Cursu de llingua asturiana en Villaviciosa

L'Atenéu Obreru de Villaviciosa acueye un cursu d'asturianu qu'entamará en feches prósimes nel conceyu maliayu.

L'Atenéu Obreru de Villaviciosa ufierta un cursu d'asturianu de baldre nel conceyu maliayu. Tal como despliquen, "La llingua asturiana cuenta yá con mil años d’historia y, a pesar que’l castellano, dende antiguo, arrequexó’l so papel históricu, cuenta n’actualidá con un cultivu nel planu cultural mui interesante que permanez desconocíu pa gran parte de la sociedá asturiana. La llingua, en cuantes que conforma una particular visión del mundu, ye parte fundamental de la identidá asturiana, y ta en manes de la sociedá asturiana el conocela, conservala y tresmitila pa les nueves xeneraciones nel futuru, pa garantizar la so supervivencia nun mundu globalizáu que tiende a la uniformización".

Poro, el cursu "enseñarános a conocer y valorar l’asturianu que yá aprendimos en casa, a conocer les normes básiques d’escritura, y a meyorar el vocabulariu, la sintaxis y el conocimientu de les distintes variantes que s’atopen n’Asturies". Amás, "Como nun se pue separar una llingua de la sociedá na qu’esta vive y de los productos culturales que d’ella se valen, fadráse tamién un repasu de les circunstancies históriques y sociales que vienen condicionando la esistencia de la llingua y daráse a conocer, a grandes rasgos, la bayura de la lliteratura asturiana clásica y contemporánea".

Los bloques a tratar sedrán "Hestoria y socioloxía de la llingua asturiana", "Normes ortográfiques", "La llingua asturiana: léxicu,s intaxis y morfoloxía", y pa finar, "Música, lliteratura y cine n'asturianu". L'horariu sedrá martes y xueves de 19 a 20:30 hores, con Pablo Suárez Fernández al frente como responsable del Serviciu de Normalización Llingüística de la Comarca de La Sidra.

Los y les interesaes pueden asistir esti vienres 11 de xineru a un aconceyamientu nel Atenéu, nel Pablo Suárez informará de la temática y horarios del cursu. Otra manera d'informase de feches y otres custiones ye contautando col corréu lletrónicu secretaria@ateneovillaviciosa.es.

Fonte: Infoasturies