Vanessa Gutiérrez presenta 'El paisaxe nuestru' en Xixón

• . Vanessa Gutiérrez gana’l XXII Premiu Máximo Fuertes Acevedo d’ensayu

Cubierta de "El paisaxe nuestru"

Obra ganadora del XXII Premiu Máximo Fuertes Acevedo d'ensayu.

"Anque'l llibru llegue al abellugu d'un premio d'ensayu, hai que ponelo en rellación cola so obra creativa, en concreto con 'La cama', l'esitosu lilbru en prosa espublizáu nel 2008", espliquen dende la editorial Saltadera. "Ahora Vanessa Gutiérrez percuerre los paisaxes de los sos mayores buscando nellos la memoria social, respuestes a les entrugues eternes sobre la vida (la d'enantes, que configura'l nuesu presente: d'equí venimos). Failo apoyándose nun xéneru casi escaecíu, les apasionantes 'topografíes médiques' del primer terciu del sieglo XX, dende les que la medicina intentaba esplicar cómo yera (desarrollu material, cultural y espiritual) y cómo-yos gustaría a aquellos médicos que fora la sociedá del so tiempu a la que prestaben atención", añaden.

Vanessa Gutiérrez

La presentación de 'El paisaxe nuestru', "obra mayor, que se llee con placer y fácilmente, y que llogra facer meyor que niegún otru llibru'l retratu de la comunidá social a la que pertenecemos", va tener llugar esta tarde, a les 20 hores, na Librería La Buena Letra. L'actu va tar presentáu por Pablo Antón Marín Estrada.                                      Fonte: asturies.com

Entréguense en Xixón los diplomes d´un taller lliterariu dirixíu por Vanessa Gutiérrez

Na imaxe, Vanessa Gutiérrez

 Iniciativa pol Asturianu va facer entrega de los diplomes d´esti taller lliterariua a los alumnos y alumnes que superaren el cursu dirixíu pola escritora asturiana Vanessa Gutiérrez dende´l mes d’ochobre.

 Nel actu tará Inaciu Galán, presidente de la entidá, y Vanessa Gutiérrez, como profesora faciendo entrega de los diplomes dambos dos. Dende Iniciativa pol Asturianu afirmen que “Tamos mui satisfechos del resultáu d´esti cursu como primer esperiencia pa tener al asturianu como llingua vehicular y non solo pa cursos puramente llingüísticos. Vamos siguir con estes esperiencies nel futuru

 L’actu de pieslle y entrega va ser esti xueves nel Conseyu de Mocedá de Xixón (Avenida Manuel Llaneza, 68) a les 19 hores. Y tán convidaos tolos participantes nel cursu, asina como los interesaos n’averase a los nuevos cursos qu’entama Iniciativa pol Asturianu dende’l mes d’abril y que pueden consultase na páxina oficial.     Fonte: Infoasturies.com

Vanessa Gutiérrez gana’l XXII Premiu Máximo Fuertes Acevedo d’ensayu

El trabayu ‘El paisaxe nuestru’, de Vanessa Gutiérrez, resultó merecedor del XXII Premiu Máximo Fuertes Acevedo d’ensayu qu’entrega la Conseyería d’Educación y Cultura dientro de los sos Premios Lliterarios 2016. Ésti ye’l segundu gallardón que se falla, tres l’Alfonso Iglesias de cómic, de los cinco convocaos.

El xuráu aconceyáu ayeri decidióse por mayoría pol ensayu de la escritora y anguaño presentadora del espaciu ‘Ente toos’ que s’emite na RPA los sábados ente les 16 y 17 hores, al reconocer “el pulsu lliterariu del testu y la modernidá d'una estructura na que se fai dialogar a testos escritos y orales de distintes dómines alredor d'un mesmu paisaxe”, según destaca'l fallu. Fernando Padilla, direutor xeneral de Planificación Llingüística y Normalización, presidió’l mesmu, que tuvo formáu polos escritores y investigadores Luis Casteleiro, José Ángel Gayol –ganador l’añu pasáu con ‘Vértigu. L’atracción del abismu na sociedá contemporánea’–, Marta López Fernández, Elena de Lorenzo y Xosé Miguel Suárez Fernández ‘Tapia’.  

Gutiérrez presentó ‘El paisaxe nuestru’ baxo’l nomatu de Recusa Paigona y lleva una recompensa de 3.000 euros pol gallardón. Nacida n’Urbiés nel 1980, foi redactora del selmanariu ‘Les Noticies’ y presentadora de programes de televisión como ‘Pieces’, amás de collaborar davezu como articulista en ‘El Comercio’.

Autora con Beatriz Redondo Viado del ensayu ‘El país del silenciu’ (2007), la escritora destaca como poeta colos poemarios ‘Onde seca l’agua’ (2003) y ‘La danza de la yedra’ (2004), col que llogró'l Premiu Teodoro Cuesta. Como narradora espublizó ‘Les palabres que te mando’ (2006) y ‘La cama’ (2008). Ye importante destacar que parte de la so obra ta traducida al catalán, al gallegu, al inglés, al checu, al francés y al húngaru, y recoyida en diverses antoloxíes y revistes.

Fonte: Asturies.com

Formientu celebra'l so décimu aniversariu con un actu nel Toma 3

• . Abiertu'l plazu pa participar nel númberu 15 de 'Formientu'

Cartelu décimu aniversariu deFormientu

  Va presentalo Vanessa Gutiérrez y va consisitir nuna timba poética.

  La revista de lliteratura moza Formientu cumple diez años y va celebralo mañana con un actu nel xixonés Toma 3. Ésti va principiar a les 19 hores y nella van participar dalgunos de los munchos escritores qu'espublizaron nella nesti tiempu, ente los que ta la propia presentadora, Gutiérrez.

  "Esta fecha tan especial queremos abrila a tolos collaboradores de la revista a la llargo de los caberos diez años, pa que participéis con testos propios interviniendo nel actu", espliquen dende Formientu. Tamién va abrise l'eventu a tolos presentes que quieran participar na timba poética.

  D'igual forma, la organización recuerda qu'entovía ye posible unviar testos pa la espublización nel númberu 15 de la revista tres ampliar los plazos previstos pa los menores de 30 años. Los autores han d'unviar les sos creaciones acompañaos de la fecha y llugar de ñacimientu, el númberu teléfonu y una pequeña biografía al corréu revistaformientu@gmail.com.                                                           Fonte: asturies.com

Vanessa Gutiérrez va impartir un cursu de creación lliteraria

por Pablo R. Guardado

Iniciativa pol Asturianu va entamar los sos yá tradicionales cursos d'asturianu, a los que va sumar como novedá ún de creación lliteraria. La escritora Vanessa Gutiérrez va encargase d'impartilu nel Conseyu de la Mocedá de Xixón d'ochobre a abril.

El cursu va centrase n'ampliar les habilidaes del alumnáu y afalar la so creatividá al traviés d'exercicios de creación y traducción, llectura y tamién conocencia de la hestoria de la lliteratura asturiana, con especial atención a les décades últimes. Les clases van desendolcase los xueves, de 19 a 21 hores, pudiendo formalizar la matrícula mientres el mes de setiembre al traviés de la web de la organización. El costu del cursu ye de 60 euros, con tolos materiales incluyíos.

D'igual forma, tamién ta abierta la matrícula pa les clases d'asturianu y gallego-asturiano qu'Iniciativa pol Asturianu pon nos meses próximos en Xixón, Uviéu, Avilés, Llangréu, Villayón, Ḷḷena, Villaviciosa y Mieres. Tamién ye posible facelo a distancia.

L'enllaz p'atopar información sobre horarios y inscribise pa los mesmos, ye'l siguiente.

Fonte: Asturies.com

El documental "Se dice poeta" estrénase esti domingu nel Niemeyer

Proyeición y posterior alderique

Vanessa Gutiérrez,  nel Centru Niemeyer d'Avilés

      "Se dice poeta" fala d'educación,  de cuotes, de discriminación positiva, de feminismu y de llinguaxe. "Porque, como bien dicía Orwell, igual que'l pensamientu constrúi'l llinguaxe, el llinguaxe tamién puede construyir el pensamientu.  Y son les persones qu'escriben y trabayen col llinguaxe quien tienen una mayor responsabilidá a la hora atopar maneres más xustes y más llibres d'espresanos".

   Ye polo tanto un llargumetraxe documental qu'ellabora un  percorríu pol panorama poéticu contemporaneu plantegando entrugues alrodiu la visibilidá de les autores y cuáles son les causes d'esa mirada diferenciadora.

     Esta película ye una producción de SEÑOR  PARAGUAS, dirixida por  Sofía Castañón (Xixón, 1983). Cunta col sofitu de la Fundación Municipal de Cultura y UP de Xixón y del Institutu Asturianu de la Muyer.

     Ente les 21 poetes entrevistaes hai cuatro asturianes:  Vanessa Gutiérrez (Urbiés, 1980), Teresa SotO (Uviéu,  1982), Alba González  Sanz (Llanera, 1986), Laura Casielles  (Siero, 1986), asina como la editora, tamién asturiana, Silvia Cosío.

Sofía Castañón,  directora

     L'estrenu de Se dice poeta va tener llugar el domingu 5 d'ochobre a les 20.30h nel Cine del Centru Niemeyer d'Avilés, y va cuntar cola presencia de la poeta Vanessa Gutiérrez y la directora Sofía Castañón. Moderando'l coloquiu posterior va tar la periodista Sonia Ablanedo.                                                                                                             Fonte: Infoasturies.net