L’espediente d’oficialización toponímica de Candamu entra na fase d’esposición pública

por Pablo R. Guardado

El Plenu del Conceyu de Candamu aprobó por unanimidá esti xueves la propuesta definitiva d’oficialización toponímica, polo que’l procesu entra nel so tramu final al pasar a esposición pública. Los nomes tradicionales Cueru, Fenoeda, Llameiru o San Tisu pasarán a ser oficiales, derogando asina les denominaciones castellanes.

Los vecinos de Candamu tienen agora un mes pa recurrir nel casu de que nun tuvieren d’alcuerdu con dalguna de les denominaciones que treslladó la Xunta de Toponimia al Conceyu tres dar el preste a les enmiendes feches dende l’Ayuntamientu al primer documentu propuestu. Si, como s’espera, nun se produz recursu nengún, l’espediente pasaría a la Conseyería d’Educación y Cultura, que lu treslladaría al Conseyu de Gobiernu pa la so aprobación definitiva y la posterior espublización nel BOPA que derogaría los topónimos castellanos pa dar oficialidá definitiva a los tradicionales.

Tanto’l PSOE, partíu de gobiernu, como’l PP y Izquierda Xunida (IX) sofitaron por unanimidá tol procesu de recuperación toponímica, dalgo qu’empondera’l conceyal de Cultura, Turismu, Emplegu y Desarrollu Llocal, José Luis Suárez Arias. “Toi arguyosu d’esti consensu, porque la llingua ye patrimoniu de toos, un bien a protexer y impulsar, y ye dalgo qu’agradecí a tolos grupos nel Plenu d’ayeri”, espresa l’independiente, que punxo como una de les condiciones pa garrar el cargu propuestu polos socialistes l’entamu del procesu d'oficialización de los nomes de llugar tradicionales.

“Tamién toi mui agradecíu cola alcaldesa, Natalia González Menéndez, pol so compromisu pa cola toponimia y la llingua asturiana”, añade Suárez Arias, satisfechu “por recuperar los nomes verdaderos de los pueblos, los qu’empleguen los vecinos”. Asina recupérase Cueru (hasta la fecha Cuero), Ricabu (Ricabo), Augüera (Agüera), El Caleyu (El Caleyo), San Tisu (San Tirso) o Faéu (Faedo), por citar unos cuantos.

Puesta en marcha d’un Serviciu de Normalización

Entrugáu por futures aiciones pa la normalización del asturianu en Candamu, como podría ser la puesta en marcha d’un Serviciu de Normalización Llingüística o’l desendolcu d’un Plan de Normalización Llingüística, l’edil responsable de Cultura señaló la posibilidá d’abrir un Serviciu de Normalización Llingüística conxuntu con Grau, una proposición que nació de la Conseyería d’Eduación y Cultura y que dambos conceyos tienen anguaño n’estudiu.

Fonte: Asturies.com

El Teixu principia una campaña na defensa de la promoción de la llingua en Trueitas (Lleón)

El Teixu, Rede pal Estudiu y Defensa de la Llingua Asturllionesa, entama una campaña en Charge.org  en defensa de la política llingüística entamada pol Conceyu de Trueitas na igua de la toponimia tradicional.

El conceyu de Trueitas (Llión), por iniciativa del so alcalde, Francisco Simón Callejo, entamó va unos meses una incipiente política de promoción de la llingua autóctona. Esta política concretóse primeramente nel allugamientu de señalización viaria billingüe, na que figuren los nomes oficiales de los pueblos (de tradición alministrativa) siguíos de los nomes populares, na llingua autóctona.

Darréu de la decisión, instaláronse dellos cartelos (d’entrada y de dirección) nos que per primer vegada na hestoria figuren los topónimos na nuesa llingua: Baillo/Vayellu, Quintanilla de Yuso/Quintaniella, Truches/Trueitas, Truchillas/Truitiellas, Valdavido/Valdaviéu y Villarino/Villarinu.

Tan prudente midida, sigún desplica l’Asociación El Teixu, “produciera una aprobación xeneralizada, como pudo apreciase nes distintes reacciones publicaes nos medios de comunicación esti branu. Y ello tantu porque fai xusticia a la llingua y la cultura tradicional de los pueblos cabreireses (tantes vegaes vilipendiades y discriminaes a lo llargo de la hestoria), como porque ye la primer vegada qu’una alministración #decidir a faer respetar el mandatu del artículu 5.2 del Estatutu d’Autonomía de Castiella y Llión, qu’establez que «El lleonés va ser oxetu de protección específica per parte de les instituciones pol so particular valor dientro del patrimoniu llingüísticu de la Comunidá», y que nenguna autoridá cumpliera nin queríu faer cumplir hasta agora”.

Sicasí, a pesar de que la opinión positiva foi xeneral, nun faltaron ataques vandálicos a la señalización viaria nos que les formes toponímiques autóctones fueron tachaes o esaniciaes. Y frente a estes acciones destructives, llevantáronse les mesmes asociaciones civiles de Cabrera, que repararon y llimpiaron los indicadores deterioraos por persones desconocíes que, sía que non, demuestren tar en contra de la igualdá de derechos, del respetu a la diversidá y de la dignificación de la cultura popular.

Nesa llínea, y en defensa de la política llingüística entamada pol Conceyu de Truches, quieren sofitar les midíes tomaes “y reforzar la posición de quien se decida a afondar nelles, demostrando que somos munchos más los que reconocemos la importancia de la defensa de la llingua autóctona que quien deseyen perpetuar la desigualdá y el despreciu pola cultura y la llingua del pueblu”.

Por toes estes razones, dende El Teixu. Rede pal Estudiu y Defensa de la Llingua Asturllionesa conviden a que se suscriba esti pidimientu.

Fonte: Asturnews

La Vuelta 2014 respeta los topónimos oficiales n’eusquera y gallegu, pero non los asturianos

por Pablo R. Guardado Otru añu más, el pasu de La Vuelta peles carreteres asturianes nun trae consigo’l respetu a los topónimos oficiales, énte la pasividá del Gobiernu. La ronda ciclista sí utiliza nel so percorríu los nomes de llugar oficiales n’eusquera y gallegu. Esta selmana presentábase nel Muséu de la Minería (MUMI) de L’Entregu les dos etapes que van celebrase n’Asturies nesta edición de La Vuelta, actu nel que taben presentes Ana González, conseyera d’Educación, Cultural y Deporte, y Graciano Torre, conseyeru d’Economía y Emplegu, ente otres autoridaes. Éstes son, según reza la web de la ronda qu’entama Unipublic, ‘Oviedo-Lagos de Covadonga’ (7 de setiembre) y ‘San Martín del Rey Aurelio-La Farrapona. Lago de Somiedo’ (8 de setiembre), dos finales n’altu que van decidir la ronda y que van atrayer l’atención de tol ciclismu mundial. La ronda española torna, polo tanto, a nun respetar la toponimia oficial del país, dalgo que sí fai en Navarra y Galicia. Asina, con echa-y un güeyu al percorríu de la ronda podemos ver topónimos como Lakuntza, Uharte-Arakil, A Estrada o Cangas do Morrazo, mentes que n’Asturies apaecen los yá derogaos ‘Lastres’ o ‘Figaredo’, ente otros munchos cola so versión en castellanu. Too ello col preste del Gobiernu, dalgo enforma más grave teniendo en cuenta que son les alministraciones asturianes les que ponen les perres pa que pase La Vuelta pel país. En múltiples ocasiones Asturies.com trató de conocer les razones de que, añu tres añu, esta situación se repita, siempre ensin ésitu, yá que dende Política Llingüística pasen la pelota a Deportes y, dende esta direición xeneral, a Turismu. Sicasí, Ana Fueyo declaró en delles vegaes la so insistencia pol cumplimientu de la toponima nesti casu concretu, un esfuerciu que nun reflexa resultaos. Fonte: Asturies.com

La Vuelta a España sigue ensin usar la toponimia oficial d’Asturies

La Vuelta nun respuendió a Iniciativa pol Asturianu que pidió el cumplimientu  nos usos de la toponimia oficial d'Asturies. Anguañu pa les etapes que pasen per Asturies la organización de La Vuelta usa topónimos non oficiales.

Va delles selmanes y al ver que na páxina web de La Vuelta a España 2013 asoleyaben el Llibru de Ruta y les etapes que pasaben per Asturies nun teníen la toponimia oficial bien puesta, Iniciativa pol Asturianu unvió una carta a Unipubli, la empresa organizadora d’esti eventu deportivu esplicando los erros nel usu de la toponimia asturiana na so páxina y pidiéndo-yos el cumplimientu nos usos de la toponimia oficial pa topónimos como Llastres, Celoriu, Mieres del Camín, Piedrasblancas o La Rebollá, ente otres.

La organización de La Vuelta non solo nun contestó a esta reclamación sinón "qu’a poques hores de que la carrera ciclista llegue a Asturies, los topónimos siguen apaeciendo de forma incorreuta en tolos ámbitos de La Vuelta", denuncien dende la organización.

Esti usu nos materiales de La Vuelta a España lleva a los topónimos yá derogaos a apaecer en televisión, periódicos y otros espacios, "faciendo que sigan calteniéndose unes formes de los nomes de llugar que nun se correspuenden colos verdaderos y oficiales dende va munchos años, en dalgunos casos cuasi una década, despliquen. Ye por ello que dende Iniciativa pol Asturianu entendemos que “nun hai escusa de nengún tipu pa evitar esti usu y nun puen falar de desconocimientu pues fueron informaos va selmanes d’estos erros per parte de la nuesa organización”. Iniciativa pol Asturianu ufrió amás la so collaboración pa iguar estos erros y nin siquiera recibió respuesta de la empresa Unipublic.

Pa Iniciativa pol Asturianu llama especialmente l’atención "esta falta de sensibilidá y cumplimientu de la llegalidá toponímica cuando otros eventos deportivos estatales celebraos n’Asturies, como’l Campeonatu d’España de Duatlón celebráu en Xixón en 2010, yá usaron non solo la toponimia, sinón tamién l’asturianu con total normalidá".  Pa esta asociación ye denunciable tamién "la falta d’aición de la Direición Xeneral de Política Llingüística, de la Direición Xeneral de Deportes y del Gobiernu d’Asturies en xeneral, y los conceyos per onde pasa esta carrera, pa facer cumplir col usu de la toponimia nesti tipu d’eventos".

Fonte: Infoasturies

El Gobiernu español tendrá que responder a por qué nun usa la toponimia oficial d'Asturies

El Gobiernu d'España tendrá que responder a por qué nun usa la toponimia oficial d'Asturies.

Una propuesta Iniciativa pol Asturianu llega al Senáu pa entrugar pol usu de la toponimia oficial asturiana nes carreteres del Estáu. Sesión nel Senáu d'España.

Iniciativa pol Asturianu dio anuncio d’una Entruga al Gobiernu d’España qu se presentó nel Senáu estos díes y que se fizo gracies a la rolda de contactos con partíos políticos, senadores y diputaos del Congresu que fizo esta organización. El senador Jesús Iglesias, d’Izquierda Xunida, presentó una entruga al Gobiernu d’España na que se-yos pide esplicaciones pola falta d’usu de la toponimia tradicional aprobada n’Asturies como oficial. Una toponimia que según espliquen dende Iniciativa pol Asturianu “sigue apaeciendo en cartelos de nueva fechura con versiones yá derogaes por nun responder a les formes tradicionales”.

Estos casos vienen asocediendo en dellos puntos del país, “como yá denunció, por exemplu, l’alcalde de Siero”, comenten dende la organización. Reclámose naquel casu al Ministreriu de Formentu “pola nueva salida d’una autopista estatal que pasa pel so conceyu y que nun tenía les señalizaciones cola toponimia oficial, sinón coles formes anteriores”, recuerden.

Tamién por petición d’Iniciativa pol Asturianu, la entruga fecha al Gobiernu nel Senáu presentóse con versión n’asturianu a la cámara alta. Y ye que nesti órganu “pueden usase con cierta normalidá toles llingües oficiales del Estáu, pero nada nun se diz de les que, como l’asturianu, y de forma inxusta, nun reciben esti mesmu tratamientu nos sos estatutos d’autonomía”, espliquen y denuncien dende Iniciativa pol Asturianu.

Inicitiva pol Asturianu valoró “de forma positiva” esta Entruga al Gobiernu d’España, al mesmu tiempu que recuerda “qu’equí tamién, n’Asturies, sigue incumpliéndose la toponimia oficial en munches ocasiones per parte del Gobiernu d’Asturies y d’otres instituciones” y que ye importante “cambiar esta situación y recuperar la toponimia tradicional de forma efectiva”.

Na rolda de contactos citada, miembros d’Iniciativa pol Asturianu aconceyaron con cargos electos de Foru Asturies ya Izquierda Xunida, y anuncien que “siguen a la espera de contestación per parte de FSA-PSOE, PP y UPYD, qu’entá nun dieron respuesta nenguna”.

Reproducimos completa la Entruga al Gobiernu presentada nel Senáu n’asturianu y castellán:

La puesta en serviciu d'estremaos tramos d'autopistes y autovíes n'Asturies ta trayendo l'allugamientu de distintes señales que contienen la denomación de los llugares que percuerren.

Sicasí, estes señales y cartelos nun reflexen la toponimia oficial n'asturianu aprobada pol Gobiernu d'Asturies.

Por ello, entrúgase:

1.- Cuáles son les razones poles que na nueva señalización que nes autovíes, autopistes y carreteres dependientes de l'Alministración del Estáu ta asitiándose nun s'usa la toponimia oficial n'asturianu aprobada pol Gobiernu d'Asturies.

2.- Si'l Gobiernu piensa usar la toponimia oficial n'asturianu nes víes de comunicación embaxo la so dependencia n'Asturies.

Fonte:  Asturnews.