Iniciativa pol Asturianu denuncia nueves presiones pa evitar la matriculación en Llingua Asturiana

 Iniciativa pol Asturianu denuncia que siguen les presiones pa evitar la matriculación na asignatura deLlingua Asturiana y pon como exemplu l’IES Rosario Acuña de Xixón “onde se presionara a una familia pa que’l so fíu nun siga en Llingua Asturiana en Bachilleratu”.

 Un cursu más dende Iniciativa pol Asturianu siguen recibiendo denuncies de families que dan lluz sobre les práctiques illegales qu’entá esisten en dellos centros educativos d’Asturies y qu’amenorguen la presencia de l’asignatura d’asturianu. Y nesta ocasión, una familia de Xixón vieno acabante avisar de “les presiones recibíes dende la xefatura d’estudios del IES Rosario Acuña pa que’l so fíu nun se matriculare na asignatura de Llingua Asturiana, que’l rapaz lleva tol procesu educativu cursando. La familia recibió una llamada presionando pa que nun se matriculare al menor, al ser el so fíu, según el centru, l’únicu alumnu matriculáu na asignatura en bachilleratu, presionando pa que cambiare la so elección”.

 Recibida la denuncia n’Iniciativa pol Asturianu asesaren a la familia sobre la normativa vixente, y tres informar al centru y dar avisu de que s’interpondría una denuncia, el centru a la fin almite la matriculación del alumnu. Dende Iniciativa pol Asturianu quieren “denunciar esti fechu como un verdaderu ataque al drechu de les families y l’alumnáu a poder cursar l’asignatura Llingua Asturiana en tolos niveles educativos. Recordamos a les families que pasen per procesos asemeyaos a esti, que munches vegaes nun denuncien, que ye importante dalos a conocer y que tienen drechu a que los sos fíos estudien asturianu en tolo niveles”.

 Dende Iniciativa pol Asturianu amás d’esti nuevu casu de represión llingüística “denuncien otra vuelta les condiciones nes que s’atopa l’asignatura de Llingua Asturiana, especialmente en Bachilleratu, onde la Conseyería d’Educación recortó de 4 a 1 hora selmanal l’asignatura, faciendo que garrar l’asignatura suponga tener que garrar otres asignatures complementaries que completen l’horariu. Esiximos a la Conseyería que recupere les cuatro hores nesti nivel y que la inspección faiga’l so trabayu y vixile que nun asocedan casos como’l denunciáu”.                                                    Fonte: asturnews.com

Izquierda Xunida reclama "enseñanza pública y llaica”

Piden que la relixón tea fuera del currículu escolar

La plana mayor d'IX asturiana

La Área Federal d'Educación d'esta formación considera “un pequenu pasu, pero una meyora importante” la recién sentencia que refuga l'ampliación de les hores de l'asignatura de Relixón como esixe la xerarquía de la Ilesia católica. Izquierda Xunida, al traviés de la so Área Federal d'Educación, reclama que la enseñanza de la relixón quede fuera del currículu escolar, que sala del horariu llectivu, desapaezan los actos y la simboloxía relixosa de los centros escolares y de los espacios públicos educativos, amás de la eliminación de cualesquier procedimientu alministrativu qu'obligue a manifestar les creencies o non creencies, en cumplimientu del artículu 16 de la Constitución.   IX repite la necesidá de la derogación del concordatu ente l'Estáu español y el vaticanu, y con cualesquier otra confesión que prime alcuerdos d'estes característiques.   Izquierda Xunida felicítase y considera “un pequenu pasu, pero una meyora importante” el respaldu llegal collecháu pol amenorgamientu al mínimu llegal dexáu de les hores d'enseñanza relixosa aplicáu pol Gobiernu d'Asturies. Esta decisión foi respondida por pol Tribunal Cimeru de Xusticia d'Asturies (TSXA), que refugó'l contenciosu del Arzobispáu d'Uviéu nel que pidía suspender el decretu del Executivu asturianu que regula'l currículu de Bachilleratu.   Nuna nota de prensa asoleyada esti vienres, Izquierda Xunida diz que "la xerarquía de la Ilesia católica nesta comunidá quéxase de qu'en Secundaria se discriminaba l'asignatura de Relixón con un horariu mínimu en rellación col restu de materies, amás de considerar qu'en 1º de Bachilleratu se imposibilita la so “llibre eleición” y qu'en 2º nin siquiera va ufiértase. La Conseyería d'Educación asturiana defende que concedió a esta asignatura'l mínimu dexáu pola LOMCE. Ello ye que en Ceuta y Melilla, territorios nos que la educación depende direutamente del ministeriu, la carga horaria de Relixón ye inclusive menor".   Izquierda Xunida aboga por derogar la LOMCE impuesta pol Gobiernu del PP nesta llexislatura y garantizar “una educación llaica que respete la llibertá de conciencia, eduque ensin dogmes y esanicie del currículu escolar toa forma d'adoctrinamientu”.                               Fonte: Asturnews

IX repite na Xunta'l sofitu a impantar bachilleratu en Zarréu

Rincón de Zarréu

   El grupu parlamentariu d'IX vieno acabante repetir el sofitu a l'Asociación de Madres y Padres de Zarréu que demanden la implantación del primer cursu de bachilleratu pal próximu cursu escolar. María José Miranda, vicepresidenta de la Xunta, y la diputada Concha Masa caltuvieron un alcuentru esta mañana con una representación de los padres, encabezada pola presidenta de la AMPA, Susana Marentes, acompañaos de representantes de la'AMPA de Bual, que conxuntamente con otres asociaciones pretenden formar una AMPA de colexos rurales en toa Asturies.

   María José Miranda recordó qu'IX yá sofitó a los padres de Zarréu al traviés d'una Proposición Non de Llei que s'aprobó na llexislatura apocayá rematada y va recuperar esa iniciativa de manera urxente, que foi votada por tolos grupos salvu pol PSOE.

   Na opinión d'IX "la Conseyería niega la implantación del bachilleratu en Zarréu por una cuestión económica, amontar la plantiya en dos profesores a media xornada y unu de matemátiques a xornada entera, cuando'l beneficiu pal conceyu de Degaña ya Ibias sería enforma mayor, y evitaría a los neños tener que treslladase tolos díes hasta l'institutu de Vil.lablinu, cruciando un puertu de monte de 1.400 metros, qu'en dómines ivernices fai que los neños pierdan ente 1 y 2 meses al añu de clases. Esti pidimientu, que Marentes xulga nada escabarriáu beneficiaría a ente 10 y 12 alumnos mientres el cursu próximu, d'un total de 100 neños qu'agora estudien en Zarréu". 
Fonte: asturnews

Denuncien que "la Conseyería d'Educación sigue quitando al alumnáu de Bachilleratu la posibilidá d'estudiar Llingua Asturiana"

Reclamen que se cumpla la llei y s'aseguren los drechos del alumnáu.

Como yá ye vezu nos principios de cursu n'Asturies, l'incumplimientu de les lleis, los recortes y la privación del derechu a estudiar asturianu al alumnáu que lo solicita vuelven a marcar l'axenda nun sistema educativu que mantién en situación de marxinación y marxinalidá a la llingua asturiana.

Si esta situación ye estensible a toles etapes educatives, hai que reconocer qu'una de les etapes onde la situación ye más llaceriosa ye nos dos años de Bachilleratu, onde'l porcentaxe del alumnáu que ye quién a facer valir los sos derechos y poder dar l'asignatura ye casi inesistente (poco más de 200 d'ente 10.000).

Esta situación dexa bien claro la nula intención de la Conseyería d'aplicar l'espíritu de la Llei d'Usu. Resulta demoledor viniendo d'un equipu saliente que, nin siquiera nel principiu del so últimu cursu, tien el más mínimu xestu conciliador y positivu pa colos derechos de les persones que soliciten estudiar asturianu.

Un bon númberu de persones, centros y asociaciones de padres y madres, dende Samartín del Rei Aurelio a Xixón y Mieres, tán faciendo llegar a la Xunta pola Defensa de la Llingua Asturiana denuncies d'estos impedimentos, ensin qu'hasta la fecha la Conseyería demostrara tar faciendo dalgo pa iguar esta situación.

Por eso dende la XDLA reclamamos a la Conseyería d'Educación que tome les midíes necesaries pal cumplimientu de la llei y p'asegurar el derechu del alumnáu a recibir formación n'asturianu en tolos centros educativos y en tolos niveles.

Fonte: Infoasturies

L'AMPA del IES J.J. Carlos Miguel denuncia que l'alumnáu de bachiller nun podrá estudiar asturianu

La mengua horaria del profesoráu impidirá a alumnos y alumnes de bachilleratu cursar asturianu nesti centru sotrondianu.

L'Asociación de Pás y Más del IES J.J. Calvo Miguel vien de dirixise a la Conseyera d'Educación denunciando que la mengua d'horariu del profesoráu d'asturianu va a impedir al alumnáu de bachilleratu d'esti centru cursar l'asignatura de Llingua Asturiana. Esti retayu ye de más de la mitá del horariu, y dende l'AMPA nun entienden que se prive d'estudiar asturianu a un alumnáu que lleva cursándolu dende Primaria, tal como espeyen.

Ye por ello que l'asociación de pás y más d'esti centru asitiáu en Sotrondiu considera necesario caltener la ufierta de l'asginatura en toles etapes educatives. Poro, consideren que'l tratu al asturianu nun puede ser marxinal, y menos entá cuando cunta con una demanda perimportante, como ye'l casu d'esti centru educativu.

Por too ello, demanden que se caltengan les hores llectives del profesoráu pa garantizar que tol alumnáu puea estudiar llingua asturianu ensin les torgues que, añu a añu, priven d'estudiar esta asignatura a dellos miles d'alumnos y alumnes per tol país.

Fonte: Infoasturies