Nun perder la memoria

Publicao por Vicente García Oliva | en Lliteratura | el 01-03-2016

 

"Asturies, memoria encesa d'un país"

  La presentación d’un nuevu númberu de “Asturies, memoria encesa d’un país” debiere ser un acontecimientu  gociosu qu’axuntara a un bon grupu de xente interesao na nuestra cultura. Esa cultura milenaria de la que dalgunos presumimos y qu’atropa temes de ñaturaleza, d’historia, d’etnoloxía, d’arquiteutura popular y sacra, de relixón o creencies, de lliteratura y pensamientu… De too ello  hai siempres nesta modélica revista asturiana que dende Xunu de 1996 (va pa venti años) vien aportando estudios rigurosos y, al empar,  divulgativos p’arriquecimientu del nuestru Patrimoniu Inmaterial. Los que la fain (Lombardía, Paredes, Álvarez Sevilla, Nachu LLope, Gausón, Berto Peña…) nun cobren nada por ello y la cosa funciona con una modesta subvención autonómica y les suscripciones y ventes de la propia revista. Poques comunidaes podrán presumir d’una revista tan guapa, per dientro y per fuera, como esta “Asturies...”

  Como yera d’esperar, conociendo al personal, nel Club de Prensa de La Nueva España de Xixón yéremos media docena de persones. Nun ye una metáfora, contéles: seis persones. Igual ye munchu esfuerzu pa tan pocu resultáu. Pero, en fin, ellí tuvieron acompañaos por Luismi Piñera, Berto Álvarez Peña y Javier Cubero, ayenos al desaliendu, desplicándonos el conteníu d’esti númberu 35 tan enllenu de suxerentes artículos como los anteriores.

  Asina, pasen peles sos páxines trabayos de Fernando Montes (Los estuarios: ecosistemes onde xorrez la vida. Les ríes asturianes, llugares d’abellugu pa les aves acuátiques); de Xuan Pedrayes Obaya (Entamu históricu del espaciu astur: del castru a la villa/aldea del sieglu XI); de Cristobo de Milio Carrín (Los monstruos del inframundu ya l’infiernu de los ástures); de Rogelio Ruiz Fernández y Macario González Astorga (Apuntes so la ilesia de San Pedru Ferreros y los sos oríxenes. La Ribera, Asturies; de Alfonso Fanjul, Javier Sánchez, Olatz Cordero y Patricia Argüelles (La Edá d’Oru de la cerámica de Faro: les producciones vidriaes de Ca Xuanín (s. XVII-XVIII); del direutor del Pueblu d’Asturies, Juaco López Álvarez (Memoria gráfica d’Asturies: les semeyes estereoscópiques de Celso Gómez Argüelles); de Berto Peña ( Esconxuros y práutiques máxiques contra la tona n’Asturies); de Carolina Pelaz Soto ((La vide ya’l vinu en Cangas del Narcea, patrimoniu cultural material ya inmaterial); del grupu formáu por Carlos Nores, Adrián Vigil Gausón Fernande y Alberto Álvarez Peña (Nueves anuncies sol llobu cerval n’Asturies). 

Juan Vázquez de Mella y Fanjul, natural de Cangues d'Onís

  Pa finar, nel apartáu “L’estoxu”, hai un mui prestosu trabayu del historiador Javier Cubero al rodiu de la figura del ideólogu asturianu Vázquez de Mella, faciendo una crítica de l’antoloxía editada  pola Xunta Xeneral del Principáu, a cargu de Julio Aróstegui. Cubero señala les importantes carencies esistentes, tanto na presentación del personaxe, como de la propia antoloxía, qu’escaeció poner los testos escritos en clave asturiana, ye dicir, los que tienen rellación col movimientu rexonalista n’Asturies, nuna coleición que precisamente lleva por títulu Clásicos Asturianos del Pensamiento Político, lo que fadría pensar que cincara a temes dafechamente rellacionaos cola propia Asturies. Nesti casu nun asocede asina. En resumiendo, una mui prestosa presentación, acompañada de les semeyes ilustratives de los testos, que fizo la delicia de los que tuvimos la suerte de tar ellí. Pocos, eso sí.                                              Fonte: trabayudecampu.com
. Vicente García Oliva ye miembru de númberu de l'ALLA