El
gobiernu municipal d’IX ta ellaborando un borrador de lo que va ser el
futuru Plan de normalización llingüística del conceyu, razón pola que la
coalición s’astuvo nel Plenu del xueves. La imaxe corporativa del
Ayuntamientu será n’asturianu.
Faustino Zapico, conceyal d’Izquierda Asturiana (IAS) tres l’alcuerdu
eleutoral algamáu pola formación nacionalista con Izquierda Xunida (IX)
en Mieres, esplicó a Asturies.com que-y sorprendió la
moción presentada la selmana pasada por Somos Mieres nes qu’esixía’l
cumplimientu de la topominimia oficial. “Presido la Comisión de
Servicios a la Ciudadanía y nun fixeron entruga nenguna de la
planificación llingüística, que depende de la comisión”, apunta.
En dicho Plenu, la moción de Somos Mieres salió alantre cola
astención de tolos grupos municipales, esto ye, IX, PSOE y PP. “Tamos
trabayando nel borrador d’un plan de normalización llingüística nel
conceyu y nel Plenu nun podíemos votar dalgo que se ta empezando a
facer. En contra nun tamos y a favor, tampoco, porque yá ye lo que se ta
faciendo”, argumenta Zapico. Dicho plan de normalización llingüística
podría tar preparáu nun mes y, según esplica’l conceyal, sería
ambiciosu.
“La imaxe corporativa del Conceyu va ser n’asturianu y non d’otra
manera”, adelanta Zapico, qu’añade que'l Plan tamién va buscar implicar a
les empreses nel usu de la toponimia oficial. D’igual forma van
treslladase a Estadística, posiblemente l’añu qu’entra, los nomes de
llugar oficiales dende’l 2009 pa que s’incoporen a la base de datos
estatal, dalgo que tendría un costu d’unos 12.000 euros y que nun se
fixo hasta agora por falta de presupuestu. “Nun pue ser que nuna
carretera comarcal ponga Uxo y na del Estáu, Ujo”, afirma.
Fonte: asturies.com
No hay comentarios:
Publicar un comentario
Los comentarios tán pendientes de moderación. Espublizaránse lo primero dable.