Delles organizaciones faen públicu un manifiestu "en defensa del 25 de mayu"

  Asturias Laica celebra una ufrienda floral y una charra de Faustino Zapico n'Uviéu.

 El primer actu va tener llugar a les 13 hores énte la placa conmemorativa de los acontencimientos vivíos n'Asturies el 25 de mayu que ta asitiada na cai Cimavilla con Altamirano. Nesi momentu va facese llectura del manifiestu 'En defensa del 25 de mayu' que roblen tamién l'Ateneo Republicano de Asturias, l'Atenéu Obreru de Xixón, el Sindicatu Unitariu Autónomu de los Trabayadores de la Enseñanza d'Asturies (SUATEA), Izquierda Asturiana (IAS) y Izquierda Xunida (IX), y que pue lleer completu al final d'esta noticia.

 Mentes, pela tarde, ta prevista una conferencia baxo'l nome de 'El 25 de mayo en su contexto histórico', que va poner l'historiador Zapico. Va ser a les 18 hores na sala de Graos de la Facultá de Pedagoxía.

Manifiestu

Les organizaciones abaxo firmantes, que trabayamos pol bien y la concordia de toos y toes, facemos un llamáu pa que’l día 25 de mayu se reconoza y dignifique como amerita.
La mayoría del pueblu asturianu entá nun conoz lo qu’asocedió en data tan señalada.

Énte la invasión francesa de 1808, el 9 de mayu llegó’l corréu a Uviéu con órdenes pa sometese a la ocupación francesa y tamién cartes particulares qu’esplicaben lo que pasara’l 2 de mayu en Madrid. Informábase nelles sobre asturianos afusilaos poles tropes invasores. Emprimó entós n’Uviéu una revolución contra eses órdenes, que diría espardiéndose a toa Asturies.

El pueblu sulevóse contra les autoridaes de l’Audiencia y la Xunta Xeneral del Principáu que queríen acatar les órdenes que llegaben del mariscal francés Murat dende Madrid. Hasta entós tol poder exercíase en nome del rei absolutu, y les instituciones namái servíen al porgüeyu del cleru y la nobleza.

La Xunta Xeneral del Principáu, que s’aconceyaba nesos díes de mayu, na sesión del día 9 de tarde, énte la presión popular, na sala capitular de la catedral, aprobó desobedecer les órdenes de Madrid. Sicasí, cuando celebró otra sesión el día 13, asoraos poles consecuencies de lo qu’aprobaren y amedranaos pol rexente de l’Audiencia, cambiaron el so determín anterior, acataron les órdenes que llegaren de Madrid y claudicaron dafechu, inorando los pidimientos del pueblu.

Al ver que les autoridaes de la Xunta Xeneral del Principáu y de l’Audiencia se sometíen al invasor entregando la llibertá y la independencia, entamóse un llevantamientu.

El 25 de mayu de 1808 miles y miles de paisanos veníos de toa Asturies asaltaron la fábrica d’Armes d’Uviéu y con elles entraron na capital. Tomaron l’Audiencia, asitiada na cai Cimavilla d’Uviéu y, ellí mesmo, constituyeron un nuevu muérganu de gobierno que llamaron la XUNTA SUPREMA.

Lo primero que fixo la XUNTA SUPREMA (que nada tenía que ver cola Xunta Xeneral del Principáu que claudicara énte’l rexente’l 13) foi reconocer la soberanía popular. Ello ye, qu’“El poder, tol poder, reside y remanez del pueblu” y asina lo xuraron caún de los sos componentes. Declaró la guerra a Napoleón, unvió embaxadores a Gran Bretaña y formó un exércitu de 30.000 homes al que contribuyeron tolos conceyos.

Foi la primer vegada, non solo n’Asturies, sinón n’España, na qu’un muérganu de poder reconocía la soberanía popular. Y nun hai qu’escaecer qu’ésta ye’l fundamentu de la democracia. El 25 de mayu de 1808 reconocióse’l Pueblu como soberanu. ¿Pue daquién que se considere demócrata negase a conmemorar la data na que se reconoció la soberanía popular per primer vegada?

Estos fechos tienen entidá abondo pa considerase en sigo mesmos como constituyentes d’una de les xestes más importantes de la nuestra historia al igual que l’entamu de l’Asturies contemporánea nelaspectu políticu y institucional. Asturies pasa per una crisis de graves consecuencies no económico, no demográfico y no político. Namái una autentica democracia que surda de la voluntá popular va ser pa facer frente a esta grave crisis. Reivindicar y dignificar el 25 de mayu como data de importancia cimera p’Asturies ye un pasu importante porque significa y conmemora al pueblu soberanu.

Somos conscientes de que ye un empeñu difícil y el camín llargu, pero tamos convencíos dafechu de lo xusto y honrao de la nuestra reivindicación.

¡PUXA ASTURIES!
¡PUXA’L PUEBLU ASTURIANU!
¡PUXA’L 25 DE MAYU!                                                                                Fonte: asturies.com

Faustino Zapico (SUATEA): "L'asturianu desapaez col proyeutu de reforma educativa"

“L’asturianu desapaez col proyeutu de reforma educativa”

    “En dos meses va definise la situación pa los 20 años próximos y con esti proyeutu de reforma educativa, l’asturianu desapaez”. Faustino Zapico, de SUATEA, alerta de l’ausencia d’espaciu pa la materia na LOMCE pola falta d’oficialidá.

    “Col segundu borrador de la Llei Orgánica pa la Meyora de la Calidá Educativa (LOMCE) –espublizáu’l 3 d’avientu, con añadíos el 4 d’esi mesmu mes– l’asturianu nun tien güecu nel sistema educativu”, afirma Zapico, que considera que’l mayor grau de responsabilidá por esta situación ta n’Asturies, non en Madrid. “La llei, no que respeuta a les llingues cooficiales, ye coherente nel sentíu de que va pel llibru; lo marcianu ye lo qu’asocede col asturianu”, asegura’l miembru de la secretaría del Sindicatu Unitariu y Autónomu de Trabayadores de la Enseñanza d’Asturies (SUATEA). Pese a contar con reconocimientu xurídicu y implantación curricular, tanto la llingua asturiana como’l gallego-asturiano nun atopen sitiu na nomada ‘Llei Wert’ tal como ta redautada anguaño por nun ser oficiales, como bien esplica Zapico nun artículu espublizáu nel so blogue ‘L’arcu de texu’.

    Dende’l sindicatu, mui críticu col proyeutu del ministru d’Educación, Cultura y Deporte pol ataque qu’ésti supón pa la escuela pública, recuerden que la desapaición de la materia de Llingua Asturiana y de Gallego-asturiano conlleva’l desaniciu de 229 puestos de trabayu en Primaria y Secundaria, emplegos na so mayor parte precarios. “Ente’l 75 y el 80 por cientu d’estos maestros tán a media xornada, y el 95 por cientu d’ellos son interinos”, añade Zapico.

    L’ausencia del asturianu nel sistema educativu tres 30 años d’un avance sele llevaría a que los estudios universitarios reglaos esistentes anguaño “nun tendríen sentíu”, considera’l docente, que ve la oficialidá como la solución más afayadiza pal problema, dalgo que refuga dafechu’l Gobiernu del país, como confirmó recién la conseyera d’Educación, Cultura y Deporte, Ana González. “Llueu taría una alternativa posibilista: que la Llei incorporara una referencia específica p’aquelles llingües non cooficiales”, esto ye, la propuesta fecha pola Academia de la Llingua Asturiana’l mes pasáu. El casu ye que’l tiempu cuerre a la escontra y les soluciones pal asturianu nun acaben de llegar.

   Conceyu informativu, el martes.    Esti martes va celebrase n’Uviéu un conceyu de maestros de Llingua Asturiana y Gallego-asturiano cola fin de tratar la situación na que s’atopa la materia col borrador actual de la LOMCE, asina como pa preparar aiciones y movilizaciones pa les selmanes próximes. La cita va ser a les 18 hores, nel IES Aramo, mesmu llugar y hora nel que SUATEA tien convocada’l xueves otra asamblea informativa, nesti casu destinada a los profesores interinos.

   Fonte:  Asturies.com