La Eurocámara pide proteición pa evitar el desaniciu de les llingües minoritaries de la XE

BRUXELES, El plenu del Parllamentu Européu aprobó esti miércoles un testu que reclama fondos comunitarios y midíes específiques de los Estaos miembros pa protexer les llingües minoritaries de la Xunión Europea, como'l catalán y el vascu, p'asina favorecer el multillingüismu y evitar el so desaniciu. El documentu inclúi delles enmiendes promovidas por PNV y CiU, ente elles la idea de que la definición de llingües en peligru de desapaición contemple aquelles en zones tresfronterices que tean en riesgu "en parte del territoriu del que son propies, anque dispongan de proteición n'otres zones del continente, y tengan o non reconocimientu oficial". La eurodiputada del PNV Izaskun Bilbao celebró'l sentíu del votu porque considera que supón un llamáu d'atención a los Estaos miembros o rexones que "tán poniendo en peligru, coles sos polítiques, la supervivencia de llingües" nel so territoriu. Una alusión que Bilbao interpreta como una "referencia clara" a polítiques llingüístiques como les aplicaes por Francia y Navarra sobre'l vascu. La representante jeltzale na Eurocámara confió en que l'informe "ayude a despolitizar" el debate llingüísticu que, al so xuiciu, ta "enlleno de tópicos", polo que destacó que'l Parllamentu Européu ve nel multillingüismu qu'inclúi llingües minoritaries "un valor européu". El testu de la Eurocámara apunta que la diversidá llingüística y cultural ye ún de los pegollos fundamentales de la Xunión Europea y considera que "numberoses" llingües europees tienen que ser consideraes como llingües "amenazaes de desapaición", polo qu'encamienta a tomar midíes. Tamién pide a los Estaos miembros y a les instituciones europees que "sían más conscientes de la amenaza grave sobre'l futuru de numberoses llingües n'Europa" y reclamen esfuercios pa salvaguardar y afalar la diversidá del patrimoniu llingüísticu y cultural de la XE, por exemplu apoyando polítiques de salvaguarda nel senu de les comunidaes afectaes. Nesti sentíu, apuesten por emplear los fondos que dexe la XE nel periodu 2014-2020 pa apoyar estes llingües, al traviés de programes pa educación y formación, mocedá y deporte, los fondos estructurales y de cohesión o otros preseos rellacionaos coles teunoloxíes nueves y les plataformes multimeda. Amás planteen que la XE apoye los programes que dexen "l'alquisición de dos llingües maternes dende la infancia" porque va ayudar a la persona nel aprendizaxe ulterior d'otros idiomes y porque ufiertaría un respaldu concretu pa "revitalizar la tresmisión interxeneracional ellí onde tea amenaciada". Fonte: Europa Press