14/3/16

Pablo Suárez García y Xosé Antón Suárez Puente nomaos nuevos académicos correspondientes


 Según s’asoleyaba esta mañana nuna nota de prensa, la xunta estraordinaria de l’Academia de la Llingua Asturiana fecha’l pasáu xueves 10 de marzu, aprobó por unanimidá la propuesta de nomamientu de dos nuevos académicos correspondientes, los doctores D. Pablo Suárez García y D. Xosé Antón Suárez Puente.

Caricatura de Pablo Suárez García con su Quixote traducíu al asturianu 
  Pablo Suárez García (Udrión-Trubia, 1973) ye Llicenciáu n’Inxeniería Superior de Telecomunicaciones, en Matemátiques y en Filoloxía Hispánica; Doctor en Filoloxía pola Universidá d’Uviéu y Especialista en Filoloxía Asturiana. Ye autor de traducciones al asturianu y ediciones crítiques d’obres como’l Tirán el Blancu, coeditáu cola Acadèmia Valenciana de la Llengua, Proses profanes y la Tragédia de Caldesa de Joan Roís de Corella. Tamién ye’l traductor de la versión al asturianu d’El Quixote de Miguel de Cervantes. Collaborador d’esta Academia, participa nes «Xornaes Internacionales d’Estudiu» y foi premiáu en delles ocasiones nos Concursos d’Investigación de la institución.
El científicu ya investigador asturianu Xosé Antón Suárez Puente
  Xosé Antón Suárez Puente (Uviéu, 1971) ye Doctor en Bioloxía y miembru destacáu del Institutu Universitariu d’Oncoloxía de la Universidá d’Uviéu que dirixe’l profesor Carlos López Otín. Suárez Puente emplega davezu l’asturianu en conferencies y seminarios de divulgación de los avances científicos del IUOPA. Asina mesmo, ye traductor de programes informáticos al asturianu, como’l navegador Firefox, y gracies al so llabor llogróse la reconocencia per parte del comité ISO del códigu ISO-639 pa la llingua asturiana (ast), requisitu indispensable pa la so reconocencia n’Internet. Collaborador d’esta institución, ye miembru del Comité d’Espublización de la revista dixital Ciencies. Cartafueyos asturianos de Ciencia y Teunoloxía, editada pola Universidá d’Uviéu y esta Academia, y onde tien asoleyaos dellos artículos.
  Los dos nuevos correspondientes serán nomaos el próximu 6 de mayu, XXXVII DÍA DE LES LLETRES ASTURIANES.                                                     Fonte: asturnews.com

4 comentarios:

  1. Dos nuevos de los meyores na primer llínia. La oficialidá aportará, de xuru.

    ResponderEliminar
  2. La mayor norabona pol so nomamientu como miembros de númberu de l'ALLA a dambos baluartes de les lletres asturianes nestos momentos. Y agora a lluchar con denuedo pola oficialidá.

    ResponderEliminar
  3. La bona xuventú asturiana fala y trabaya n'asturianu.

    ResponderEliminar
  4. Son el puntal de lo meyor de los esponentes asturianos na actualidá. Xente asina fai muncha falta nesta tierra abandonao y escaecío nel extrarradio norte de la península que nun cunta pa nada nin pa naide nes élites polítiques madrilanes.

    ResponderEliminar

Los comentarios tán pendientes de moderación. Espublizaránse lo primero dable.