El poeta Nel Amaro, miembru de l'Academia de la Llingua y ún de los poetes más combativos y modernos del Surdimientu, finó esti llunes a la edá de 65 años, al rodiu les 4 de la tarde. Ñacíu en Quentuserrón (Mieres) en 1946, ye Nel Amaro ún de los animadores culturales del Valle del Caudal de les dos últimes décades.
Presu políticu nos últimos años de la dictadura, fundó y dirixó en Mieres y Turón revistes culturales tan actives como “Sapiens” y “Cuélebre literario”. Nel Amaro ye ún de los escritores más prolíficos y versátiles de la moderna lliteratura asturiana. Poeta, novelista y autor teatral, primero en castellán y más tarde n’asturianu, ye tamién ún de los pocos nomes de la primer xeneración del Surdimientu que siguía espublizando na actualidá y faciendo actu de presencia en performances y otres instalaciones.
La so obra poética alcuéntrase recoyida nos llibros: Responsos laicos (1979), Habitación de poeta (1981), Boca arriba, lentamente naufragando (1982), Y tu, Marta B., qu’entoncies nun yeres, tampocu, l’Anna Karina de les películes de Jean Luc Godard (1990), Diariu d’un polizón (1990), Poemes de San Francisco (1993) y Pruebes d’autor (1994). Nellos practica una estética que xunta en dosis asemeyaes guiños vanguardistes con ecos de protesta social (de Vallejo, Blas de Otero, Aresti, mayormente) y que faen d’Amaro ún de los autores más singulares del panorama poéticu del Surdimientu.
Como novelista dio a estampa: “Adiós Dvorak” (1990), “Novela ensin títulu” (1991), dos exemplos del cultivu del xéneru policiacu ente los actuales escritores asturianos y “Falanxista” (1996), una obra que conxuga l’alcordanza hestórica cola denuncia política, y “Na borrina” (1993) y “L’últimu del pelotón” (1994). Amaro dirixó tamién grupos teatrales y ye autor, al empar, de diverses obres dramátiques, ente les que resalta Antígona, por exemplu (1991). Nos años noventa l’escritor mierense empieza a dedicase a otros campos creativos como’l de la poesía visual, la elaboración de fancines y l’entamu de "happenings" y instalaciones de calter coleutivu. Nel Amaro yera miembru de númberu de l’Academia de la Llingua Asturiana.
Fonte: Asturnews
Otru lluchador polos drechos llingüísticos de los asturianos que muerre ensin ver la oficialidá.
ResponderEliminarGloria, alcordanza y reconocimientupa Nel Amaro nel so pasu al otro llau de la niebla.
ResponderEliminarYa non engañen a naide. La FSA, PSOE y UGT solo tán perllistos pa conservar como seya el so puestín y la so poltrona (el so sueldu oficial y otres prebendes confesables unes y menos otres) y no la cultura y la llingua asturianes, son too fachada. Non saben quien yera Nel Amaro. Reconocimientu a Nel Amaro.
ResponderEliminarPa mi el meyor homenaxe facese amigu d'esti blogue
ResponderEliminarhttp://clubdefansdenelamaro.blogspot.com/
Nel Amaro na nuesa memoria pa siempres.
ResponderEliminar