Iniciativa pol Asturianu anima a la sociedá a participar na Manifestación pola Oficialidá

Iniciativa pol Asturianu anima a la sociedá a participar na Manifestación pola Oficialidá nuna nota de prensa asoleyada esti día, na que fai alcordanza de la cercanía de les elecciones, que "fai especialmente importante que la sociedá asturiana faiga un llamáu a los partíos, pidiéndo-yos un mayor compromisu cola llingua asturiana". Por mor d'ello vienres 8 de mayu la sociedá asturiana vuelve a salir a la cai por mor d'ello llama reclamar la oficialidá del asturianu nesi manifestamientu. Dende Iniciativa pol Asturianu vuelven a sofitar un añu más esta manifestación, participando de la marcha con más razón nesti añu nel que "la cercanía de les elecciones fai especialmente importante la convocatoria, yá que ye necesario dexar nidio a los partíos políticos la necesidá d’actuar yá sobre la situación de perda idiomática y falta de drechos civiles que vivimos n’Asturies". La Manifestación pola Oficialidá va salir a les 19:30 hores de la Estación del Norte d'Uviéu y Iniciativa alienda "a toles persones enfotaes nel futuru del idioma a participar con nós nesti actu festivu y reivindicativu que llenará les cais de la capital asturiana". Iniciativa pol Asturianu quier facer un llamáu a la sociedá pa participar nesta reivindicación y va facelo con un repartu de nuevos materiales promocionales, incluyendo folletos y chapes reivindicatives. Iniciativa pol Asturianu ye una organización que ñació pa implicar a tola sociedá asturiana nel procesu de recuperación y normalización del asturianu, y polo tanto camienta imprescindible que la sociedá s’implique y faiga oyer la so voz, que ye mayoritariamente favoratible a que l’asturianu se convierta nuna llingua normal, que pueda usase en tolos ámbitos y que tenga garantizáu’l so futuru, lo que solo ye posible si esta llingua ye oficial. Nel comunicáu asoleyáu est día, Iniciativa pol Asturianu recuerda que "dempués de la manifestación va celebrase nel Teatru Campoamor la Xunta Estraordinaria de l’Academia de la Llingua Asturiana y que la entrada ye llibre y de baldre. Animamos a la xente a participar d'esti actu de sofitu a la institución y aprovechamos pa felicitar a la Xunta pola Defensa de la Llingua Asturiana, organización que convoca la manifestación, qu’esti añu cumple 30 años d’actividá". Fonte: Asturnews