu pa que-y dé munchu tiempu a espublicitar novela y tamién poesía d'autores con méritu y d'otros que busquen espaciu pa dase a conocer que too ye bueno. Alcuérdome de munches que revistes, como por exemplu El canciu'l cuélebre dirixía pol entós perxoven poeta Xuan Porta, que fai unos años en tiempos difíciles pala lliteratura y pa publicar ficieron dellos esfuercios llogrando allumbrar ocho o nueve y númberos abriendo'l camín y sentando ansí delles bases llingüístiques pa los que fueron llegando dempués. Ánimu y llarga vida pa Estoyu.
ResponderEliminar