Nació en La Güerta, en La Güeria Carrocera, nel 1946, pero con un añu yá marchó a vivir a Bimenes. Trátase de Xuacu García Gutiérrez, alcalde del conceyu yerbatu per venti años (1979-1999), y políticu que declaró la oficialidá nel 1997.
¿Cuándo empezó vusté en política?
Cuando estudiaba na Universidá d’Uviéu na Facultá de Lletres nel 1966. Ellí me xunté al Partido Comunista na organización universitaria del partíu. Nesi tiempu tuvi los primeros alcontrones cola Policía, repartu d’octavielles, manifestaciones…, sobre manera contra la guerra de Vietnam.
Pasen aquellos años y llega la democracia…
Yo siempre tuvi nel partíu, nel ‘Comité Rexonal’… Alcuérdome de cuando tuvimos una reunión clandestina enantes de la democracia con Santiago Carrillo, que nos citaron nel Hotel Reconquista pa dicinos nel últimu momentu’l llugar. Al final foi en La Gruta (rises).
Acabé la llicenciatura en Xeoloxía na Universidad de Zaragoza, onde tuvi los mios episodios, con detención y tortura. Metiéronme na cárcel de Torrero, onde hebo munchos políticos presos y onde conocí a presos d’ETA. Cuando acabé vine a Bimenes pese a que trataron de convenceme de dir a trabayar a Barcelona. Yo quería tornar a Asturies y volví a casa, col mio padre y la mio madre, y siguí lluchando dende ellí.
Depués llegó la llegalización del PCE y formé parte del Comité de L’Entregu, porque Bimenes pertenecía a la zona del Valle del Nalón, hasta que depués cambiamos pa Siero. Llueu llegaron les primeres eleiciones municipales, nel 79.
Que ganó vusté en Bimenes.
Quedamos empataos el PSOE y el PCE en númberos de conceyales, 4 cáun, y 3 UCD, pero sacamos más votos y, por mor del pautu entes les dos formaciones d’apoyar al partíu con más votos, salí escoyíu alcalde.
¿Cómo foron aquellos primeros años?
La mio llegada foi una auténtica revolución. Los funcionarios del ayuntamientu, dalgunos enchufaos, pensaben “un comunista agora”… Recuerdo que les eleiciones foron en marzu y el cursu empezaba en xunu. Llegamos al Ayuntamientu y nel salón de plenos había pupitres de los neños que diben a escuela porque’l colexu tuviera n’obres y faltaben-y los muebles. Y asina facíemos los plenos (rises mientres fai un xestu coles piernes de nun tener espaciu).
Tuvi que mover l’asuntu, porque’l cursu diba a comenzar pronto, y llamé a la Delegación d’Educación a Uviéu. Dixéronme qu’había que pidilo y yo solicite-yos que lo pidieran. “Si lo pidimos nosotros van tardar muncho” contestaron, asina que tuvi qu’encargame yo. En dos selmanes llegaron los camiones con muebles de València y encargué a tolos funcionarios del ayuntamientu, y a los conceyales que quixeran venir, que foran a descargar los muebles. Y ehí fuimos, el primeru yo. Debieron pensar “yá ta’l comunista ésti tocando los coyones”, pero col tiempu taben encantaos, tanto los faches como los non faches.
¿Cuántu tiempu tuvo como alcalde?
Venti años, del 79 al 99, y llueu otros cuatro como conceyal, nesta ocasión con Nueva Izquierda. Neses eleiciones sacamos 3 conceyales y empatamos con Izquierda Xunida y el PSOE. Llueu Nueva Izquierda integróse nel PSOE, pero yo nun lo apoyaba y dexé la política, anque namái en militancia.
Bimenes siempre destacó por ser un conceyu mui falante, onde la llingua asturiana tien muncha vitalidá.
Cierto, pero noto que dende que yo yera guaḥe se perdió cantidá de vocabulariu. Hai pallabres, xiros d’espresión, que nun s’utilicen güei y qu’enantes yeren comunes. Por exemplo dicir ‘u’, que se sustitúi por ‘onde’.
L’otru día taba fui al ayuntamientu y, por casualidá, taben ehí nun cursu d’asturianu. Sentéme ehí con ellos y el maestru que taba ehí decía ‘fizo’ cuando siempre foi ‘fixo’, lo que me paez amestao. Yo entiendo que nel tema llingüísticu hai que ser purista y me presta siguir les normes de l’Academia de la Llingua, pero non l’amestáu, que nin ye ún nin ye lo otro.
¿Cuándo empieza a cavilar la posibilidá de facer oficial l’idioma nel conceyu?
Al tener esi caldu de cultivu ehí, esto ye, ser un conceyu onde se fala abondo, vi que yera una posibilidá declarar la oficialidá tres recibir una propuesta d’Andecha Astur. A min nun me cayó embaxo y llevé la propuesta a la Comisión de Cultura, que lo vio bien. Depués llévelo a Plenu un 5 de xunetu del 1997 y aprobóse por unanimidá de tolos asistentes. Naquella tábemos nel Conceyu nosotros, Izquierda Xunida, el PSOE y el PP, creo recordar que con 6 conceyales, 3 y 2, de manera respeutiva.
¿Qué suponía la oficialidá?
La oficialidá significaba que se pudiere utilizar en Bimenes l’idioma asturianu, porque nun tenemos prerrogatives pa más. Que los ciudadanos pudieran emplegalo nes sos rellaciones col ayuntamientu, de manera falada y escrita.
Pronto llegaron les torgues.
D’aquella gobernaba Marqués y un tal Ramón García Cañal, que yera conseyeru d’Alministraciones Públiques, mandó una carta dirixida al alcalde de Bimenes dicendo que yera illegal, que diben recurrilo, y que como diba a xenerar un gastu, esi gastu sería restáu de les subvenciones del Principáu que recibiere l’Ayuntamientu de Bimenes. Nin me preocupé, pero ehí yá se vía que nun queríen qu’aquello fuera p’alantre. De fechu recurriéronlo y anulólo’l Tribunal Superior de Xusticia d’Asturies. Nosotros nun quiximos entrar nesa guerra de tribunales y lo que fiximos foi establecer el Día de la Oficialidá la primer fin de selmana de xunetu. Tres la nuesa declaración d’oficialidá tamién hebo dalgún ayuntamientu que fixo lo mesmo, creo qu’ocho.
¿Suponxo dalgún problema la oficialidá dientro’l conceyu?
Nengún problema, nengún. Siguen llegando dalgunos pidimientos n’asturianu, anque la mayoría fáense en castellanu por inercia. Hasta que nun se declare la oficialidá n’Asturies nel Parllamentu asturianu tarémos en desigualdá de condiciones. Nun habrá un esporpolle social que lleve a la xente a entusiasmase con ello.
Sinceramente, creí que con estes eleiciones diba a tirase pol tema, pero veo que non. Nun ye sólo’l PP; el PSOE nun s’atreve a dar el pasu o nun quier, nun sé por qué motivos. Podemos, tampoco. Yo pensé que diben a entusiasmase cola idea, pero veo que non. Dicíen tar a favor de la oficialidá, pero nun los veo.
Cuando lleí los programes eleutorales, que los lleo toos, taben a favor de la oficialidá Podemos, Izquierda Xunida y Foro. Si Podemos y Izquierda Xunida arrastren al PSOE, yá taría, pero veo que la cosa nun tira. Llevé una decepción mui grande, porque nel últimu pregón de la Fiesta pola Oficialidá, a la que me convidaron, manifesté la mio ilusión de que la última correlación de fuercies na Xunta Xeneral del Principáu fora posible la oficialidá, pero veo que non. Tenemos la cigua.
¿Qué-y paez la iniciativa del alcalde actual, Aitor García Corte, de volver a declarar la oficialidá esti branu?
Paezme mui bien revalidar la oficialidá. Tolo que sía mover el cotarru, véolo bien. A Aitor yá-y comenté qu’hai coses nes que me gustaría collaborar col Ayuntamientu, y una de les coses ye nel tema del asturianu. Fonte: Asturies.com
No hay comentarios:
Publicar un comentario
Los comentarios tán pendientes de moderación. Espublizaránse lo primero dable.