Un total de 182 actuaciones y talleres van desendolcase nos centros escolares del país pa complementar el llabor de los maestros d’asturianu y eonaviego. L’Axenda Didáctica Escolar d’esti añu ye la más rica de toles entamaes hasta la fecha.
En comparanza cola correspondiente al cursu 2012-2013, l’aumentu d’actividaes programaes ye del 67,75 por cientu, con un gastu total de 135.450,30 euros. Gracies a esta inversión de la Conseyería d’Educación, Cultura y Deporte, al traviés de la Direición Xeneral de Política Llingüística, los escolinos y escolines de Llingua Asturiana y Gallego-asturiano de 137 centros de Primaria y 45 de Secundaria y Bachilleratu van poder disfrutar de conciertos musicales, representación teatrales y lliteraries, y talleres, convirtiendo esta iniciativa nuna amuesa de la importante creación cultural esistente anguaño nes dos llingües minorizaes del país.
La seleición de los proyeutos de la quinta edición de l’Axenda fíxola un equipu d'espertos en materia cultural y educativa, “atendiendo a la so orixinalidá y viabilidá de desarrollu, la so adecuación a los criterios pedagóxicos establecíos nos decretos curriculares del Principáu y el so valor nel marcu del espardimientu y promoción del asturianu y del gallego-asturiano”, espliquen dende la conseyería. Hai que destacar que toles actividaes de l’Axenda Didáctica Escolar –que’l llector pue consultar nos documentos axuntos al final d’esta noticia– nun tienen coste nengún pa los centros escolares. Fonte: Asturies.com
Merez bien la pena abrir el link d'actividaes coloriáu en lletres malva , adxuntu dientro del testu na primera llínia del tercer párrafu,
ResponderEliminarLa Axende ye una magnífica ayuda pal mundu del enseñu y de la educación asturianes porque abre y ufierta un perbón abanicu d'actividaes complementaries de l'aula.
ResponderEliminarEstímase'l conseyu.
ResponderEliminarYe una guía escolar magnífica, un gran llogru.
ResponderEliminar