La XDLA noma de “ridículu, insuficiente y decepcionante” el proyeutu de presupuestos

“Un proyectu de presupuestos pal asturianu ridículu, insuficiente y decepcionante”. Con esti títulu asoleyaba la XDLA nes caberes horas d’esti xueves últimu de payares un duru comunicáu alrodiu de los presupuestos apautaos pol PSOE ya IX.

Depués de conocer el proyeutu de presupuestos pal 2016 pactáu pol PSOE y IX, la Xunta pola Defensa de la Llingua Asturiana (XDLA) nun podía más que “amosar el so descontentu coles cifres pa la política llingüística. Un presupuestu que supón el 0.04% del total de les cuentes asturianes ye ridículu, insuficiente y decepcionante-0,2% si namás se tien en cuenta la partida de la Conseyería d’Educación y Cultura, que ye la segunda con más presupuestu-, sobre manera cuando se fala de desarrollar el Plan de Dignificación del Asturianu aprobáu pola Xunta Xeneral y nun ta contemplada nenguna dotación económica p’aplicalu”.

Pala Xunta, hai quien dirá qu’en tiempos de crisis hai otres prioridaes, como l’emplegu o la educación,” pero hai que recordar que l’asturianu, amás d’un patrimoniu cultural que tenemos la obligación de preservar, pue xenerar una industria vinculada a la cultura que tamién supón puestos de trabayu y que, sobre manera, crea una marca de calidá y una imaxe cola que vender el territoriu nel esterior. Nun valen yá sides como la de la crisis económica, porque en tiempos pasaos tampoco se fixo la inversión que facía falta. Prestaríanos saber cuándo va ser el tiempu del asturianu, porque llevamos 40 años esperando por esi momentu. Hai que volver repetilo: les comunidaes más prósperes son les que fixeron l’apueste por valorar la so llingua propia y la cultura fecha nella”.

L’exemplu que pon la organización asturianista ye’l de la industria del castellanu, que supón un 15% del PIB del Estáu, mientres que nel País Vascu l’idioma xenera yá un 6,3% del emplegu (56.142 puestos de trabayu) y supón el 4.2% del PIB. Mentanto, la industria cultural n’asturianu ta condergada a la marxinalidá y precariedá: “nesti proyeutu de presupuestos recibe 220.000 euros, migayes en comparanza, por poner namás un casu de la mesma conseyería, colos cuasi 3 millones que se dediquen al deporte estacional del esquí nes instalaciones de Valgrande-Payares (que la mesma Alministración reconoz como deficitaries)”.

A pesar de lo que s’anunció, el proyeutu de presupuestos pal asturianu ye, na opinión de la Xunta Pola, “continuista cola xestión nefasta d’Ana González, Alejandro Calvo y Ana Fueyo -anteriores responsables de la Conseyería, Viceconseyería y Dirección Xeneral, respectivamente-, que na llexislatura pasada foron recortando y esmantelando lo poco que s’algamara hasta la fecha. Y ye que les partíes actuales nun son más qu’un corta y apega de los presupuestos anteriores. Mesmamente, nún de los puntos fálase de cumplir col Plan de Normalización Social del Asturianu, un plan que tuvo en vigor ente 2005 y 2007. Cuando entra en detalles nes midíes, vemos con decepción que ye más de lo mesmo: dizse que se va “fomentar progresivamente” l’usu institucional y públicu del asturianu y del gallego-asturianu. Llevamos 20 años “fomentando progresivamente” y ye abondo con sentir cualquier intervención pública de los conseyeros -inclusive’l propiu conseyeru d’Educación- o prender la RTPA pa ver en qué se traduz esa “progresividá”. Pallabres bones y vacies en favor del idioma, pero sentir falar n’asturianu, non”.

Y si ye decepcionante que se sigan empleando pallabres bones y vacíes, qué dicir del presupuestu dedicáu a la música n’asturianu “cuando ye un seutor qu’en festivales como Lorient o’l Liet Asturies ponse nel mapa mundial. Sicasí, namás va tener una partida de subvenciones pal añu de 20.000 euros, que, pa facese una idea de la ruindá de la cantidá, ye trés veces menos de lo que cobra un direutor xeneral”.

La XDLA reconoz qu’hai partíes pa servicios de normalización nuevos, “pero la Rede de Normalización nos Conceyos sigue ensin esistir con entidá xurídica y nun hai partíes pa que puean facer campañes; tampoco nun vuelven les ayudes al audiovisual n’asturianu, condergando a los cineastes comprometíos col nuesu idioma a depender d’una RTPA dirixida por xente qu’agora diz ser “partidario” del asturianu, pero qu’en cuatro años nun fixo nada por ello. El resultáu pue vese na programación del Día d’Asturies del FICXixón, onde yá nun hai curtios o documentales rodaos n’asturianu, cuando hai años llegaben a ser mayoría”.

Especialmente grave ye, na consideración de la organización de defensa del idioma, “qu’en tol proyectu de presupuestos nun haya nenguna referencia a la educación, alfabetización, formación del profesoráu o tresmisión interxeneracional del asturianu, cosa que sí se fai col inglés. Nesi sentíu, nun se pue dexar de llau que pal deprendimientu de llingües estranxeres hai una partida de 5.651.786 euros, lo que s’esfrona colos 1.570.664 pa la “promoción” de les nueses “modalidades lingüísticas” (sic), como define’l proyeutu de presupuestos al asturianu, atentando escontra la llexislación vixente asturiana y europea. Tampoco nun paez esistir l’asturianu pa la Universidá d’Uviéu, porque namás se contemplen ayudes pa deprender inglés nel estranxeru. L’asturianu, la llingua que por llei tien qu’investigar, enseñar, protexer y divulgar, nun cuenta. Quier dicise, qu’a pesar d’haber un apartáu nos presupuestos dedicáu a la Direición Xeneral de Planificación Llingüística, el Gobiernu, el PSOE y IX faen como que l’asturianu nun esiste fuera d’esi requexu: nun hai tresversalidá, dalgo que sí hai, por exemplu, nes polítiques p’acabar col llinguaxe sexista. Ye evidente qu’hai qu’educar na igualdá, pero tamién nel apreciu a la llingua propia”.

La falta de tresversalidá pue vese tamién n’otres direiciones xenerales de la mesma Conseyería d’Educación y Cultura  y “nin falar yá d’otres partes de l’Alministración, que nin respeten la llegalidá vixente en materia toponímica”. Asina, na cartera que dirixe Genaro Alonso “hai 110.000 euros pa mercar fondos pa les biblioteques públiques, pero nun se cita en nengún sitiu la esistencia de la lliteratura n’asturianu. Mesmamente, pa la execución d’aiciones de fomentu de la llectura esisten dellos órganos d’execución, que van dende l’alministración local al Muséu de Grandas pasando pel RIDEA, pero ehí nun apaez l’Academia de la Llingua Asturiana nin nengún otru organismu rellacionáu cola nuesa lliteratura. Hai que destacar tamién que, al revés de lo que pasa con otros organismos públicos como’l RIDEA (185.000 euros), la OSPA (5.000.000 euros), el Conseyu de la Mocedá -renomáu nos presupuestos como “Consejo de la Juventud”- (354.000 euros) o’l Conseyu Económicu y Social (758.000 euros) -consideraos nel proyeutu de presupuestu como entidaes autónomes con unos oxetivos marcaos-, l’Academia de la Llingua Asturiana (180.000 euros) sigue nun llimbu xurídicu y depende económicamente del presupuestu de la Direición Xeneral de Planificación Llingüística, cola mesma figura alministrativa, por exemplu, que’l Serviciu de Normalización de Llanera”.

Al empar, nel apartáu dedicáu al apoyu a les industries creatives, “fálase de les artes escéniques, de ciclos de cine, d’eventos culturales, del fomentu de la llectura, de danza, d’equipamientos nuevos… Too ello ensin facer referencia a la esistencia de la llingua asturiana y de l’actividá que xenera, polo que, siguiendo pel camín marcáu nos años anteriores, va actuase como si Asturies fora un país monollingüe, una provincia castellana más. Ta claro que nesti Gobiernu y na so Conseyería d’Educación y Cultura, una cosa ye la cultura, que ye dalgo tresversal, en castellanu, y que merez el compromisu de tol Executivu, y otra cosa ye l’asturianu y les sos cosines, que yá tien una Direición Xeneral pa entretienese neso”.

El comunicáu de la Xunta pola Defensa de la Llingua Asturiana nun pue más qu’insistir en que “la dotación presupuestaria pa la normalización del asturianu ye ridícula, insuficiente y decepcionante. Nun sería tan ridícula si hubiera tresversalidá, si les aiciones normalizadores tuvieren presentes en toles conseyeríes, pero yelo porque lo del asturianu sigue siendo cosa namás de la Direición Xeneral. Ye insuficiente porque con eses cantidaes, básicamente les mesmes de la llexislatura anterior, poca incidencia va haber na sociedá y na industria cultural n’asturianu. Y ye decepcionante porque depués del pautu PSOE-IX anunciárense aumentos sustanciales y compromisu presupuestariu… pero vemos qu’al final fíxose caldu. Con estos presupuestos tan probes, va tener qu’haber muncha planificación, pero normalización va haber bien poco“.

Fonte: Asturnews