Iniciativa pol Asturianu pide a los gobiernos d'Asturies y España cumplir colos mandatos del Parllamentu Européu

Tres la cabera resolución del Parllamentu Européu sobre les llingües europees en peligru d'estinción y la diversidá llingüística na Xunión Europea, Iniciativa pol Asturianu quier amosar el so prestu por esta resolución y faer una llamada por un cumplimientu del documentu dafechu. Dende l'asociación señalen que "pesie de que l'Estáu español ye miembru de la Xunión Europea, y, pesie de que robló y ratificó la Carta Europea de les Llingües Rexonales o Minoritaries (ECRML), inda hai munches evidencies de la falta de compromisu del Gobiernu español pa col cumplimientu de toles resoluciones y aiciones llegales que s'esixeron al mesmu col enfotu de protexer y promover les llingües rexonales o minoritaries, especialmente no que cinca a aquelles qu'escarecen d'un estatus oficial, l'asturianu y l'aragonés". Amás dende Iniciativa destaquen "la indiferencia amosada poles Comunidaes Autónomes d'Aragón y el Principáu d'Asturies, faciendo casu dalo de toles llamaes del Conseyu d'Europa, el Parllamentu Européu y toles autoridaes rexonales, nacionales ya internacionales encamentando a una rápida rempuesta pa la preservación del so patrimoniu llingüísticu y el cumplimientu de les sos responsabilidaes llegales pa col asturianu y l'aragonés". Poro, recuerden "tantu al Gobiernu español como a toles Comunidaes Autónomes y los gobiernos llocales arreyaos que son los únicos responsables de la inconcebible ya imperdonable situación na qu'estos idiomes s’atopen anguaño, y píde-yos que pongan toles sos escuses y prexuicios a un llau d'una vegada por toes y se xunan a les sos comunidaes na llucha por revitalizar un llegáu de valir incalculable de tolos europeos". Asina, finen manifestando que "tal como establez esta nueva resolución del Parllamentu Européu, la meyor manera de revitalizar una llingua básase nuna fonda planificación y coordinación n'actividaes crítiques como la educación, los medios de comunicación, les nueves tecnoloxíes, l’alministración y toles formes de vida pública. Nesti sen, dende Iniciativa pol Asturianu queremos destacar el papel cimeru que toos estos elementos xueguen en caltener viva una llingua y reafitamos nel nuesu compromisu pa cola preservación y promoción de la llingua asturiana y la nuesa absoluta disposición a collaborar con cualesquier institución dimpuesta a asumir un papel más activu nesti duru pero fundamental llabor". Fonte: Infoasturies