Agua y fueu na Nueche (xixonesa) de San Xuan

Foguera de San Xuan na sablera de Poniente

 Llega la nueche más máxica del añu. Ésta ye una fecha enforma especial pa celebrar el solsticiu de branu y que destaca pola quema de fogueres y l'enramáu de fontes. 

 La foguera más multitudinaria que veremos en Xixón ye la qu’entama’l Conceyu na sablera d’El Natahoyo,

 L'aniciu de la celebración va ser con musica y baile del país na Plaza d'Italia a partir de les 20h. cola Agrupación Folclórica Los Xustos, pa entamar a les 21 hores col enramáu de la fonte de Pelayo por parte d’Andecha de Cultura Tradiciona Na Señardá y va siguir nel escenariu de la sablera coles actuaciones de la Banda Gaites Noega (22.45 hores) y la Banda Gaites Villa de Xixón (23.15 hores).

 A la medianueche, prendíu de la foguera, y dempués va tener llugar la danza prima y el llanzamientu de fueos artificiales. La celebración finará cola actuación del grupu Blus Probes.

 Otros barrios de la ciudá, como Ciares, Mareo, Cimavilla o La Calzada en L’Arbeyal, tamién celebren esta nueche máxica nun ambiente más vecinal.

 Esta ye una de les celebraciones más importantes nel calendariu festivu y el solsticiu de branu va tamién a festexase con fogueres en dellos barrios y parroquies del conceyu como Contrueces, Ciares, Viesques, Tremañes, Mareo, La Calzada, La Camocha y Cimavilla. Ye importante destacar les fiestes en Mareo, que van durar tol fin de selmana, con actividaes deportives, festives y conciertos.

 Una nueche máxica onde va poder atopase la flor d’agua, que sal per un instante colos primeros rayos de sol de la mañana según la lleenda, trayendo amor, belleza y salú al que da con ella. Tamién ye la nueche na que les xanes salen de les sos cueves, siendo posible veles nes fontes, como diz el refrán  'El día de San Xuan, salen les xanes a baillar'
                                                                                                                     Fonte: yexixon.com

La plaza de la Catedral acueye la foguera de San Xuan

Foguera de San Xuan y el baille de la Danza Prima

  La tradicional foguera de San Xuan celebraráse esti martes 23 de xunu na plaza de la Catedral d'Uviéu magar les crítiques per parte de la ilesia asturiana y de la división de dellos coleutivos y vecinos del Uviéu Antiguu. La última vez que se celebró nesta ubicación foi nel 2006.

  Ésta ye una de les primeres midíes, a propuesta d'IU, qu'adoptó el nuevu alcalde de la ciudá, el socialista Wenceslao López, dempués de que lu nomaren rexidor col apoyu de Somos Uviéu (Podemos) y d'IU'l pasáu 13 de xunu.

  El corazón de la capital acueye los actos festivos, p'adultos y neños. A les nueve de la noche va haber actuaciones de grupos de baille en delles places del Uviéu Antiguu hasta les 23:30 hores, hora na que está previstu l'entamu del espectáculu "Hechixo de la noche de San Juan", que va a correr a cargu del Grupu Teatru Marxe, na plaza de la Catedral.
   A les doce de la nueche, nel mesmu escenariu, va procedese al tradicional prendíu de la Foguera, na que va incluyir el baille de la Danza Prima, colos Grupos "Trasgu", "Fitoria" ya "inmaculada".

  El Campillín va a acoyer la programación infantil, que va entamar a les 16:00 hores, con xuegos infantiles, paptinaxe, pionza y el pañuelu, ente otros, nos que va collaborar l'Asociación Vecinal del Uviéu Redondo. A les 19:00 hores , el Grupu Teatru Factoría Norte va ofrecer l'espectáculu "Mitoloxía de San Xuan.                                                                               Fonte: europapress.es/asturianu

Enramáu de la fonte de Pelayo, Xixón, na Plaza del Marqués

Fonte: asturies.com

La foguera de San Xuan fala asturianu en L'Entregu

   La llingua asturiana ta cuasi siempres presente nes celebraciones de San Xuan, pero hai llugares onde ye dafechu la única llingua vehicular. Ye'l casu de L'Entregu, donde va ser el quintu añu siguíu que’l coleutivu La Semiente entama la Foguera de San Xuan. Como dicen na so anuncia, "yá tán buscando la madera, y preparando les actividaes lúdiques, como los pasacais, la música, el “conxuru escontra la Llei Mordaza”.. y si otres veces la temática de la Foguera trató temes como'l de la llucha minera, la represión, la llei del albuertu, el machismu…, anguaño la protagonista ye La Llei Mordaza, que se va empezar a aplicar ya en xunetu y que ye una vuelta de tuerca mas al retayu nos nuesos drechos y llibertaes civiles, tanto individuales como coleutives".

   Anque cunten cola collaboración de distintes vecines pal Enrrame Les Fontes o tamién pa contribuyir apurriendo madera y muebles vieyos, animen a toa persona que quiera pase estos día pela zona de l'actividá p'arimar el llumbu y llevantar una bona Foguera. Al coleutivu La Semiente gustaría-y dicir, que la so intención "yera la de faer una programación mas curiosa na edición d'anguaño, pero la coxuntura d'atopase somorguiaos no que ye l'adecuación del nuevu local al que se treslladen, la 5ª Campaña de Recoyida de Llibros y Material Escolar, y les distintes movilizaciones sociales nes que tán meties, como, ente otres, los preparativos de la manifestación Contra la Llei Mordaza pal el 30 de Xunu, faen que nun puedan centrase enforma en l’ampliación del programa de La Foguera".

   Animen a toles vecines de L’Entregu y contorna a sumase la nueche del 23 a la celebración del cambéu de solsticiu, a potenciar una tradición enllena de maxa y a faelo dende un puntu de vista críticu y reivindicativu. Como tolos años va haber una queimada gratuita pa tol mundu y tamién va haber un chigrín pa l'autoxestión d'esta y otres actividaes.                                Fonte: asturnews