El llunes 21 de xunu va espublizase’l primer llibru en llingua asturiana dientro un blogue, onde tol públicu interesáu pueda llegar a él ensin pagu nengún. Trátase de la obra titulada Orbayu seco, de Nel Ricardo Álvarez Morán (Trubia, 1959), un llibru con 101 microrrellatos que los llectores van poder lleer de baldre nel blogue Cordobello, un fechu que l’escritor describe como un pasu más na rellación ente lliteratura asturiana y teunoloxíes nueves. La direición p’acceder al llibru ye: http://cordobello.blogspot.com/.
L’autor, corresponsable (xunto a Maite González Iglesias) de los llibros pa rapacinos de Ñubina, les estrelles y los pirates del espaciu o Ñubina atrapada nel Arcu la Vieya y del llibru de testu Les Coses d’Iyán, amás de dos guíes didáutiques, cuida que ye necesario dar esti pasu dempués de sufrir un derrame cerebral y llograr salir alantre colos sos problemes logopédicos. Ta nel so sentir siguir escribiendo n’asturianu y facer que la so obra la llea tol que-y pete nel blogue.
L’Academia de la Llingua Asturiana yá espublizara dos microrrellatos de los conteníos n’Orbayu seco na so revista Lliteratura, y l’autor ufierta la so obra a toles persones o organizaciones que quieran emprentalos con fines sociales.
Fonte: RTPA-Estaya d'asturianu
No hay comentarios:
Publicar un comentario
Los comentarios tán pendientes de moderación. Espublizaránse lo primero dable.