Fonte: frolesmirandesas.blogspot.com.es
27/6/17
Un viaxe de 27 rutes a lo llargu del llitoral asturianu
Con esta publicación, Sieres pretender invitar a todos aquellos interesados a adentrarse de lleno en la Costa Verde, poniendo en manos del viajero la posibilidad de disfrutar de ella con un enfoque diferente y global
Manuel Sieres Felgueres col públicu al fondu, semeya de Citoula
El médico y viajero asturiano Manuel Sieres Felgueres presentó ayer en el Centro de Cultura Antiguo Instituto de Gijón su libro 'Guía total de las rutas costeras de Asturias. 27 rutas en torno a la costa asturiana y mucho más'. Se trata de una guía útil y global de la costa del Principado en la que se incluyen 27 rutas presentadas de este a oeste, ilustradas con 'Guía total de las rutas costeras de Asturias. fotografías a todo color.
Con esta publicación, Sieres pretender invitar a todos aquellos interesados a adentrarse de lleno en la Costa Verde, poniendo en manos del viajero la posibilidad de disfrutar de ella con un enfoque diferente y global
Fonte: elcomercio.es
Fonte: elcomercio.es
La Tertulia Malory escueye 'Lluvia d’agostu' meyor llibru n’asturianu de 2016
L'escritor xixonés Francisco Álvarez
La Tertulia Malory, de L’Entregu, escoyó como meyor llibru n’asturianu de tolos que s’editaron nel 2016 la novela Lluvia d’agostu, del escritor xixonés Francisco Álvarez. Fízolo’l vienres 23 de xunu nun actu que se celebró nel pub Tom Malory de L’Entregu, sé de la tertulia lliteraria dende 1998.
La Tertulia Malory, de L’Entregu, escoyó como meyor llibru n’asturianu de tolos que s’editaron nel 2016 la novela Lluvia d’agostu, del escritor xixonés Francisco Álvarez. El xuráu formáronlu los escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García, Lluis Aique Iglesias y Henrique G. Facuriella, que fallaron el premiu nun actu celebráu na tertulia’l 23 de xunu del 2017.
El xuráu destacó, nel acta del fallu, «la maestría cola que l’autor resuelve una empresa tan ambiciosa como la de contar la historia del anarquista Buenaventura Durruti ensin perder de vista al home que la historia convirtiera nun símbolu. Tres d’esti trabayu narrativu, onde Álvarez fai rescamplar el so dominiu del asturianu pa facer llegar al públicu la historia al traviés d’un llinguaxe contemporaneu, apréciase un llabor de documentación rigorosu, que mete dafechu al llector na trama y lu conecta colos sos protagonistes».
El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu na seronda d’esti mesmu añu. Esta ye la sesta vez que’l grupu concede esti premiu. L’añu pasáu resultó ganadora la obra L’aire ente la rama, poemariu de la escritora Ángeles Carbajal, y, n’ediciones anteriores, premiáronse les obres Más espeso que l’agua, de Consuelo Vega; Carne de melandru, de Milio Rodriguez Cueto; La Chelita, de Ruma Barbero, y La ñeve del Cuquiellu, de Xabiero Cayarga. Con esti gallardón, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu.
Lluvia d’agostu (Hoja de lata, 2016) tien como filu conductor la historia de Buenaventura Durruti, símbolu del anarquismu ibéricu, dende 1923 –fecha del atracu al Bancu d’España en Xixón– hasta’l 20 de payares de 1936, cuando la muerte convierte al home nun mitu. Cincuenta años más tarde d’esa fecha, una periodista francesa marcha a la busca de respuestes que la ayuden a esclariar el misteriu de la so muerte. Nesta historia ye la que somorguia al llector Francisco Álvarez, que desenvolvió un llabor intensu de documentación histórica pa escribir una novela que yá algamó, nel 2015, el XXXVI Premiu Xosefa Xovellanos, qu’entrega’l Gobiernu d’Asturies.
Francisco Álvarez (Xixón, 1970) ye periodista, traductor lliterariu y autor de delles obres como Patiu de prisión (VTP, 1998), En poques pallabres (Trabe, 1998), Dixebra, cróniques d’un pueblu (L’Aguañaz, 2003), Historia de cinco goles. El Mundial de ‘El Guaje’ (La Cruz de Grado, 2010), Rumbo a la Historia. Navíos emblemáticos de todos los tiempos (Seronda, 2011), La tierra de la libertad. Crónica de los derechos humanos y civiles en el mundo (Seronda, 2012) y Un país llamáu Dixebra. La historia y les lletres de la banda decana del rock n’asturianu (Seronda, 2013).
Tamién tradució al asturianu la novela de Leonardo Sciascia Una historia cenciella (Seronda, 2012) y, del italianu al castellanu, les noveles Lobos frente al mar, de Carlo Mazza (Seronda, 2013); Memoria del vacío, de Marcello Fois (Hoja de Lata, 2014), y Choque de civilizaciones por un ascensor en Piazza Vittorio, d’Amara Lakhous (Hoja de Lata, 2016). Fonte: asturnews.com
26/6/17
El Sporting B recupera plaza en Segunda B
Sporting B - Beasain en Mareo, Xixón, semeya obra de Cristian López García.
Tres derrotar en Mareo por 5-2 al Beasain (7-4 nel global). L'ascensu del conxuntu roxiblancu permite al Valdesoto, al Manuel Rubio y al Unión Astur el dar un saltu de categoría.
Un añu duró la travesía del Sporting B pela Tercer División. Con un equipu mui renováu con respeuto al que baxó l'añu pasáu y con xente bien mozo, José Alberto López consiguió devolver al filial roxiblancu a la Segunda División B, l'oxetivu únicu de la temporada.
Tres firmar una lliga regular espectacular, los roxiblancos tuvieron que siguir la vía llarga del ascensu tres perder la eliminatoria de campeones con un Olot que nun demostró ser superior a los xixoneses. El siguiente rival del Sporting B foi otru filial, el del Almería, teniendo que xugase'l saltu a la categoría de bronce del fútbol estatal col Beasain en Mareo tres empatar a dos goles na ida.
El partíu comenzó de cara pa los de José Alberto, cuando l'árbitru señalaba un penalti por mano nel minutu 5 que conllevó una espulsión rigurosa. Claudio anotaba'l primeru de la tarde y Jon Aranda tomaba'l camín de vestuarios práuticamente inéditu.
Con diez tol partíu
Claudio volvió a ver puerta nel 16 y la eliminatoria parecía sentenciada, pero'l Beasain nunca-y perdió la cara al partíu y Jon Ander foi más llistu que Nacho Méndez y anotó'l 2-1 nel minutu 38, tres intentar sacar rápidu'l sportinguista una falta na frontal del área propia. Sicasí, Pablo Fernández consiguía marcar enantes del descansu y dar tranquilidá al equipu.
Otra vegada Jon Ander, nel 59, superaba a Dani Martín y ponía'l mieu nel cuerpu a los aficionaos qu'abarrotaben Mareo –colgóse'l cartelu de 'entraes escosaes'–, ente ellos a un grupín llegáu de Valdesoto cola esperanza de que'l so equipu compitiera l'añu próximu en Tercera, pa lo que yera necesariu un ascensu roxiblancu. Un tantu vascu daba la eliminatoria al Beasain.
Y los guipuzcoanos tuvieron ocasiones pa ello, anque foi Claudio, l'héroe del partíu, el qu'acabaría cola incertidume al anotar nel 85 el so tercer tantu. Rubén, nel añadíu, redondería'l resultáu pa poner un definitivu 5-2.
Felicidá, poro, en Mareo, Valdesoto y otros puntos de Xixón, yá que l'ascensu del Sporting B provocó tamién el de dos equipos xixoneses: el Manuel Rubio, a preferente, y l'Unión Astur, a Primera Autonómica. Fonte: asturies.com
25/6/17
DOS ESCRITORES NORTEAMERICANOS
Semeya John Cheever: Rba
Vicente García Oliva
Lleo agora, siguíos, a dos grandes escritores norteamericanos que siempre me prestaron. Una ye una novela de John Cheever que se titula “Bullet Park” y otra ye la rellectura del famosu cuentu llargu -o novela curtia- de Carson McCullers “Balada del café triste”. Fícelo asina porque al terminar el primer llibru entendí qu’había munchos parecíos entre dambos estilos y ente los ambientes que los dos escritores (escritor y escritora) emplegaben nes sos obres. Y creo que pue dicise que ye asina.
Lleo agora, siguíos, a dos grandes escritores norteamericanos que siempre me prestaron. Una ye una novela de John Cheever que se titula “Bullet Park” y otra ye la rellectura del famosu cuentu llargu -o novela curtia- de Carson McCullers “Balada del café triste”. Fícelo asina porque al terminar el primer llibru entendí qu’había munchos parecíos entre dambos estilos y ente los ambientes que los dos escritores (escritor y escritora) emplegaben nes sos obres. Y creo que pue dicise que ye asina.
La novela de Cheever ye, en realidá, como un de los cuentiarios a los que nos tien acostumaos. “Bullet Park”, anque tien un filu conductor y unos personaxes que siguen el desarrollu de la novela, nun son sinon la tapadera pa cuntar munchas más histories provinientes d’otros personaxes que los arrodien. Válen-y al autor pa rellatanos unos minicuentos, dacuando costumistes y cuasi siempre asombrosos, que nada tienen que ver col filu argumental de la historia. Podíemos tar lleendo, por exemplu, “Fall River”, que fue’l llibru de cuentos que lleí enantes d’ésti, del mesmu autor. Diz la propaganda de la editorial que “narra la historia de una familia amenazada por la violencia en la tranquilidad de los barrios residenciales”. Bueno, igual ye que nun lleímos la mesma novela. Esa amenaza de la que falen produzse nel últimu capítulu y ye una chifladura que causa más risa que mieu. Como cuasi tolo qu’asocede, ye dalgo estravagante y poco creyible, a nun ser porque Cheever cuéntatelo con tal seriedá que dices: “Va, igual pudo pasar”. Pero lo que sí son creyibles son les descripciones de los paisaxes, de los sentimientos de les persones, de les soledaes qu’arrastria la xente, de la incomunicación neses pequeñes urbanizaciones de clases medies/altes onde nun sabes si ye meyor conocer al vecín o non conocelu.
Semeya Carson McCullers: biblioklept.org
El rellatu de la McCullers -espléndidu na so rellectura- llévanos tamién a esos pueblos de l’America profunda onde nunca nun pasa nada, y cualquier cosa que se sal de la rutina, del vezu, ye amirao como un acontecimientu del que tol mundu opina y, d’un o otru mou, vive. Tamién equí los personaxes son un poco paródicos y estravagantes, tanto la señora Amelia como’l despecháu Marvin Macy y nun digamos del pequeñu gorrumbu Lymon, que se convierte nel verdaderu protagonista de la historia. Pero lo que más me maraviya son les descripciones espaciales y temporales que fai l’autora Georgiana: esi pueblu triste, marxináu, camín de nengún sitiu, onde la xente desplázase a ver les cuerdes de presos que pasen a unos kilómetros d’elli a trabayar na carretera, porque ye l’unicu entretenimientu que tienen. Esos anocheceres del veranu calurosu y sofocante, o esos riscares onde’l fríu iviernu llanta les sos manes atereciendo los miembros de los que salen de casa. Riques descripciones de paisaxes y paisanaxes que s’amiesten colos de John Cheever pa ufiertanos un frescu d’una parte importante del so País. Dos grandes escritores norteamericanos que nun hai que dexar de lleer. Fonte:trabayudecampu.com
Vicente García Oliva ye miembru de númberu de l'Academia de la Llingua Asturiana
Un Club de Llectura n’Asturianu pa escolinos, iniciativa pal cursu viniente
Llibros infantiles
La Direición Xeneral de Planificación Llingüística y Normalización va poner en marcha un Club de Llectura n’Asturianu pal cursu 2017-2018. Va tar destináu tanto a escolinos y escolines de Primaria como de Secundaria y Bachilleratu.
Los centros van poder solicitar títulos que trabayar de la llista que va proporcionar Planificación Llingüística, con 15 a 25 exemplares de cada obra. Mientres 30 a 45 díes, van tar n’empréstamu pa la so llectura por parte de los alumnos de Llingua Asturiana y Gallego-asturiano.
D’esta forma preténdese fomentar la llectura ente los escolinos y, al empar, avezalos a tratar con testos na so llingua materna. Los maestros, nel trimestre caberu del cursu, van participar nuna xornada didáutica na que van presentar toles actividades feches sobre caúna de les llectures presentaes pol alumnáu. Fonte: asturies.com
24/6/17
El Centro Asturiano de Lausanne celebra'l so festival intercélticu
Nesta sesta edición participa Cerezal, que va compartir escenariu con Kepa Junkera, amás de delles agrupaciones asturianes.
Lausanne va mirar a Asturies esta fin de selmana gracies al VI Festival Intercéltico, qu'entama'l centru asturianu d'esta población suiza. Una carpa instalada na Place de la Navigation va acoyer tolos eventos programaos pa mañana y pal domingu y, al empar,compartir la cultura, la gastronomía y la artesanía asturiana colos habitantes de la ciudá qu'acoyó a la emigración asturiana.
Sicasí, esti festival tamién s'abre a otros llugares, incorporando pa esta edición artistes gallegos, vascos o castellanos. Los madrilanos Boys of the Hills van encargase d'abrir los conciertos de mañana a les 19.30 hores, pa siguir depués col bilbaín Kepa Junkera y finar, a les 22.30 hores colos asturianos Cerezal.
El domingu, a les 11.30 hores, va celebrase’l desfile de bandes de gaites peles cais de la zona d’Ouchy. Darréu va haber actuaciones individuales de la Banda Gaites Villa de Mieres (13.30 hores), Perendengue (14.15 hores), l’Asociación Cultural Galega A Roda de Lausanne (15 hores), Agrupación Folklórica El Pericote de Llanes (15.45 hores), Esbardu (16.30 hores) y la Escuela d’Asturianía (17.15 hores). Fonte: asturies.com
El día de San Xuan, salen les xanes a baillar
Foguera de San Xuan de Cimavilla, Xixón, 2016
Cientes de fogueres van prender n’Asturies na medianueche d'esti vienres pa celebrar San Xuan. La nueche más máxica del añu, na que'l fueu y l'agua son protagonistes, ufre munches opciones d'ociu a lo llargo de tol país. ¿Cuála te presta más?
La mayoría de ciudaes y pueblos d'Asturies –al igual que munchos munchos barrios– tienen preparaes pa esta nueche fogueres pa celebrar el solsticiu de branu –realmente foi nel pasu del día 20 al 21, pero la Ilesia católica treslladó esta celebración pagana pa coincir con San Xuan Bautista– y quemar los augurios malos. Esta tradición de raigaños celtes que recibía’l nome d’Alban Heruin y na que se fai cultu al sol y al agua al traviés del engalanamientu de fontes, ta entovía mui viva nel país.
Amás ye l’únicu momentu d’atopar la flor d’agua, que sal per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes.
La foguera más multitudinaria ye la qu’entama’l Conceyu de Xixón na sablera d’El Natahoyo, qu’esti añu va contar cola presencia de l’actuación de Blus Probes, la banda del televisivu Alberto Rodríguez. La celebración principia a les 21 hores –enantes, a les 20 hores, van baillar Los Xustos na Plaza Italia– col enramáu de la fonte de Pelayo por parte d’Andecha de Cultura Tradiciona Na Señardá y va siguir nel escenariu de la sablera coles actuaciones de la Banda Gaites Noega (22.45 hores) y la Banda Gaites Villa de Xixón (23.15 hores).
A la medianueche, tres el prendíu de la foguera, va tener llugar la danza prima y el llanzamientu de fueos artificiales. Otros barrios de la ciudá, como Ciares, Mareo, Cimavilla o La Calzada en L’Arbeyal, tamién celebren esta nueche máxica nun ambiente más vecinal.
Otres celebraciones
Una cita clásica ye de la Corvera, en Tresona, la nomada 'Foguera d'Asturies', qu’estrena’l títulu de Fiesta d’Interés Turísticu Autonómicu, pero que dende hai unos años dio un xiru y alloñóse un tantu de la tradición al incorporar una orquesta y caltener la fiesta de música electrónica. La folixa, dedicada esti añu a la minería, va principiar a les 22.30 hores con un ‘Conciertu a la Deva’ protagonizáu por Bras Rodrigo, pa depués dar pasu a un espectáculu de Producciones Nun Tris, tamién de temática alredor de la mina. Tres el prendíu d’una foguera especial a medianueche, la celebración va siguir con un 'Conciertu a Belenos' con Dixebra y la orquesta Clan Zero.
Mieres, mentes, celebra les sos fiestes de San Xuan, y Uviéu entama la foguera otru añu onde la Catedral, con un ritual máxicu dende les 23 hores. En L'Entregu, el Centru Social Autoxetionáu La Semiente organiza la foguera del pueblu nel prau xunto al campu de fútbol y una queimada popular, que se ve reforciada nesta ocasión con un festival de música dende les 20.30 hores con Salón Bombé y UHP, enantes del prendíu con un conxuru sobre la corrupción, y La Tarrancha y Skontra, depués.
Coincidiendo con esta xornada, ponemos a disposición de los nuesos llectores el reportaxe sobre San Xuan pa neños y neñes de la nuesa seición infantil ‘A la gueta los suaños’ con refranes sobre esta fecha máxica. Ésti ayudará a los más pequeños de la casa a comprender meyor les razones d'esta celebración tan prestosa. Tamién van poder disfrutar del cuentu animáu 'L'encantamientu' que se desendolca en San Xuan. Fonte: asturies.com
23/6/17
González Riaño sustitúi a Ana Cano na presidencia de l’ALLA
Xosé Antón González Riaño y Ana María Cano
Ayeri, xueves 22 de xunu de 2017, llueu de fináu’l mandatu de 4 años de los cargos direutivos de l’Academia de la Llingua Asturiana, Xosé Antón González Riaño sostituyó na presidencia de la institución a Ana Cano que ya manifestare va tiempu la so decisión de nun repetir como presidenta.
Tres de finar el mandatu d’anguo, esti xueves féxose’l procesu eleutoral nuna Xunta na que darréu d’ello salió escoyida la direición siguiente:
-Presidente: Xosé Antón González Riaño1 -Vicepresidenta: Marta Mori d’Arriba. -Secretariu: Xosé Ramón Iglesias Cueva. -Vicesecretaria: Carme Muñiz Cachón. -Ayalgueru: Carlos Lastra López.
L’anterior Presidenta, Dra. Ana María Cano González (Caderalga de Filoloxía Románica de la Universidá d’Uviéu) diere anuncia a l’ALLA va unes selmanes del so determín de nun volver presentase a la reeleición, llueu de 4 mandatos nel cargu.
L’Academia de la Llingua Asturiana, nun comunicáu asoleyáu eti vienres quier sorrayar y agradecer fondamente “l’escomanáu llabor desendolcáu pola direición anterior nos ámbitos sociales y de normativización del idioma, al empar que da anuncia del so enfotu por siguir nuna xera qu’ha empobinar, ensin dulda, hacia’l llogru de la oficialidá de la llingua hestórica de tolos asturianos y asturianes”.
Talamente como se diz na nota de prensa asoleyada esti día pola Academia de la Llingua, Xosé Antón González Riaño ye somedanu de xeneraciones, anque nacíu en Viella-Siero (1956), y maestru y pedagogu. Profesor Titular de la Universidá d’Uviéu, institución na que se doctoró en 1993 con una Tesis sobre la interferencia llingüística escolar ente asturianu y castellán –investigación qu’algamó’l Premiu Estraordinariu de Doctoráu–, imparte docencia nel Departamentu de Ciencies de la Educación.
La so especialización docente ya investigadora xira al rodiu de la metodoloxía de la enseñanza de les llingües, el billingüismu escolar, los aspeutos sociollingüísticos y socioeducativos arreyaos a la presencia escolar de les llingües, les rellaciones ente la enseñanza llingüística y la interculturalidá, les condiciones de deprendizax de les llingües minoritaries (con especial procuru na situación del asturianu), ente otres. Acordies con esti enclín investigador, dirixó, hasta agora, 6 tesis doctorales que, en tolos casos, fueron calificaes cola máxima puntuación.
Miembru de númberu de l’Academia de la Llingua Asturiana dende 1987, yera Vicepresidente de la institución y Responsable del Programa de Formación de la mesma. Al empar, foi l’entamador y direutor de la coleición académica “Estaya Pedagóxica”, onde s’espublizaron 20 volúmenes rellacionaos con anovaciones didáutiques pa la enseñanza del asturianu nos centros educativos Ye autor d’un centenar de publicaciones científiques (ente llibros, capítulos de llibros, artículos y actes de congresos). Dalgunes de les sos aportaciones espublizáronse en revistes d’impactu nel ámbitu internacional (Francia, Reinu Xuníu y Estaos Xuníos, ente otros países). En 2005 el Ministeriu d’Educación y Ciencia d’España concedió-y, xunto cola Dra. María Louzao, el Premiu Nacional d’Investigación Educativa. Fonte: asturnews.com
González Riaño releva a Cano na presidencia de l’Academia de la Llingua Asturiana
Ana María Cano y Xosé Antón González Riaño nel 2015
Xosé Antón González Riaño, hasta agora vicepresidente de l’Academia de la Llingua Asturiana (ALLA), resultó escoyíu como presidente de la entidá tres la decisión d’Ana María Cano de nun presentase a la reeleición. “Ye un gran honor”, afirmó’l profesor universitariu, que cita la interlocución social p'algamar la oficialidá como retu del so mandatu.
D’esta forma Xosé Antón González Riaño conviértese nel cuartu presidente de l’ALLA dende la so creación nel 1980, tres Xosé Lluis García Arias (1980-2000), Miguel Ramos Corrada (2000-2001) y Cano (2001-2017). “Ye un gran honor, depués de toda una vida dedicada a la cuestión llingüística y más de 25 años na Academia. Y tamién representa una gran responsabilidá siguir la llinia marcada polos presidentes anteriores, figures relevantes de procesu de recuperación llingüística”, declaró la nueva figura visible de la institución académica a Asturies.com.
Según informó, la decisión de Cano de nun siguir nel cargu depués de cuatro mandatos yá la conocía dende hai tiempu, anque’l determín de l’hasta agora presidenta nun se dio a conocer ente los miembros de l’ALLA hasta hai unes selmanes. El procesu eleutoral, nel que votaron los académicos de númberu, celebróse ayeri, siendo la única persona que sigue de la direición pasada l’ayalgueru Carlos Lastra.
Marta Mori ye la nueva vicepresidenta, mentes que Xosé Ramón Iglesias Cueva pasa a ocupar la secretaría que dexara Roberto González-Quevedo. La vicesecretaria nueva, mentes, ye Carme Muñiz Cachón, cargu que tenía hasta agora Urbano Rodríguez Vázquez.
Los retos del mandatu
Entrugaú polos oxetivos del so mandatu, González Riaño refirióse a “dos grandes retos”. “Nel planu llingüísticu-académicu, siguir avanzando na normativización del idioma”, apuntó, mentes que “nel planu social, facer d’interlocución social pa solucionar la cuestión eterna de la oficialidá”.
Otra manera, sobre la situación que fixo peligrar el futuru de l’ALLA al nun ser reconocida como entidá pública, el presidente aseguró que la solución definitiva ta cercana y va ser finalmente al traviés d’un decretu por parte del Conseyu de Gobiernu qu’afite’l so status públicu nos estatutos, según-y treslladaron dende l’Executivu. Fonte: asturies.com
22/6/17
Agua y fueu na Nueche (xixonesa) de San Xuan
Foguera de San Xuan na sablera de Poniente
Llega la nueche más máxica del añu. Ésta ye una fecha enforma especial pa celebrar el solsticiu de branu y que destaca pola quema de fogueres y l'enramáu de fontes.
La foguera más multitudinaria que veremos en Xixón ye la qu’entama’l Conceyu na sablera d’El Natahoyo,
L'aniciu de la celebración va ser con musica y baile del país na Plaza d'Italia a partir de les 20h. cola Agrupación Folclórica Los Xustos, pa entamar a les 21 hores col enramáu de la fonte de Pelayo por parte d’Andecha de Cultura Tradiciona Na Señardá y va siguir nel escenariu de la sablera coles actuaciones de la Banda Gaites Noega (22.45 hores) y la Banda Gaites Villa de Xixón (23.15 hores).
A la medianueche, prendíu de la foguera, y dempués va tener llugar la danza prima y el llanzamientu de fueos artificiales. La celebración finará cola actuación del grupu Blus Probes.
Otros barrios de la ciudá, como Ciares, Mareo, Cimavilla o La Calzada en L’Arbeyal, tamién celebren esta nueche máxica nun ambiente más vecinal.
Esta ye una de les celebraciones más importantes nel calendariu festivu y el solsticiu de branu va tamién a festexase con fogueres en dellos barrios y parroquies del conceyu como Contrueces, Ciares, Viesques, Tremañes, Mareo, La Calzada, La Camocha y Cimavilla. Ye importante destacar les fiestes en Mareo, que van durar tol fin de selmana, con actividaes deportives, festives y conciertos.
Una nueche máxica onde va poder atopase la flor d’agua, que sal per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes, como diz el refrán 'El día de San Xuan, salen les xanes a baillar'
Fonte: yexixon.com
Fonte: yexixon.com
Acusen a Bob Dylan de plaxu nel so discursu pal Nobel de Lliteratura
Na imaxe d'arquivu, Bob Dylan
El cantautor Bob Dylan foi acusáu esta fin de selmana de plaxar partes del so discursu d’aceptación del premiu Nobel de Lliteratura del pasáu 4 de xunu, nel que supuestamente utilizó dellos fragmentos de frases de la páxina web Sparknotes.
Les acusaciones fueron arramaes pola revista estadounidense Slate dempués de qu’una de les sos reporteres analizara les palabres utilizaes pol cantante pa describir na so alocución la novela “Moby-Dick”, una obra de referencia pa Dylan.
La periodista Andrea Pitzer narra nel artículu de Slate que detectó que delles de les frases de Dylan nun formen parte de la novela, pero sí s’asemeyen enforma a la sinopsis sobro la obra qu’apaez na páxina web Sparknotes, qu’ufierta a los estudiantes esplicaciones y resumes de numberosos llibros.
“Nes 78 frases del so discursu que Dylan dedica a la descripción de Moby-Dick, una inspección rápida revela que más d’una docena d’elles paécense enforma a les llínees de la web de SparkNotes”, afirmó la reportera. “Y munches comparten frases clave como ‘el deséu de vengación de Ahab’ que nun apaez na novela de Moby-Dick”, amestó Pitzer nos sos comentarios.
Slate espón nel so artículu toes estes frases, y destaca que Dylan apurrió’l so discursu a la organización de los premios Nobel poco primero de cumplise la fecha llende impuesta, tres la que se-y apurriría los 923.000 dólares de pagu. Amás, la publicación recuerda que l’artista ye conocíu por utilizar material d’otres persones nos sos cantares. Fonte: asturmews.com
La ordenanza de Llaviana inclúi la creación d’una comisión de siguimientu
Plenu de Llaviana
El Plenu de Llaviana aprobó por unanimidá la Ordenanza Municipal d’Usu de la Llingua Asturiana. El testu, que va pasar agora a esposición pública, incorpora una comisión de siguimientu que va axuntase de manera añal pa velar pol so cumplimientu.
Cola ausencia d’un conceyal del PSOE, otru d’Izquierda Xunida (IX) y el de Foro, la ordenanza d’asturianu presentada pol equipu de gobiernu socialista salió alantre colos votos a favor de tolos grupos municipales, incluyíu’l Partido Popular (PP). Ésta nació d’un borrador propuestu pol ciudadanu llavianés René Durán, que Somos Llaviana presentó a toles fuercies.
“Los primeros colos que nos reunimos foi con IX, que presentaron delles propuestes pal testu. Llueu, con estes modificaciones, axuntamos con Foro y el PP, que vieron bien el documentu, polo que quedó asina”, esplica Unai Castaño, voceru de Somos Llaviana. Tres el Plenu de febreru del 2016 l’equipu de gobiernu comenzó a trabayar col borrador presentáu, “pero quedó la cosa parada hasta finales d’añu”, recuerda.
El martes, finalmente, aprobóse en Comisión el testu definitivu, “que ye’l que presentó’l PSOE con aportaciones del nuesu borrador”, y que s’aprobó de manera inicial ayeri nel Plenu. Agora, tres la próxima espublización nel BOPA, pa la presentación de posibles alegaciones enantes, va tornar a la Casa Conceyu pa la so aprobación definitiva. Fonte: asturies.com
Alba Quintas protagoniza tercer sesión del Club Xuvenil de Llectura esti sábadu 24
Alba Quintes nel Club Xuvenil de Llectura d'Avilés, esti sábadu
Esti sábadu 24 de xunu, a les 18 hores na Sala Allegro del Hotel 40 Nudos d’Avilés, va tener llugar la tercer sesión del Club Xuvenil de Llectura d’Avilés. Esti mes la escritora convidada ye Alba Quintes Garciandia qu’amás del so llabor d’autora, imparte talleres d’escritura narrativo.
L’autora va falar col públicu asistente sobre les últimes publicaciones de lliteratura xuvenil y sobre el procesu creativu. El Club, impulsáu pola Conceyalía de Cultura, cuntó cola participación de medio centenar de mozos en caúna de les sesiones celebraes hasta la fecha.
El Club, impulsáu pola Conceyalía de Cultura, tien una periodicidá mensual y siempres ta lideráu por un autor o autora destacaos nel ámbitu de la cultura xuvenil (booktubers o similar). Les dos primeres xuntes, encabezaes por Sebas G. Mouret ya Iria G. Parente, cuntaron con cerca de medio centenar d’asistentes en cada unu de los alcuentros, lo que demuestra la bona acoyida que ta teniendo’l Club.
Na sesión del sábadu, Alba Quintes Garciandia va faer una repasada de les actuales publicaciones y va centrar la conversación en cómo nos últimos años incorporáronse a la lliteratura xuvenil temes como’l bullying y la depresión, antes secundarios. Tamién va intercambiar esperiencies respecto al procesu de creación lliteraria. Cuando termine la conxusta, l’autora va tar disponible para roblar los sos llibros.
Alba Quintas Garciandia
Alba Quintes Garciandia, nacida en Madrid en 1994, ye autora de novela, poesía y teatru y graduada n’Humanidaes pola Universidá Carlos III de Madrid. Empezó la so carrera como escritora de lliteratura xuvenil cuando ganó’l Premiu Internacional Jordi Sierra i Fabra cola novela Al otru llau de la pantalla (SM), que se publicara en 2012 y darréu traducióse al alemán.
Un añu dempués publicó Globe y en 2015 recibió’l Premiu Estraordinariu nel certame de La Caixa/Plataforma Editorial por La moza del lleón negru (Plataforma Neo). La so novela más recién, La flor de fueu (Nocherniega, 2017), ta basada na matanza de Columbine y trata d’analizar el morbo col que se trató la tema amás d’esquizar la frontera entre ficción y realidá. Na actualidá trabaya venceyada al mundu del teatru ya imparte talleres d’escritura narrativo. Fonte: asturnews.com
21/6/17
El Plenu de Llaviana aprobará la ordenanza d’asturianu
Ayuntamientu de Llaviana. Semeya obra de Denis Soria baxo llicencia CC BY-SA 4.0
Esti miércoles, a les 19 hores, va celebrase’l Plenu de Llaviana, onde ún de los puntos del día ye l’aprobación inicial de la Ordenanza Municipal d’Usu de la Llingua Asturiana del conceyu. René Durán ye l’impulsor d’esta iniciativa que xestionó Somos Llaviana.
Esti ciudadanu llavianés, que vien trabayando dende hai dos años na convocatoria del premiu lliterariu infantil El Xarabatu, contautó cola candidatura de xunidá popular pa presentar un borrador d’ordenanza cola posibilidá de que lu treslladaren al restu de grupos municipales. “Tomé como base la de Ḷḷena y adaptéla a les necesidaes del conceyu”, esplica Durán.
D’ello hai yá un añu y cuatro meses, recibiendo’l preste tanto d’Izquierda Xunida (IX), PP y Foro, y llevándolo Somos Llaviana a Plenu pa que l’equipu de gobiernu del PSOE se fixera cargu del mesmu. Pese a que s’aprobara la redaición de la mesma, l’asuntu quedó paráu hasta que saltó la polémica pola situación del Serviciu de Normalización Llingüística, agora –y hasta fin d’añu– ensin subvención, esternalizáu y con 8 hores d’actividá selmanal.
“Les reuniones que caltuvimos cola conceyala pol tema del SNL sirvieron pa reactivar l’asuntu y ayeri yá se presentó’l testu definitivu –tres dalgunes modificaciones a partir del primer borrador– en Comisión, que va güei a Plenu”, rellata Durán, que cuenta con que salga alantre la so aprobación inicial con consensu. Depués espublizaráse nel BOPA pa la presentación de posibles alegaciones enantes de l’aprobación definitiva en Plenu.
La mayoría nel Conceyu de Llaviana tienla’l PSOE, con 8 conceyales, siendo’l segundu partíu con más representación IX, con 4. Somos Llaviana cuenta con 2, al igual que’l PP, mentes que Foro tien 1. Fonte: asturies.com
Abiertu'l plazu pa mandar poemarios pal premiu Fernán Coronas
El poeta asturiano padre Galo Antonio Fernández "Fernán Coronas"
Cadavedo 7.08.1884 - Luarca 28.01.1939
Les creaciones pueden unviase hasta'l día 18.
La Sociedad Popular, Recreativa y Cultural La Regalina vien de convocar la ventena cuarta edición del Premiu de Poesía en Llingua Asturiana Fernán Coronas. Nél pueden participar toes aquelles persones que nun resultaran vencedores n'años anteriores que presenten poemarios inéditos escritos n'asturianu con un mínumu de 275 versos.
El plazu pa unviar trabayos fina'l martes 18 de xunetu y han de presentase en formatu Word o .PDF al corréu electrónicu splaregalina@gmail.com, roblaos con un nomatu. Nun archivu axuntu, han d'incluyise los datos personales (nome, teléfonu, señes, DNI y títulos presentaos al concursu) pa consultar nel casu de que'l xuráu escueya una de les obres como la ganadora.
El premiu del Fernán Coronas tien una recompensa de 900 euros, amás de la espublización del mesmu, y va dase a conocer nun actu públicu en Cadavéu'l 7 d'agostu, coincidiendo col aniversariu del nacimientu del Padre Galo, nome real del poeta. El ganador de la edición anterior foi Inaciu Galán con 'Nes ruines de la nueche y les hores'. Fonte. asturies.com
| Adxuntu | Tamañu |
|---|---|
 Bases del XXIV Premiu de Poesía en Llingua Asturiana Fernán Coronas | 90.36 KB |
20/6/17
“HAYQUE”
"Hayque"
Por Vicente García Oliva, miembru de númberu de l'ALLA
Analía tien perdíu’l so verdaderu nome, agora namás respuende al de “Hayque”, porque tolos llabores desagradables que se faen en casa tóquen-y a ella: “Hay que buscar agua”, “Hay que barrer”, “Hay que ir a comprar viveres al colmado”… La neña garra’l calderu, la escoba o la bolsa de la compra y cumple colo que se-y manda, porque so madre y so güela tienen otres munches coses que facer, los hermanos van a escuela y tienen deberes y so padre… bueno, ye so padre.
Pero Analía tamién tien suaños. Suaña coles estrelles que ve espeyaes nel recipiente del agua, y suaña con dir ella tamién a escuela porque sabe que ye llista, que se-y dan bien los números y que’l día de mañana querría ser una persona con un oficiu, y non llevar la vida de trabayu y resignación de les muyeres de la casa. Y por eso un día “Hayque” plántase…
Preciosu llibrín de la escritora dominicana Virginia Read Escobal, responsable de la “Asociación Cultural Lleva un libro en la maleta”, que trabaya colos más desfavorecíos del so país, llevando llibros y material escolar pa escueles, biblioteques y clubs de llectura, ellí onde los neños y neñes nun tienen más qu’unes alpargates y un vestidín pa facer frente a la vida. El llibru ta editáu por “Loqueleo”, versión dominicana de la editorial Santillana, y los cenciellos dibuxos qu’acompañen al testu son de Ruddy Núñez. Una ayalguina. Fonte: trabayudecampu.com
Grau y Candamu van compartir dende xunetu un serviciu de normalización llingüística
Grau
El Conceyu de Grau y el de Candamu, tres una propuesta de la Direición Xeneral de Planificación Llingüística y Normalización, van trabayar xuntos pa la normalización del asturianu nos dos territorios. En xunetu va echar andar un SNL común.
Güei ye’l día caberu pa la presentación de solicitúes pa participar nel concursu-oposición pa la plaza convocada de Téunicu Mediu responsable del Serviciu de Normalización Llingüística conxuntu de Grau y Candamu. La persona qu’algame’l puestu va trabayar hasta’l 31 d’avientu a media xornada, 3 díes en Grau y 2 en Candamu, según l’alcuerdu qu’algamaron los dos conceyos teniendo en cuenta la población de dambos.
Candamu
“Ye un pasu mui importante”, esplica José Luis Suárez Arias, conceyal de Cultura, Turismu, Emplegu y Desarrollu Llocal de Candamu, “yá que permitirá traducir la páxina web y facer tornes de tolos documentos y cartelos”, amás de la posibilidá que van tener los vecinos p’acceder a los sos servicios. Entovía nun hai fecha pa qu’eche a andar el SNL, “anque esperemos que sía a primeros de xunetu y, sin nun se pudiera, a mediaos del mes”.
La toponimia, pendiente de l’aprobación por parte del Conseyu de Gobiernu
L’espediente d’oficialización toponímica de Candamu pasó yá la fase d’esposición pública ensin recibir nenguna alegación por parte de vecinos o asociaciones. Asina, tres cumplir esti trámite, namái queda pendiente que’l Conseyu de Gobiernu apruebe’l decretu y qu’ésti s’espublice nel BOPA pa que la toponimia tradicional de Candamu sía la oficial nel conceyu, dalgo que s’espera qu’asoceda nun periodu curtiu de tiempu. Fonte: asturies.com
Suscribirse a:
Entradas (Atom)