“Grabar esti discu yera una espina clavada. En too esti tiempu siguimos trabayando, más que nunca, y recopilamos munchu material”, asegura Fonsu Mielgo dende Tutu Estudios, onde ta rexistrando les pieces xunto colos cuatro compañeros que conformen el grupu anguaño tres la marcha de Marcos Llope. L'álbum va ver la lluz esti mesmu añu.
Dieciocho años depués d’espublizar ‘Un tiempu meyor’ (Fonoastur, 1999), Llan de Cubel va ufrir a los sos munchos siguidores de dientro y fuera d’Asturies material nuevu. “Tamos entamando entovía”, esplica Mielgo mientres per detrás de la conversación pue sentise’l soníu d’instrumentos.
El trabayu, entovía ta en procesu de creación –la banda nin siquier decidió la discográfica que vaya editalu–, va tar formáu por catorce pieces, de les que “cuatro o cinco” van ser con lletra. “Son temes nuevos”, apunta’l percusionista de Llan de Cubel, qu’añade que “nestos 17 años formamos una base de datos mui amplia”.
Asina, la formación folk trabayó a partir de cancioneros como’l de Torner, el de Maya y Lavandera, el de Víctor Sáez o'l de Baldomero Fernández, y grabaciones de campu “previes al gran trabayu que desendolcó Ambás”, a lo qu’hai que sumar composiciones propies de los cinco miembros qu’anguaño tien Llan de Cubel: Mielgo, Elías García, Xel Pereda, Simon Bradley y Xuan Rodríguez. “Contamos con grabar la mayoría del discu agora, pa da-y los toques finales en mayu y mezclalu en branu”, comenta.
La idea ye, poro, asoleyar el trabayu nuevu esti mesmu añu, ufriendo a los sos siguidores un más qu’esperáu trabayu que tamién yera una cuenta pendiente pa la propia formación. “Grabar esti discu yera una espina clavada. En too esti tiempu siguimos trabayando, más que nunca, y recopilamos munchu material. Esperamos qu’a la xente-y preste”, apunta’l músicu, qu’anucia que la mente de la formación nun ta agora en posibles conciertos, anque habrá dalgún cuando’l discu sía una realidá.
Na semeya, Bradley nun momentu de la grabación. Imaxe de Tutu Estudios.
No hay comentarios:
Publicar un comentario
Los comentarios tán pendientes de moderación. Espublizaránse lo primero dable.