Presenten la revista Formientu 12 con un recital en Xixón

El Café Trisquel de Xixón acueye la presentación del númberu 12 de la revista Formientu y timba poética con micro abiertu esti vienres dende les 20:00 hores. El recital va cuntar con dellos autores y la música d’Andrés Astur Treceño. La revista, dirixida por Inaciu Galán dende la so fundación en 2006, sigue apostando por ser cantera de nuevos autores en llingua asturiana, dándolos a conocer y apurriendo un espaciu pa los sos testos. El viniente vienres 18 d’abril va presentase nel Café Trisquel, en Xixón (cai Marqués de San Esteban, 30), de magar les 20 hores y cola presencia d'autores, que darán llectura a los testos de la revista y a otros inéditos, amás de con una timba poética, organizada pol escritor y músicu Andrés Astur Treceño, onde habrá micro abiertu. Nesti númberu apaecen testos d'Alberto Cla, Andrés Astur Treceño, Laura García Calvo, Cristina Menéndez Martín, Fonsu Suárez, David Carrasco Díaz, Naomi Suárez González, Ismael Carmona García, Nayar Crespo Sánchez, Jaime Martínez Menéndez, Pablo M. Testa, Alba Llaneza Pulido, María García Díaz, Blanca Fernández Quintana y Xurde Álvarez Antón. Amás, ta ilustráu pol xoven fotógrafu y cineasta Pablo Casanueva. Toos ellos tienen menos de trenta años y asoleyen la so obra n'asturianu. Na sección "Cuando... yera autor mozu" apaez nesti casu un testu de Pachín de Melás. Na sección búscase dar a conocer la obra escrita por autores clásicos o contemporáneos, escrita demientres la so mocedá. El poema asoleyáu nesta ocasión espublizólu l'autor xixonés con 22 años. Fonte: Infoasturies