Presentáu'l cartelu de los III alcuentros de músiques feches n'Asturies

Entama un añu más l'amcBOCANEGRA, nestos alcuentros musicales cellebraos en Valles.

   El xueves día 17 a partir de les 22:30 visíten Valles VRIENDEN (Nava), un grupu nuevu con un soníu dinámicu na que la voz marca munches diferencies, apocayá fueron galardonaos  col premiu "Ames" al meyor álbum folk del añu. Xurde Fernández a la flauta, whistle y violín; Nel Suárez, a la guitarra; Pedro Santiago, al bodhram; y Juan Duarte como vocalista. Vrienden pretende nun enllancase musicalmente apurriendo siempres una visión distinta que garantice la diversión y almiración del públicu, ye un organismu vivu en continua evolución al qu'ellos denominen como “folk-fusión alternativu”.

   El mesmu xueves 17 tamién van cuntar con una de les ayalgues del folk n'Asturies, ellos son HERMANOS TEJEDOR que vienen en formatu de quintetu y que van dar repasada a la so estensa discografía. D'Hermanos Texedor podría escribise enforma, galardonaos nos meyores festivales, nos premios Amas, xires per tol mundu, autores de la banda sonora de "la Torre de Suso" y una estensa llista de músicos colos que collaboraron y colos que cuntaron pa los sos discos, el postreru llamáu "Positivu"  y presentáu en 2011, va ser un autentico prestar esfrutalos en Valles.

   El sábadu 19 y como zarru d'estos alcuentros van tener al grupu más significativu del agro-rock n'Asturies LOS BERRONES. Escribieron el so nome con lletres d'oru na hestoria de la música n'Asturies por munches razones, ente elles la más importante l'acoyida y la repercusión de los sos cantares nel públicu de toles edaes como siguen demostrando nos sos directos. Nesta ocasión tuvieron la deferencia d'escoyer Valles pa la presentación de la xira del so 25 aniversariu. Sedrá a partir de les 23:00, mientres que l'apertura de puertes pa los dos díes ye a les 21:30.    Fonte:  InfoAsturies