23/11/15

García Oliva gana'l VIII María Xosefa Canellada col últimu episodiu de la so triloxía 'Fontenebrosa'

Na semeya Vicente García Oliva, académicu de númberu de l'ALLA

 L'escritor Vicente García Oliva ye'l ganador de la edición 2015 del premiu de lliteratura infantil y xuvenil n'asturianu María Xosefa Canellada, que convoca la Conseyería de Cultura del Gobiernu asturianu. Consiguiólo cola so obra 'Fontenebrosa III: el final', capítulu caberu de la so triloxía sobre aquel país imaxinariu pobláu por races y seres mitolóxicos, implicaos en continuos conflictos ente'l bien y el mal. 
 Nesti últimu episodiu de la triloxía, descríbese una Fontenobra degradada, invadida por nuevos y perversos seres, mientres los sos pobladores orixinarios, sobreviven arrequexaos y escondíos. Esti nuevu trabayu premiáu llega 31 años dempués del primer capítulu, 'Fontenebrosa: el reinu de los silentes', publicáu en 1984, y seis dempués del segundu, 'Fontenebrosa II: la rebelión de los homosaurios', ganador del premiu Montesín de narrativa Infantil y Xuvenil.
 L'autor aseguró que yá nun habrá una cuarta parte, pues el filu narrativu de les trés histories, el personaxe de la xana Ermesinda, ta ya mayor y atristayada "a ver cómo s'esbarrumba'l so pueblu".
 Preguntáu por si inclúi estes tres obres dientro de la narrativa épica fantástica, potenciada nel so día cola versión cinematográfica de 'El señor de los anillos' y de moda otra vuelta cola serie 'Canción de hielo y fuego', l'escritor respondió afirmativamente, pero matizando: "son histories d'aventures, guerreros, valientes, amores, pero siempre col conflictu de valores de fondu, la llucha ente'l bien y el mal". Un mal representáu en Fontenebrosa, principalmente, pola raza de los güercos, palabra mitolóxica asturiana que l'autor utilizada pa dar nome a la so versión de los 'orcos'.
 A esti gallardón, dotáu con 3.000 euros, podíen presentase obres de lliteratura infantil o xuvenil, con independencia de que se tratara de noveles, compilaciones de cuentos, obres de teatru o poemarios, siempre que los testos fueren inéditos y tuvieren una estensión mínima de doscientos cincuenta versos pa la poesía y de trenta páxines a espaciu doble pa los demás xéneros.
 El xuráu encargáu de valorar los ocho trabayos presentaos tuvo formáu polos escritores y especialistes en lliteratura infantil y xuvenil Lourdes Álvarez García, María Teresa González, José Luis Remis y María Xosé Rodríguez; l'alcalde de Cabranes, Gerardo Fabián, y Alonso Zamora, fíu de la escritora María Josefa Canellada.   Fonte: asturias24.es

7 comentarios:

  1. Oliva ye un trabayador nato.

    ResponderEliminar
  2. L'escritor y académicu Vicente G. Oliva ye un asturianista con muncho mérito dende va munchos años. Norabona pol merecíu premiu.

    ResponderEliminar
  3. La lliteratura infantil y xuvenil ye'l gran eslabón que conecta y prepara al llector pa siguir lleendo d'adultu, d'ende la so vital importancia. Y García Oliva ye una firme valladar nesti xéneru.

    ResponderEliminar
  4. Hai dellos escritores a los que la Musa Inspiración píllalos siempres trabayando y esti autor ye unu d'ellos.

    ResponderEliminar
  5. Ye qu'amás ye un escritor n'asturianu de muncho altor.

    ResponderEliminar
  6. Entiéndese que por daqué ye académicu de la Llingua Asturiana.

    ResponderEliminar

Los comentarios tán pendientes de moderación. Espublizaránse lo primero dable.