6/4/17

L’alemán Wolf Erlbruch gana’l premiu más prestixosu de lliteratura infantil


 L'escritor y ilustrador alemán Wolf Erlbruch algamó esti martes el premiu Astrid Lindgren 2017, unu de los más prestixosos del mundu en lliteratura infantil. El fallu de la Fundación Astrid Lindgren destacó la so capacidá innovadora, el so sentíu del humor y el so talentu pa tratar temes esistenciales nes sos obres.
 “Wolf Erlbruch fai accesibles y afechisques cuestiones vitales a llectores de toles edaes. Con humor y calidez guañaes nuna filosofía humanista, la so obra amuesa lo pequeno no grande. Apodera de forma maxistral l’arte del dibuxu con base nuna tradición llarga qu’abre nueves ventanes creatives”, consta nun comunicáu.
 L’autor alemán, nacíu en 1948, publicó una decena de llibros ya ilustró cerca de cincuenta obres d’otros autores. Erlbruch asocede a la estadounidense-británica Meg Rosoff nel palmarés del Premiu de Lliteratura en memoria de Astrid Lindgren (ALMA), como realmente llámase’l galardón, que reconoz a autores, ilustradores ya iniciatives qu’afalen a la llectura siguiendo l’espíritu de la ceadora de personaxes como Pippi Calcesllargues.
 L’oxetu del premiu ye potenciar y aumentar l’interés pola lliteratura infantil y xuvenil en tol mundu y fomentar el derechu de los neños a la cultura nel ámbitu global. El galardón foi instituyíu en 2003 pol Gobiernu de Suecia, un añu dempués de la muerte de la escritora, y ta dotáu con 5 millones de corones sueques (524.000 euros/558.000 dólares). Erlbruch va recibir el premiu de manos de la princesa heredera Victoria de Suecia nuna ceremonia que se va celebrar el 29 de mayu nel Konserthus d’Estocolmo.
Fonte: asturnews.com

1 comentario:

Los comentarios tán pendientes de moderación. Espublizaránse lo primero dable.