Radio Sele sigue ensin llicencia

El Gobiernu concedió diez llicencies de radio mientres Radio Sele sigue esperando la devolución de la suya.

El Gobiernu, al traviés de la Conseyería d'Alministraciones Públiques y Vocera del Gobiernu, resolvió la concesión de diez nueves llicencies de radio que van suponer, según el compromisu de los axudicatarios, una inversión de 2,7 millones d'euros y la creación de 70 puestos de trabayu. Presentáronse 127 proyeutos y les concesiones foron n’Uviéu (SER, Soninorte - MedeaFM-, Nuevas Iniciativas Audiovisuales -Mediapro-), Xixón (El Comercio), L.luarca (Kiss Radio, Economía por Ondas), Navia (Editorial Prensa Asturiana) , Taramundi (Radiofusión del Principado), Avilés (SER) y Cangues d’Onís (Propulsora Montañesa - SER-).
La puntuación pa la concesión de la llicencia, de 0 a 100, desglósase nos siguientes requisitos: Fomentu cultural (fasta 30 puntos), conteníos (fasta 20 puntos), pluralismu informativu (fasta 10 puntos), viabilidá económica (fasta 10 puntos), viabilidá téunica (fasta 10 puntos), compromisu de non cesión a terceros (fasta 10 puntos) y accesu nueves empreses (fasta 10 puntos). Como se ve, la difusión del idioma propiu nun cuenta con separtáu dengún na puntuación.
Onda Cero y la Cadena Cope yá anunciaron qu'estudien aiciones llegales énte esti últimu repartu de llicencies, yá que nun se-yos concedió denguna.

D'otra miente, la situación de Radio Sele, la única emisora qu’emite dafechu n’asturianu dende 1986, a la que’l Tribunal Superior de Xusticia d’Asturies reconoció como dueña d’una llicencia d’emisión na FM, sigue na mesma situación. La llicencia foi retirada pol gobiernu del PSOE tres tenela concedía pol gobiernu de Sergio Marqués y que foi a parar a la fin a Punto Radio.

Fonte: Infoasturies