Grau y Candamu van compartir dende xunetu un serviciu de normalización llingüística

• . L’espediente d’oficialización toponímica de Candamu entra na fase d’esposición pública

Grau

El Conceyu de Grau y el de Candamu, tres una propuesta de la Direición Xeneral de Planificación Llingüística y Normalización, van trabayar xuntos pa la normalización del asturianu nos dos territorios. En xunetu va echar andar un SNL común.

Güei ye’l día caberu pa la presentación de solicitúes pa participar nel concursu-oposición pa la plaza convocada de Téunicu Mediu responsable del Serviciu de Normalización Llingüística conxuntu de Grau y Candamu. La persona qu’algame’l puestu va trabayar hasta’l 31 d’avientu a media xornada, 3 díes en Grau y 2 en Candamu, según l’alcuerdu qu’algamaron los dos conceyos teniendo en cuenta la población de dambos.

Candamu

“Ye un pasu mui importante”, esplica José Luis Suárez Arias, conceyal de Cultura, Turismu, Emplegu y Desarrollu Llocal de Candamu, “yá que permitirá traducir la páxina web y facer tornes de tolos documentos y cartelos”, amás de la posibilidá que van tener los vecinos p’acceder a los sos servicios. Entovía nun hai fecha pa qu’eche a andar el SNL, “anque esperemos que sía a primeros de xunetu y, sin nun se pudiera, a mediaos del mes”.

La toponimia, pendiente de l’aprobación por parte del Conseyu de Gobiernu

L’espediente d’oficialización toponímica de Candamu pasó yá la fase d’esposición pública ensin recibir nenguna alegación por parte de vecinos o asociaciones. Asina, tres cumplir esti trámite, namái queda pendiente que’l Conseyu de Gobiernu apruebe’l decretu y qu’ésti s’espublice nel BOPA pa que la toponimia tradicional de Candamu sía la oficial nel conceyu, dalgo que s’espera qu’asoceda nun periodu curtiu de tiempu.                   Fonte: asturies.com

“El Gobiernu ha de regular l’estatus xurídicu de l’ALLA”, afirma García

Na semeya, Nicanor García

“Nun creemos que la proposición de llei que presenta IX sía la meyor forma de regular l’estatus xurídicu de l’ALLA. Ye’l Gobiernu’l qu’ha de regulalu”, afima Nicanor García, voceru de Ciudadanos na Xunta Xeneral. El futuru de la institución académica ta nel aire.

La vía escoyida por Izquierda Xunida (IX), una proposición de llei pa modificar l’artículu 2 de la Llei 5/1997 d’Academies pa que se-y reconoza’l so estatus d’institución de Derechu Públicu d’Asturies adscrita a la conseyería que lleve les competencies de Cultura, nun cuenta col apoyu de Ciudadanos. “Esti tipu de proposiciones apruébense y llueu nun se cumplen y nun valen pa nada”, señala García, que considera qu’ha de ser el Gobiernu’l responsable de modificar l’estatus xurídicu de l’Academia de la Llingua Asturiana (ALLA).

Esta modificación de los estatutos de la institución académica al traviés d’un decretu del Conseyu de Gobiernu qu’afitaren la so naturaleza xurídica pública sería la vía más rápida de les trés que se manexen anguaño. La tercera ye la creación d’una llei específica pa l’ALLA, como se fixo na Comunitat Valenciana cola Acadèmia Valenciana de la Llengua, pero ésta allargaríase nel tiempu.

“L’Academia tien que siguir tando y hai que potenciala”, asegura García, que demanda al Executivu socialista “un estatutu que-y dea validez”, siempre dientro de la Llei d’Usu y Promoción del Bable/Asturianu.                                                                  Fonte: asturies.com

IX va apelar na Xunta sobre la especialidá d'asturianu

   El grupu parlamentariu d'IX na Xunta Xeneral fizo ayeri l'anuncia de que'l xueves próximu va apelar a la Conseyera d'Educación sobre la especialidá d'asturianu. Na sesión del xueves, el grupu va apelar a la Conseyera d'Educación, Cultura y Deporte sobre la promoción del asturianu, más en concretu sobre la reconocencia de la especialidá de llingua asturiana pal profesoráu.

   L’anuncia de la Conseyería d'Educación de que va solicitar al Ministeriu d’Educación la especialidá docente de Llingua Asturiana fízose ya nel mes de mayu y dende entós nun hebo novedaes, siendo enforma criticada polos sindicatos por contrastar colo que consideraben un maltratu permanente a la materia.

   El grupu parlamentariu d'IX na Xunta Xeneral va llevar tamién esta selmana al plenu del próximu vienres una Proposición Non de Llei na qu'encamienta al Conseyu de Gobiernu a modificar el so alcuerdu de mayu de 2013 pol que s'aprueben modelos de clausules sociales nel ámbitu de contratación pública pa promover l'emplegu d'otres persones con dificultaes particulares d'insertamientu nel mercáu llaboral amás de les que sufran dalgún tipu de discapacidá, tal que fixeron otres alministraciones públiques. IX pretendi, como esplicó Aurelio Martín, favorecer a les ONG´s na contratación pública y la contratación de persones con discapacidá.

   Na sesión del xueves, el grupu va apelar a la Conseyera d'Educación, Cultura y Deporte sobre la promoción del asturianu, más en concretu sobre la reconocencia de la especialidá de llingua asturiana pal profesoráu.                                                                                        Fonte: asturnews.com