2/4/17

LA GRANDE BOUFEE

Por Vicente García Oliva

  La perspeutiva, yá cuasi confirmada, de que l’Ilustre Ayuntamientu de Xixón va a regalar/subvencionar 175.000 euros (75.000 más que l’últimu añu) a la Selmana Negra, paezme que bien merez el títulu que nesta entrada-y dedico. Nunca nun se vio que se premie a una entidá privada con ánimu de lucru, por facer mal les coses: deber perres a proveedores de bienes y servicios, y a la propia Facienda Pública. Manda güevos que seyan los amigos de lo Público, los partíos d’izquierdes, col sofitu de una derecha vergonzante como ye Foro, los que-yos saquen les castañes del fueu a una asociación a la que siempre acompañó la polémica. A dalgunos fai-yos gracia esa definición del padre-fundador, Paco Ignacio Taibo II de que La Selmana Negra ye “un parque temáticu pa neños trotskistas”. Yo, la verdá, nun-y veo la gracia. Los “neños trotskistas” que vayan a entretenese coles sos perres, non a esperar que, amás de xugar, los mantengamos nosotros.
  Y ye que, amás, en Xixón hai otros importantes eventos que tamién necesitaríen sofitu económicu porque, poles perres que se-yos dan, anden agora amiseriaos y a puntu esapaecer.  Eventos que sí son públicos, o seya municipales, como’l Festival Internacional de Cine de Xixón, con una trayeutoria consolidada y al que tán a puntu de cargase los partíos opositantes, o  el propiu Festival del Arcu Atlánticu, una iniciativa guapísima pa promocionar un comerciu y una cultura na que Asturies siempre se movió dende tiempos inmemoriales.
  Ye verdá, y yá lo tengo dicho, que la Selmana Negra trai dalgunes conferencies, presentaciones o esposiciones d’interés. Taría bueno que nun fuere asina coles perres de les que dispón. Pero tamién ye verdá que too ello podría  facese n’otru tipu de marcu más afayaízu, más económicu,  y menos molestu. Como exemplu, la BCNegra de Barcelona, qu’aconceya a interesantísimos autores, editores y otres prestoses meses redondes, ensin el enorme gastu y la polémica que siempre arrodió al certame xixonés. Abúltame que 175.000 euros, más otros activos (tarrén, policía, basoria…) ye dalgo que nun debería sofitase colos impuestos de los xixoneses. Anque sé qu’esto ye “dar voces en castañéu”.

LA SELMANA NEGRA: UN SACU ENSIN FONDU

   Talamente paez que perdieron l' “oremus”. Lleo con asombru l’enorme pufu que tien la famosa Selmana Negra con Facienda y con otros acreedores y paezme imposible sentir lo que toi sintiendo. Estos señores que, pese a ser una entidá privada, lleven tropecientos años cobrando subvenciones de les arques públiques: Ayuntamientu, Principáu… pretenden iguar los sos problemes económicos a costa nuestra. Asina, tienen la ocurrencia, por nun dicir desvergüenza, de pidir al ayuntamientu de Xixón que cuasi dupliquen les perres que-yos vienen dando. Ye dicir que nun-yos paecen abondo los 100.000 euros que cobren añalmente de subvención municipal, sinón qu’agora quieren cobrar 180.000 pa asina, dicen, solucionar los sos problemes. ¿Pero en qué País creen que viven estos señores? ¿Paez-yos normal sufragar con perres públiques les sos aventures económiques? ¿La so malísima alministración?
Semeya El Comercio
   Asina, dalgo que comenzó siendo un xuguete pa los dirixentes socialistes d’otra dómina (Tini Areces, Mapi Felgueroso…) que sacaben semeyes y tomaben copes col inventor del chiringo, aprovechando pa criticar y reíse de “la derechona” de la ciudá que nunca nun diba a gobernar equí, acaba camudándose nun sacu ensin fondu qu’amenacia con llevase una parte abondosa del presupuestu xixonés, que tendría de correr agora colos pufos qu’estos señores van dexando nun llau y n’otru.
   Dende va tiempu voi criticando esta feria de la cutrería, del churru aceitosu, de los desperdicios enllenando los suelos, del alloriu d’unes músiques al altor de la llocura, y de les pelees de madrugada (dalgún miembru de seguridá del  recintu dixo qu’aquello yera una ciudá ensin llei, como nel Far West) que, cola sida d’un llabor cultural y unes cuantes presentaciones, que podíen facese perfeutamente n’otru contestu, añu tres añu funde nuna sola selmana lo qu’otres entidaes culturales nun ven nin en diez años. Yo creo que yá tuvo bien. Nun sé si esa Selmana Negra tuvo sentíu dalgún día, pero la ciudá de Xixón nun pue permitise’l lluxu de siguir calteniendo un esperpentu ruinosu que, cola disculpa de ser d’izquierdes, de xéneru, de númberu o internacionalista, perdió ya l'"oremus" va munchu tiempu. A min que me borren.                   Fonte: trabayudecampu.com

7 comentarios:

  1. Y a min tamién. Una auténtica vergoña.

    ResponderEliminar
  2. Lo cabal o xustu (de xusticia) ye que Paraja y compañía fixeren un viaxe rescamplu mexicanu a por perres pa pagar lo muncho que deben y non que nos lo quieran sacar a toos el xixoneses y xixoneses que nun tenemos nada que ver nesti negociu".

    ResponderEliminar
  3. ¿Hai perres pa esti pufu y non pa l'ALLA? Qué país...

    ResponderEliminar
  4. Lo qu'hai na Selmana Negra ye un pufu grandiosu qu'atropen Taibo (el troskista) y Paraja (el "llistu"). Amás de eso, de cultura hai bien pocu pero engarres y enfiles hai munchos.

    ResponderEliminar
  5. La Selmana ye Negra, sí, pero non poles escases conferencies sobre la novela negra que pueda haber sinón pola delda ensin fondu que fueron amasáu los lisitillos del llugar ¿premialos colos nuesos impuestos en llugar de llevalos onde se debe? ROTUNDAMENTE NON.

    ResponderEliminar
  6. A mi cuéstame horrores llegar con cuenta de mes y, a quien correspuenda, clamo a berríes que colos mios costosos impuestos nun se siga alimentando la fiebre depredador de dineru d'esta insatisfecha y desbalidora pareya asonsañona de "falsa cultura negra" o meyor aciar.

    ResponderEliminar
  7. A ver, coles mios perres nun se premia a gastiegos caradures ya incompetentes. Los sos "negocios" son puramente sos.

    ResponderEliminar

Los comentarios tán pendientes de moderación. Espublizaránse lo primero dable.