Iniciativa pol Asturianu va axuntar a los asociaos esti sábadu 30 de mayu, en Xixón, pa celebrar la Xunta Xeneral añal de la organización, que nesta ocasión tien calter de Congresu. Nesta xuntaza de los socios van discutise y votase dalgunes propuestes d'importancia, asina como les llinies de trabayu pa los años vinientes, escoyendo la nueva Xunta Direutiva. L'actu va celebrase a partir de les 17 hores y hasta les 20, nel espaciu La Revoltosa, na cai Juan Alonso, 12, nel barriu L’Arena de Xixón.
Na Xunta Xeneral pueden participar tolos asociaos, collaboradores de la organización y persones interesaes en sumar el so sofitu, cuntando con votu los socios miembru de la organización. Pueden presentase propuestes de trabayu, asina como suxerencies y otres iniciatives.
La direutiva actual de la organización va presentar l'Informe de Xestión 2012-2015, onde dará cuenta de l'actividá d'Iniciativa pol Asturianu, les cuentes y demás cuestiones qu'afecten a l'asociación. Amás, propondráse y discutiráse una fueya de ruta col llabor pa los vinientes doce meses, col envís d'organizar el llabor de la organización.
Dempués de los actos, hacia les 20 hores, celebráse una pinchéu nel mesmu llugar, cuntando con actuación d’un monologuista y otres actividaes culturales. Fonte: asturnews.com
Veremos esta tardi en La Revoltosa escontra la metá de la sablera San Llorienzu de Xixón, escontra'l y vamos charrar con vagar de lo que faiga falta, salú.
ResponderEliminar