25/7/10

Nuevu programa na TPA de documentales n'asturianu

TPA aumenta la so programación n'asturianu col espaciu de documentales ‘Mirasturies, el pasáu recién’, que la cadena autonómica emite los llunes y los vienres a les 9:30.
L’espaciu va allugar los documentales fechos n’asturianu pola Productora de Programes del Principáu lo llargu del so andar, con temes como la hestoria, la natura, el padrimoniu cultural, l'arte, la etnografía y el folclor del país, añediendo media hora a la programación de la cadena n'asturianu.
La serie documental repasa a lo llargo de 50 capítulos la hestoria d'Asturies n'episodios como ‘Asturies, crónica d’un sieglu’ y ‘Tal como yéramos’; percuerre los espacios naturales y amuesa la flora y la fauna en ‘Árboles y viesques d’Asturies’; ‘Fauna d’Asturies, de les cumes al monte’ y ‘L’osu pardu’, ente otros.
Mirasturies concede una especial atención al padrimoniu hestóricu-artísticu en ‘La puerta’l cielu’, ‘El Románicu n’Asturies’, ‘Catedral d'Uviéu y Arte Góticu’; y a la cultura popular y a les tradiciones colos capítulos dedicaos a ‘Ferramientes tradicionales’, ‘La forxa del metal’ y los ‘Mercaos tradicionales’.
El programa de TPA ufierta, coles mesmes, un percorríu pel territoriu d'Asturies con ‘Cares, el divín gargüelu’;’ Un paséu per Uviéu’ y ‘Les rutes de Les Xanes y del Navia’ . La gastronomía y los deportes tradicionales como los bolos tienen tamién el so espaciu en Mirasturies.
El programa ye la versión na nuesa llingua de ‘Mirasturias’, programa qu’inclúi documentales de la Productora de Programes del Principáu y qu’entamó la so emisión en 2006, coles primeres tresmisiones de TPA.
Dende la canal autonómica indiquen qu’asina refuercien el so compromisu col espardimientu de la llingua y la cultura asturianes “que l'Ente de Comunicación del Principáu tamién fomenta na programación de RPA y el conteníu del periódicu dixital”.

82 HORES N’ASTURIANU
La televisión pública emitió pela so primer cadena (A7) nel primer trimestre de 2009, 82 hores y 41 minutos de programación n'asturianu.
Dende RTPA, señalen que la ufierta n’asturianu foi xorreciendo fasta consolidase con programes como ‘Camín de cantares’, una serie documental inspirada nel archivu de la tradición oral y presentáu por Xosé Ambás; ‘Presta Asgaya’, de conteníu infantil y familiar; y los espacios ‘Nós’, ‘Al aldu’, ‘Pieces’ y ‘Sones’.

Fonte: Asturies.com

6 comentarios:

  1. Ye una bona noticia pa toos los asturianos, con una programación amplia ya interesante n'asturianu. Les temes son munchos bien elexíos y diversos. Llugás entrúgote si la programación entama a les 9:30 h ó a les 21:30 h ¿podríes aclaralu? gracies.

    ResponderEliminar
  2. 9.30 de la mañana, nun vaiga ser que lo pongan en "prime time" y tenga bona audiencia, menuda cagada pa ellos...

    ResponderEliminar
  3. Asina nun van normalizar muncho l'asturianu. Que lo mesmo ye lo que quieren. Entá tán mui lloñe del 50% la programación billingüe que tanto cacarexen.

    ResponderEliminar
  4. Sedría muncho meyor pa tol mundu y pa la mayor difusión del asturianu, que ye lo necesariu ya tamos n'Asturies, ponelu a les 21:30 o 22 h pero les órdenes taxantes provienen d'arriba o seya del gobiernu de don Tini y paez que non tá pola llabor. L'asturianu non convién (paez que glayen estos... ) tamos en males manes ensin remediu.

    ResponderEliminar
  5. l'enemigu na propia casa26 de julio de 2010, 18:15

    Paez que tenemos l'enemigu dientro la nuesa propia casa, col gobiernu amigo que tenemos non fai falta enemigu foráneu, tamos copaos.

    ResponderEliminar
  6. ¿y pa cuando les pelis, los partíos, les noticies o documentales d'economía o física cuántica? La llingua val pa too.

    ResponderEliminar

Los comentarios tán pendientes de moderación. Espublizaránse lo primero dable.