Samalandrán lleva’l bollu a los escolinos d’Infantil del CP Sabugo

Samalandrán infantil  nel Colexu Públicu Sabugo

  Los escolinos y escolines del Colexu Públicu Sabugo van recibir esti vienres a un visitante mui especial. Trátase de Samalandrán, el míticu monxu marín irlandés, que torna a Avilés pa trayer el bollu y contar la lleenda de la islla de Samalandrán.

  L'Asociación Cultural Xaréu d’Ochobre collabora nesta actividá pola que yá nagüen los neños y neñes d’Infantil del centru avilesín. A les 12.40 hores ta prevista la llegada de Samalandrán xunto con un grupu de persones vistíos col traxe mariñán. Tres sentir la lleenda de la boca del propiu monxu, van poder face-y entrugues y, darréu, cantar en comuña la ‘Dancia la mar’ nel so honor.

  Si’l bon tiempu acompaña, la reciella, maestros y familia van baillar la Danza Prima la Mar nel patiu, pa depués compartir el bollu “como manifestación de convivencia y fraternidá, adelantu de la celebración de les Fiestes de Pascua y la llegada de l'allegre, colorida y lluminosa primavera”.

Charra pela tarde p'adultos

  Víctor Raúl Pintado ‘Vitu’ y Raquel Álvarez Iglesias van averar a tolos ciudadanos la lleenda culta de la islla de Samalandrán pela tarde, a les 19 hores, nel Palaciu de Valdecarzana. “Trátase d'una charra sobre una misteriosa islla que va al debalu pela mar, la islla qu'afayó'l monxu y marín irlandés. Una islla que ye quien a apaecer y sumir, de faer surdir la tierra del fondu la mar, creando una islla pa que los navegantes pudieren folgar. Una islla viaxera que cuando volvíen zarpar los marineros, somorguiábase y tornaba al fondu la mar. O quién sabe, quiciabes se tratara d’un pexe inmensu, un monstruu marín o una escomunal ballena, y non d’una islla”, apunten los autores del álbum ilustráu ‘Samalandrán. Islla de lleendes’.
Fonte: asturies.com