Manifestación pola oficialidá del euskera nel País Vascu francés

Remembren al presidente Sarkozy que prometió una llei pa les llingües minoritaries.

Unes 5.000 persones manifestáronse esta fin de selmana nes cais de Baiona (Iparralde) pa vindicar una llei que reconoza les llingües minoritaries, de mou que seyan consideraes oficiales nos sos respeutivos territorios. El presidente francés, Nicolas Sarkozy, incluyó ente les sos promeses elleutorales, la promulgación d’esta llei, que güei en día nun vio inda la lluz, y que ta lloñe de que seya ellaborada, según sorrayaron los organizadores de la marcha, que sirvió como colofón a una campaña qu’entamaron el pasáu mes de mayu.

El caberu intentu lleváu a cabu por representantes d’estremaes asociaciones y organismos que trabayen en y pal euskera, foi la visita que realizó de recién el ministru de Cultura, Frédéric Miterrand, al País Vascu francés. Nella quedó nidio que nun teníen previsto l’alderique de dengún proyeutu de llei pa la defensa de les llingües minoritaries.

La manifestación diba encabezada por una pancarta col llema «Euskarari lege geriza. Ofizialtasuna» (Proteición llegal al euskera. Oficialidá), a la que siguía una segunda pancarta portada por representantes d’estremaos partíos políticos.

Ente los manifestantes, Max Brisson, presidente de la Oficina Pública del Euskera y conceyal de Biarritz pola UMP, partíu llideráu por Sarkozy, calcó na importancia de que’l presidente y la so anterior ministra de Cultura, Christine Albanel, cumplan la pallabra dada y s’aprebe una llei que permita caltener una política llingüística duradera.

Lleis estatales
L’escritor Xabier Mendiguren tamién intervino tres la marcha y abogó por que les autoridaes franceses reconozan nes lleis estatales a les llingües minoritaries del país vecín.

Na manifestación participaron, asinamesmu, el parllamentariu d’Aralar Mikel Basabe, y la de Nafarroa Bai y representante d’esta formación Nekane Pérez. Tamién miembros de Gazte Abertzaleak, les mocedaes d’Eusko Alkartasuna.

Ésta nun ye la primer vegada que los euskaltzales del País Vascu francés salen a la cai a vindicar la oficialización del euskera. En 1989 foi la primer manifestación con esti envís, y l’actual foi la sesta convocatoria.