Cinecuentu n'asturianu nel Educa Niemeyer esti domingu

Los actos qu'entamen esti sábadu 2 de mayu de la Selmana de Les Lletres Asturianes y que van siguir demientres tola selmana, van tener un actu más el domingu 3 de mayu. Educa Niemeyer programa'l cinecuento n'asturianu "La mio hermana ye una mofeta" de la escritora Berta Piñán y la illustradora Fracesca Assirelli: "Naide m'avisara primero, naide me dixera nada, pero dende'l principiu, dende que nació y yo la vi, supi que la mio hermana yera una mofeta". El sábadu, 2 de mayu, va entamar la Selmana de les Lletres Asturianes qu'entama y empecipia la Conseyería de Cultura con visites en llingua asturiana al Muséu de Belles Artes d'Asturies. Esi mesmu día, a les 19.00 hores, va celebrase n'A Caridá el "Homenaxe ás nosas lletras", un actu nel que se van lleer testos lliterarios en gallego-asturianu. Tamién se va presentar el sestu númberu de "Trabatel-Revista Eonaviega de Lliteratura", que se va regalar a los asistentes. L'actu va pesllar con un conciertu de la Banda de Gaites "El Trasno". Fonte: Asturnews

El Centru Niemeyer acueye la presentación de la obra infantil "Quiero ser arcu iris"

Cartelu de presentación de "Quiero ser arcu iris"

   L’Espaciu-Tienda del Centru Niemeyer ye’l llugar escoyíu pa la presentación de ‘Quiero ser arcu iris’, obra colorista de María Esther García López con ilustraciones de Reyes Fernández Medina. L’actu va tener llugar el sábadu a les 18.30 hores y va contar cola participación de l'actriz Olga Cuervo.

   ‘Quiero ser arcu iris’ cuenta la historia d’un neña que suañaba con volar y poder camudar de color: el verde, el naranxa, el bermeyón… Esto ye, de los colores del arcu iris que sal cuando los rayos de sol trespasen les gotes de lluvia. “¡Qué más da azul o verde/naranxa o bermeyón!/La guapura, los colores/tán dientro del corazón/Los colores, la guapura,/tán n’amistá y nel amor!”, apunta la escritora na obra. Un rellatu enllenu de “color, mitoloxía, maxa, valores y gran dosis de fantasía” qu’edita Pintar-Pintar.

   L’actu de presentación va contar cola presencia de García López y de Fernández Medina, que van tar acompañaes por Ángela Sánchez, en representación de la editorial, y Teresa Estrada Villazón, direutora de la Fundación Cruz de los Ángeles, entidá a la que la escritora donó los derechos pola venta d'esti llibru. Amás, l’actriz Olga Cuervo va facer una intepretación de la historia del llibru, lo que va convertir l’eventu nun momentu especial pa tolos presentes.                                     Fonte: Asturnews.com

L’Atenéu N’Alfoz y Compromisu critiquen la decisión del Niemeyer pa col Conciertu pola Oficialidá

Pablo R. Guardado
La negativa del Centru Niemeyer a acoyer el Conciertu pola Oficialidá d’esti añu provocó les crítiques de l’Atenéu n’Alfoz y de Compromisu por Asturies. Dambos coleutivos nun entienden esti actu discriminatoriu nuevu pa col nuesu idioma.

La entidá cívica qu’axunta a asturianistes d’Avilés, Castrillón, Corvera y Illas esixe a los responsables del Centru Niemeyer “respetu pola cultura asturiana”. “L’Atenéu N’Alfoz atopa nesta decisión una amuesa más de la actitú d’autoodiu promovida polos socesivos gobiernos d’Asturies, col oxetivu de dexar la nuesa llingua y cultura morrer nel escaezu”, señala nun comunicáu nel que reafita’l compromisu del coleutivu pola oficialidá y nel qu’amuesa la so solidaridá cola Xunta pola Defensa de la Llingua Asturiana (XDLA), organización qu’entama’l Conciertu pola Oficialidá xunto con Xunta Moza.

Pela so parte, la federación de partíos Compromisu por Asturies fala de “una discriminación nueva de la llingua asturiana”, más sangrante entá “al venir d’una entidá de financiamientu públicu”, con un costu de 40 millones d’euros, que se vende “como un espaciu pa la cultura” cuando, al mesmu tiempu, “refuga la presencia de la llingua asturiana nel so espaciu”. Pa Yolanda Huergo, vocera de la organización, negar el centru avilesín a la XDLA ye “la guinda del pastel, la culminación d’un proyeutu cultural qu’aveza a traenos dende la so nacencia noticies de sobrecoste, presupuestos inflaos y dineros perdíos de forma misteriosa; too ello paez que cola conocencia y permisividá del Gobiernu del PSOE, siempres más esmolecíu polo megalómanu que polo asturiano, y por conxurar les sos pantasmes y obsesiones en rellación cola cultura asturiana”.

Los nacionalistes ven nesta decisión “un exemplu nidiu de censura ideolóxica que s’axunta al nomáu paletismu la FSA, incapaces de valorar lo más cercano, inclinándose siempre por cualquier cosa que venga de fuera primero que polo fecho, falao o pensao n’Asturies”, lo que constitúi “otra amuesa del autoodiu qu’esiste ente los políticos asturianos”. Por último, reclamen la oficialidá de la llingua asturiana p’acabar “cola dicriminación de les y los asturianos pol fechu de selo y falar el so idioma”.

Fonte: Asturies.com

La XDLA denuncia que’l Centru Niemeyer nun permite la cellebración del XXV Conciertu pola Oficialidá

La Xunta pola Defensa de la Llingua Asturiana celebra dende va 25 años el Conciertu pola Oficialidá. Esti cuartu de sieglu conviértelu nún de los festivales musicales de más tradición y trayectoria de los que se faen n’Asturies. Dende la organización espliquen como “el valir simbólicu” que tien l’acontecimientu pa la música asturiana y la reivindicación llingüística-yos fíxo pensar nuna vuelta a la ciudá que lu vio echar a andar allá pel añu 1989; y ye que foi Avilés l’escenariu d’aquel primer conciertu de reivindicación de la oficialidá. Sicasí, el Niemeyer nun permitió celebralu na so esplanada, lo que dende la Xunta ven como “un vetu ridículu y prevaricador”.

La Xunta pensare nesti espaciu “qu’al paecer del so diseñador habíen tar abiertos a la participación del pueblu”. Pero denuncieen que “bien se sabe qu'una cosa ye la teoría y otra la visión más prosaica de los nuestros próceres y allegaos”.

“Cuando nos entrevistemos colos responsables directos de facer posible’l disfrute de la instalación, viemos bien rápido la ideoloxía real que’l poder tresmite a esti tipu de, como-yos dicen, "contenedores culturales": nun se busca la igualdá o la participación, sinón simplemente la fachada, l'apariencia o asonsañamientu brutu”, espliquen. En definitiva, punxeron lo que al Xunta califica de “sides pa nun dicir que nun queríen actos reivindicativos de la oficialidá: nun había feches, yera demasiao tarde, yá se reunió'l patronatu..., pero si-yos viniere la propuesta de cualquier estrella, reconocieron, yá lo iguaben pa que pudiere actuar en pocos díes”.

Pa la Xunta “al final, dalguna utilidá habíen tener estos mausoleos faraónicos de la castra política asturiana: son los que meyor van falar nel futuru de la so ideoloxía escarniada: en nome de la cultura y la participación xenérase un discursu y unes polítiques que tienen como resultáu un decoráu de cartón-piedra pa favorecer y, sobre too, xustificar l’apartheid y llavar l’auto-odiu”.

Fonte: Asturnews

El Premiu Nobel SEAMUS HEANEY va recitar nel Niemeyer

El Premiu Nobel Seamus Heaney va recitar nel Niemeyer

El poeta norirlandés (Condáu de Derry) de 72 años, Premiu Nobel

   El xueves, 4 d'abril, el "Ciclu de pallabra” del Centru Niemeyer va cumplir con una de les sos cites más destacaes, cola visita del premiu Nobel Seamus Heaney. El poeta irlandés va ser entrevistáu por Jordi Dolce -coordinador del ciclu, traductor y poeta asturianu-, nun alcuentru que se va celebrar na cúpula del centru cultural a les 20’00h. La entrada va ser llibre y gratuita hasta completar aforu, previa retirada d'invitación. Les invitaciones yá pueden retirase na receición del Centru Niemeyer y na receición de La Llaboral de Xixón.

Fonte:  Asturnews.

La XXXIV Selmana de les Lletres Asturianes na alcordanza de Nené Losada Rico

La Selmana de les Lletres Asturianes va dedicase esti añu a la figura de Nené Losada

Nené Losada Rico en 2007

     El 29 d'abril entamarán los actos de la que ye yá la XXXIV Selmana de les Lletres Asturianes y la Conseyería de Cultura ta acabante anunciar que la escritora Nené Losada va ser la lliterata a la que se faiga homenaxe nesta ocasión. Un llibru sobre la so vida y obra va regalase nes llibreríes, como cada añu, el Día del Llibru Asturianu, que sedrá nesta ocasión el 3 de mayu. Amás, ente los planes, un gran actu poéticu y musical nel Centru Niemeyer, el martes 30 d'abril, y la puesta n'escena de les obres del Ier Certame de Teatru escolar n'asturianu, l'8 de mayu, en La Llaboral.

   Nené Losada, la que fuera decana de les Lletres Asturianes. La escritora valdesana Nené Losada Rico, dexónos n'abril de 2009, a la edá d'87 años. Nes cuasi nueve décades de vida que tuvo, la escritora, considerada nel momentu de la so muerte decana de les lletres asturianes, dedicó bien de tiempu a escribir n'asturianu, siendo una firma defensora de la oficialidá del idioma.

   Ñació en L.luarca'l 10 de payares de 1921. Trés años depués, al morrer la madre, llévenla a Sanfliz de Trevías, pa cola güela. Ellí diba vivir hasta que, con diecinueve años, casa y torna pa L.luarca, onde sigue viviendo. De formación autodidacta, amuésase como una temprana escritora de relatos y poemes en castellán. Tiempu más tarde, empezará a facelo na llingua del so llugar, utilizando formes poétiques mui cercanes a les de la poesía oral popular. En 1992 recoyó bona parte de la so obra en versu nel volume Cantares valdesanos, n’edición de Consuelo Vega, que se completa col nuevu llibru poéticu apaecíu en 1997 col títulu de Entre apigarcios, dende entós espublizó tamién la so obra en castellán nun volume completu.

   L'autora recibió numberosos homenaxes y premios. Col so nome convócase cada añu un premiu de poesía. Nel añu 2000 recibió l'Urogallo de Bronce, entregáu pol Centru Asturianu de Madrid, al que nel 2005 se-y sumó la medaya de plata del Principáu d'Asturies. En 2007 recibió'l Premiu Timón que concede l'Arribada, pola mor de la so trayectoria lliteraria, y en 2008 foi nomada Fía Predilecta del Conceyu de Valdés, amás de poder ver colgáu un retratu de so na Casa Conceyu.

   Cola muerte de Nené Losada Rico la lliteratura asturiana perdió una de les sos voces hestóriques, una de les últimes figures de la nomada Xeneración de la Posguerra, que nos últimos años dexó tamién nel camín a escritores como Mánfer de la Llera o Eva González. Agora Asturies va facer l'homenaxe que merez.

 Fonte:  Asturnews.

Nueche de monólogos nel Centru Niemeyer d'Avilés

Nueche de monólogos d’El Club de la Comedia nel Centru Niemeyer

Auditoriu del Centru Niemeyer

Panorámica del Centru Niemeyer d'Avilés: el teatru al fondo

   Esti domingu 24 de febreru a les 20.30 hores, el Centru Niemeyer d’Avilés acueye “Las Noches del club de la comedia”. Globomedia presenta "Las Noches del Club de la Comedia", el so late nightshow de mayor ésitu de xira pelos meyores teatros del estáu, nun espectáculu con Toni Mogg, Miguel Lago y David Broncano.

   Fonte:  Asturnews.

Liet International principia a distribuyir les invitaciones

La organización del Liet International principia a distribuyir les invitaciones del certame de Xixón

Pablo R. Guardado .

El 1 d’avientu, a les 21.15 hores, va celebrase nel Teatru de la Llaboral el Liet International de Xixón, certame nel qu’Asturies va tar representada pola Asturiana Mining Company. Dende esti vienres tán disponibles les invitaciones.

Les persones interesaes n’acudir al festival européu de llingües minoritaries con orixe en Fryslân, que se celebra per primer vegada na Península Ibérica, pueden recoyer les entraes na recepción de la Llaboral y del Centru Niemeyer nel so horariu habitual d’apertura. Nel Liet International van tomar parte once formaciones de dellos países europeos que van competir por llevase’l reconocimientu del xuráu y del públicu.

Los últimos n’incoporase al cartelu, tres la celebración del festival Suns de llingües minoritaries nel Estáu italianau, foron los sardos Claudia Crabuzza y Claudio Gabriel Sanna, de la ciudá de L’Alguer, que van intepretar el cantar en catalán ‘Ara’. Xunto a ellos, viaxen dende Italia los friulanos ‘Jo No Kongnos’. Dientro de les llendes del Estáu, van tener representación Euskal Herria, cola presencia de la banda de rock Enkore, y los anfitriones, Asturies: l’Asturiana Mining Company va tratar d’algamar un trunfu, que yá raspió Dixebra y Xera, col cantar ‘Si nun conoces Vaḷḷouta’.

Completen la llista de participantes Yldau (Fryslân), The Voodooeletric (Neddersassen/Saxonia Baxa), Lleuwen (Breizh), Ivan Belosludtsev & 4cp (Udmurt Elkun/República d’Udmurtia), Inger Karoline Gaup (Sami), Dopu Cena (Còrsica) y Brian Ó hEadhra (Alba).

Fonte:  Asturies.com