Asturies llamenta la muerte del poeta Pablo Ardisana

Llicenciáu en Xeografía y Hestoria foi escritor de vocación tardida

Fina'l poeta Pablo Ardisana

                                                                 
                                                                   XUNTO A LA MAR

                                                          Xunto a la mar
                                                         d'aquellos branos,
                                                         cuando dexabes al to cuerpu
                                                          asomase nes fines orielles
                                                         del traxe azul que t'enduviellaba
                                                         abierta pal amburante sol,
                                                         y pa les brises dadores
                                                        d'enriaderes d'ocla tresparente...
                                                        Xunto a la mar
                                                       d'aquellos branos,
                                                       pel sable comu alfombra persa
                                                       yeres armonía d'anxélica sirena.

   Na madrugada’l domingu al llunes finaba Pablo Ardisana, poeta n´asturianu consideráu ente los contemporáneos de más calidá, con obres como Armonía d’anxélica sirena (1986) y Azul mirar d´amor (1989)

 Pablo Ardisana, nacíu en Hontoria (Llanes) en 1940 foi un poeta de vocación tardía: el so primer llibru:  Armonía d’anxélica sirenaespublizolu ya con cuarenta y seis años. A esti poemariu siguieronlu Rosamaría (1987),  Azul mirar d’amor (1989) y  Una luz inesperada (1991).

 Apaeció en revistes como Lletres Asturianes y nes antoloxíes más prestixoses de la lliteratura asturiana de les últimes décades. En 2009 ún de los sos poemes foi musicáu pola compositora Carla Armas, poniéndo-y música´l Conservatoriu Superior de Música de Salamanca. Una esperiencia que nun foi única pues el grupu Llan de Cubel tamién musicó la so obra.

 Arriendes del so llabor como poeta, Ardisana impulsó a lo llargo la so vida iniciatives culturales y sociales nel so conceyu, como´l Certame de poesía Santa Rita, en Cardosu, nos años noventa. Un certame qu´esti añu va recuperase con una tercer edición que l´autor yá nun podrá ver.

 Cola desapaición de Pablo Ardisana el país pierde un poeta y una persona comprometida cola so llingua y cultura. Sit tibi terra levis, collaciu.                          Fonte: infoasturies.com