Entama la XXXVI Selmana de les Lletres Asturianes

Esti sábadu da aniciu la XXXVI Selmana de les Lletres Asturianes, que vien cargada d’actividaes de toda triba, la mayoría enfocaes sobre manera al públicu escolar. El lema d’esta edición ye ‘Semar palabres, texer futuru’. El XXXVI Día de les Lletres Asturianes va celebrase'l vienres.

Unes visites guiaes al Muséu de Belles Artes d’Asturies n’asturianu –pa lo que ye necesario acutar plaza– sirven p’abrir esta selmana na que les lletres asturianes son protagonistes. Éstes van celebrase entes les 12 y les 14 hores, y les 17.30 y les 20.30 hores. Yá de tarde (19 hores), nel Auditorio da Casa das Quintas, n’A Carida, va celebrase’l ‘Homenaxe ás nosas lletras’, actu nel que va presentase el sestu númberu de ‘Trabatel. Revista eonaviega de lliteratura’ y que va contar con una llectura pública institucional de testos lliterarios n’eonaviego. Pa zarrar, la Banda Gaitas El Trasno, ganadora del VIII Premiu al Meyor Cantar con ‘Volviche’, va ufrir una actuación.

Tres un parón el domingu, el llunes va celebrase en Grau la habitual collaboración con esta cita de la Fundación Aula de les Metáfores. A les 19.30 hores, na capiella de los Dolores, va presentase’l llibru d’Ángeles Carbajal ‘L’aire ente la rama’, XX Premiu Xuan María Acebal de poesía, función que va correr a cargu de Sofía Castañón y Pablo Texón. Darréu, van entregase los diplomes del II Premiu de Poesía Selmana de les Lletres, destináu al alumnáu de Primaria y Secundaria del conceyu. Por último, Mapi Quintana y Elías García van interpretar dellos temes del so repertoriu.

La música va tener tamién protagonismu na actividá del martes. Petit Pop va actuar pa estudiantes del programa ‘Vamos escolar!’ a les 11 hores na Llaboral. Una hora enantes, grupos d’escolinos y escolines van poder disfutar de visites guiaes a la Xunta Xeneral, onde al meudía va celebrase un actu institucional. En Xixón, a les 19.30 hores, va tener llugar la presentación de ‘Cápsules de tiempu’ de Carlos González Espina, VII Premiu María Xosefa Canellada de lliteratura infantil y xuvenil. Va ser dientro de les XX Xornaes de Llingua y Cultura Asturiana qu’entama l’Atenéu de La Calzada xunto con diez centros escolares de la zona.

El paraninfu de la Universidá d’Uviéu va acoyer el miércoles, magar les 12 hores, una llectura siguida de ‘L’inxeniosu fidalgu don Quixote de la Mancha’. Pela tarde, nel salón d’actos de la Biblioteca d’Asturies, va celebrase a partir de les 19 hores la presentación de ‘L’arume de la tierra’ d’Enrique Carballeira, VI Premiu Alfonso Iglesias de cómic, a cargu de Ernesto García del Castillo ‘Neto’. Los dos dibuxantes van participar darréu xunto con Ruma Barbero nun alderique de nome ‘El cómic n’asturianu güei’ que va moderar José Antonio García Fernández ‘Chechu García’.

La Feria del Llibru y Discu n’Asturianu va abrir les sos puertes al meudía del xueves n’Avilés cola presentación de ‘Caleya Sésamu: el papel de la televisión na tresmisión interxeneracional de la llingua’ de Damián Barreiro, XX Premiu Máximo Fuertes Acevedo d’ensayu, a cargu de Naciu Llope. La feria va tar abierta na Pescadería Municipal Antigua nos horarios siguientes: de 11 a 14 hores y de 17 a 21 hores, xueves, vienres y sábadu; y de 11 a 19 hores, el domingu. Yá de tarde, a les 19 hores nel salón d’actos del Centru Social de Tuña va presentase ‘Crónica de la lluz y la solombra’ d’Antón García, XXXV Premiu Xosefa Xovellanos de novela, a cargu d’Ana Vanessa Gutiérrez.

XXXVI Día de les Lletres Asturianes

El vienres ye’l XXXVI Día de les Lletres Asturianes, que va principiar al meudía con un actu escolar-institucional nel Colexu Públicu Manuel Martínez Blanco, nel barriu xixonés d’El Llano. Ésti va contar con actuaciones y nél van entregase los premios del XX Certame de Creación Artística/Lliteraria, del XII Certame de Cartelismu y del IV Certame de Creación Audiovisual.

La Xunta pola Defensa de la Llingua Asturiana entama esti día la yá llamentablemente tradicional manifestación ‘L’asturianu, llingua oficial’ (19.30 hores, Estación del Norte d’Uviéu) que fina nel Teatru Campoamor, onde l’Academia de la Llingua Asturiana (ALLA) celebra la so xunta estraordinaria. Precisamente, la organización cívica va ser homenaxada pola institución académica polos sos trenta años de trabaya nel actu nel que discursu de la presidenta Ana María Cano centra toles miraes. La gaita d’Andrea Joglar, la llecturar d’una esbilla de poemes de ‘Lliteratura 31’ y l’actuación de Xuacu Amieva Folk son los atractivos d’esta edición. Tres l’actu académicu, va tener llugar la espicha de l’ALLA nel Llagar Herminio de Cualloto, pa lo que ye necesario confirmar asistencia enantes del miércoles nel teléfonu 985.21.18.37.

Nesta xornada celébrase tamién el Día del Llibru n’Asturianu, con un diez por cientu de descuentu na merca de llibros y discos nel nuesu idioma na mayor parte de llibreríes y tienes de música del país, a lo qu’hai que sumar la entrega de baldre del llibru conmemorativu de la XXXVI Selmana de les Lletres ‘Blimes nueves, bringas novas’. La celebración va finar un día más tarde, el sábadu, con visites guiaes n’asturianu nueves al Muséu de Belles Artes de 12 a 14 hores y de 17.30 a les 19.30 hores. Los interesaos han de formalizar reserva nel corréu lletrónicu visitantes@museobbaa.com o nel teléfonu 985.21.20.57  dende’l llunes al vienres n’horariu de 9 a 14 hores.

Fonte: Asturies.com