2/3/16

Corvera entama un taller de conversación n'asturianu

Col nome de 'Falái, fala-y', la Casa de la Llingua pretende crear un espaciu d'inmersión llingüísica "onde los que sepan asturianu mantengan y tresmitan los sos conocimientos, y los que nun lo sepan, puedan garralos". El responsable de la Casa de la Llingua, Rafael Rodríguez Valdes, coordina'l taller.
Ésti va desenvolvese los martes, de 18 a 20 hores, nel Centro Sociocultural de Les Vegues a partir del 15 de marzu, fecha hasta la que se pue formalizar la inscripción de baldre nos rexistros municipales de Corvera. "Los cursos que llevamos entamando dende'l 2012 tan enfocaos a conocer les normes ortográfiques pa deprenden a escribir y, d'igual forma, avezase a la llectura. L'alumnáu echaba en falta'l trabayu oral, polo que decidimos poner en marcha esta iniciativa", esplica Rodríguez Valdés.
Asina, les persones que participen en 'Falái, fala-y' van trabayar colos distintos ambientes d'usu de la llingua asturiana, dende'l cotidianu —l'emplegu con familiares y amigos— al trabayu, "onde l'idioma utilízase enforma en sectores como'l metal o la madera, anque con poca visualización esterna". Tamién con otru tipu de rexistros, como podría ser el llinguaxe que s'emplegaría nun informativu o programa de radio y televisión, o nun Plenu municipal,
"D'esta forma pueden conocer otru tipu de situaciones, a lo que vamos a sumar delles actividaes dinámiques", añade'l responsable de la Casa de la Llingua. Ente elles tarán los conocíos 'tandems', fórmula habitual pa prauticar idiomes al traviés del alderique direutu con otra persona, xeneralmente nativa.
Abiertu a persones con o ensin conocimientu del idioma
Pa participar nesta actividá novedosa nun fai falta tener conocimientos del idioma, yá que ta destinada cenciellamente a falar. Asina la intención ye crear un espaciu d'inmersión llingüística "onde los que sepan asturianu mantengan y tresmitan los sos conocimientos, y los que nun lo sepan, puedan garralos", esplica Rodríguez Valdés.
Fonte: asturies.com

1 comentario:

Los comentarios tán pendientes de moderación. Espublizaránse lo primero dable.