La Universidá d’Uviéu punxo en marcha la versión asturiana de la so web

Pablo R. Guardado El rector Vicente Gotor anunciara’l xueves que sedría una realidá’l martes, pero la puesta en marcha de la versión n’asturianu de la web de la Universidá d’Uviéu adelantóse al plazu previstu. L’ALLA collaboró na torna del portal universitariu. D’esta forma, la web de la Universidá d’Uviéu yá se pue consultar nel idioma del país mediu añu depués de xubir a la rede la versión nueva d’ésta. El Conceyu Universitariu pol Asturianu (CUPA) denunciara a finales de marzu, tres la inauguración de la páxina, que’l portal universitariu namái taba disponible en castellanu y n’inglés, a lo que’l rector respondió que’esta situación se daba por un retrasu na torna al asturianu. El propiu Gotor anunciaba’l xueves pasáu, mientres el pieslle oficial de la Universidá Asturiana de Branu (UABRA), que la web en llingua asturiana sería una realidá’l martes, anque güei yá tán actives la mayor parte de les estayes de la versión asturiana. Nel actu celebráu nel paraninfu de la Universidá d’Uviéu, Ana María Cano, presidenta de l’Academia de la Llingua Asturiana (ALLA), institución que collaboró na torna, pidió al rector una visibilización mayor del idioma en tolos ámbitos universitarios. Una de les demandes vieyes de los coleutivos de defensa de la llingua ye la utilización del logotipu billingüe por parte de la Universidá, compromisu que s’alcuentra nel Alcuerdu Programáticu de Política Llingüística na Universidá d'Uviéu, y que se sigue ensin cumplir, como se pue comprobar na versión asturiana de la web. Fonte: Asturies.com