Cuasi 200 llingües amenazaes na India

Cuasi 200 llingües de la India cuerren el riesgu de desaniciu si los pás nun faen esfuercios pa calteneles nun sistema educativu que privilexa l’hindi y l’inglés, aseguraron na capital india dellos espertos.
"Podemos aidar, como llingüistes, n’iguar material pa preservar eses llingües, pero en realidá depende de les comunidaes, qu’han querer preservar la so llingua", dixo a l’axencia IANS l’investigador de la UNESCO pa les llingües en pelligru nos Himalayes, l’espertu Jean Robert Opegnort.

Xunto a otros llingüistes, Opegnort participó nun seminariu internacional de dos díes cellebráu en Nueva Delhi y organizáu pol organismu indiu encargáu del caltenimientu del padrimoniu (INTACH) p’alcontrar formes de protexer les llingües en pelligru.
Según l’Atles de les Llingües en Pelligru del Mundiu, ellaboráu pola UNESCO esti añu, na India hai 196 llingües amenazaes.
"En fasteres del Himalaya hai pequeños númberos de falantes de lligües xino-tibetanes, que nun cunten con carauteres escritos y tán probemente documentaes. Equí los pás puen tener un papel esencial", dixo Opegnort.

D’alcuerdu col presidente d’INTACH, S.K. Mishra, el dominiu del inglés a nivel mundial, y del hindi a nivel nacional, "ta matando munches llingües" y, poro, los educadores han fomentar el deprendimientu de les llingües tradicionales nes primeres etapes.
Anque l’hindi ye l’idioma maternu d’un 25 % la población de la India, el so usu como llingua oficial fai que les llingües tribales pierdan tarrén tamién nel ámbitu domésticu, según la investigadora Lisa Lomdak.

Un sondéu oficial de 1962 señaló que na India había más de 1.600 llingües, mientres qu’otru de 2002 amenorgóles namái a 122, según dixo a l’axencia IANS fai unos díes l’investigador G.D. Prasad Sastry. "¿Nun hai entós daqué que nun marcha si l’Atles de la UNESCO afita que les llingües en pelligru son 196?", dixo Sastry, quien criticó la "falta de voluntá" del Gobiernu indiu p’afrontar esti problema.