El catalán ye l'ochavu idioma del mundiu nos blogues

El catalán ye l’ochavu idioma del mundiu con mayor actividá nos blogues y el decimoquintu en Wikipedia, la popular enciclopedia lletrónica, lo qu’atestigua "una presencia na rede muncho mayor del pesu demográficu de los sos 10 millones de falantes".

El direutor de Linguamón-Casa de les Llingües, Antoni Mir, afita que’l catalán gocia de "bona salú" n’Internet. Mir, qu’inaugurara’l I Simposium Internacional sobre Multillingüismu y Ciberespaciu, destacó qu’esta gran actividá del catalán na rede ye mui superior al pesu demográficu que representen los diez millones de catalanofalantes. Considera qu’Internet "nun tornará ser enxamás" un territoriu exclusivu del inglés porque la rede "abre puertes increyibles al multillingüismu" y añede que se ta produciendo una "eclosión" de les llingües minoritaries na rede. Tamién anima a que’l catalán "ocupe los nuevos espacios que van creándose na rede", como Youtube o les redes sociales, y apunta a la "gran actividá" de los catalanofalantes na rede p’algamalo.

Pa elli, la sociedá catalana pue resultar "mui competitiva" n’Internet porque los catalanes "tán avezaos a xestionar la diversidá llingüística" qu’agora florez tamién na rede. El direutor remembró que Cataluña foi pionera na creación d’un muérganu públicu como la Casa de les Llingües encargáu de promocionar y estudiar la diversidá llingüística.