La Vuelta 2013 nun utilizará la toponimia oficial d'Asturies

La Vuelta 2013 tampoco nun utiliza la toponimia oficial d’Asturies

Les "bones intenciones" d’Unipublic pa utilizar la toponimia oficial nel so pasu pel país nun foron suficientes. El sábadu presentóse en Vigo La Vuelta 2013, que celebra dos etapes n'Asturies nel que s'usen nomes de llugar castellanizaos.

Tres la polémica del añu pasáu, sobre manera nel usu del topónimu Cuitunigru –na mayor parte de los medios de comunicación usábase ‘Cuitu Negro’, términu recoyíu na web de La Vuelta, o inclusive ‘Cuito Negro’ nel casu concretu d’El Comercio–, que llevó a la Direición Xeneral de Política Llingüística a ponese en contautu con Unipublic, empresa organizadora de la ronda ciclista, pa tratar l’usu de la toponimia asturiana, na edición del 2013 de La Vuelta torna a repetise la mesma situación. Vigo acoyó’l sábadu la presentación del percorríu de la carrera, que va tener la so salida en Vilanova de Arousa’l 24 d’agostu, y pudo comprobase que la toponimia asturiana ye, xunto cola aragonesa, non oficial, la única del Estáu que nun se respeta.

La ilusión cola que se recibió dientro del movimientu de reivindicación llingüística la noticia dada por Política Llingüística, en manes nesi momentu de Foro Asturias Ciudadano, de la utilización de la toponimia oficial nuna carrera d’amplia repercusión internacional y de munchu siguimientu ente la ciudadanía asturiana, quedó en decepción tres la entrada trés meses depués del PSOE nel Gobiernu del país. Lo qu’en xineru yera un compromisu d’Unipublic pa iguar la situación, n’agostu quedaba namái en “bones intenciones”, según anunciaba Ana Fueyo. Los dossieres de prensa taben fechos con meses d’antelación y el xestu de la empresa quedó nun cambiu na web pa situar ‘Cuitunigru’ como final d’etapa en cuenta de ‘Cuitu Negro’.

Una situación que podría llegar a ser entendible nel so contestu tórnase agora n’incomprensible, cola esplicación única de la falta d’enfotu del Gobiernu d’Asturies nel usu d’una toponimia oficializada pola propia institución. Hai que tener en cuenta que’l pasu de la ronda peles carreteres asturianes finánciase con perres públiques y que, dende Unipublic, paez nun haber refugu al usu de los nomes asturianos de llugar, polo que sorprende que la historia se repita un añu depués.

Dos etapes en territoriu asturianu

La organización de la Vuelta 2013 escoyó a Asturies como’l territoriu onde, previsiblemente, va decidise la ronda. Nesta ocasión, el nuesu país va acoyer les dos etapes últimes enantes de la definitiva, ente Leganés/Parquesur y Madrid. El vienres, 13 de setiembre, el pelotón va xubir el Naranco nuna etapa de 177,5 quilómetros con salida de San Vicente de la Barquera, pal día siguiente comenzar a dar pedalaes n’Avilés y finar 144,1 quilómetros depués nel puertu más esperáu pa los siguidores asturianos: L’Angliru –nesti casu sí se respeta la toponimia oficial, anque col términu ‘Alto de’ delantre del nome de llugar–. El ciclista uviedín Samuel Sánchez (Euskaltel-Euskadi), que namái tien decidida la so participación nel Giro, con duldes si correr el Tour o la Vuelta, destacó en Vigo la espectacularidá d’un percorríu con doce finales n’altu que pue ser mui favoratible pa les sos condiciones.

Fonte:  Asturies.com