García Granda abre’l so discursu de toma de posesión usando l’asturianu

Decía Albert Einstein que “llocura ye facer lo mesmo una y otra vegada y esperar resultaos diferentes” camudando’l protocolu voi aniciar el mio discursu n’asturianu pa facer reconocimientu a lo más importante qu’una persona tien na vida que ye la so familia”, con estes paLlabres enLlingua asturiana entamaba so discursu’l nuevu Rector de la Universidá d’Uviéu.

L’entamu sirvía-y a Santiago García Granda pa marcar un enantes y un depués na normalización de la Llingua asturiana na Universidá, que dende l’entamar de la so campaña al Rectoráu ya vino faciendo presente l’asturianu al mesmu altor que’l castellán.

Gracies a la mio madre, a la mio muyer, al mio fíu, a los mios hermanos y a los que ya nun tais con nos, pol vuestru sofitu y afeutu que fae posible que tea yo güei equí. esa foi la so primer alcordanza y ya en castellán entamó col resto del discursu nel que nun pudo tampoco escaecese de Verdiciu, el llugar que lu vio nacer, nel Cabu Peñes, xunta la mar. Una alcordanza que xuntó a la enseñanza de les sos maestres, camudar el mundu, que Santiago García Granda quier seguir faciendo Dende la Universidá, tuvo presente a lo llargo de tol discursu.

Fonte: Asturnews

L'aragonés siéntese nes instituciones

Cuatro diputaos, l'alcalde de Zaragoza y ediles de delles poblaciones empleguen la otra llingua non oficial del Estáu.

Les Cortes d'Aragón constituyéronse esta mañana, sesión na que tuvo presencia l'aragonés. Los diputaos de Podemos Andoni Corrales, Nacho Escartín y Marta de Santos, y el de la Chunta Aragonesista José Luis Soro, prometieron los sos cargos nel idioma d'Aragón. El sábadu, na constitución de les alcaldíes del país, la llingua aragonesa tamién se pudo sentir en poblaciones como Zaragoza, Uesca, Quarte o Andorra, ente otros. Na capital, l'alcalde Pedro Santisteve, de Zaragoza en Común, finó n'aragonés el so discursu d'investidura.

Fonte: Asturies.com

L'usu del asturianu na Xunta satisfaz al asturianismu

L'emplegu que ficieron del asturianu nos actos protocolarios de toma de posesión dellos diputaos y diputaes d'Izquierda Xunida y Podemos ayeri nel plenu de la Xunta Xeneral satisfizo al asturianismu políticu y social, que quier ver nesta novedá un cambéu significativu. Dalgunes organizaciones asturianistes como la Xunta Pola Defensa de la Llingua Asturiana felicitáronse por que "la mesa d’edá con representantes de Podemos demostró'l cambéu xeneracional, funcionó y, pela primer vez, punxo a andar esta décima llexislatura usando l’asturianu. Esti fechu súmase al usu del asturianu nos actos protocolarios de toma de posesión de dellos diputaos y diputaes d'Izquierda Xunida y Podemos, y a un bon númberu de conceyales, alcaldes y alcaldeses de partíos de tolos collores políticos que yá lo fixeran el sábadu pasáu a tolo llargo de la xeografía asturiana. Na Xunta Pola nun podíen amosar más convencimientu de que les coses paecen entamar a camudar: "Naguábemos por dir dexando atrás el tiempu nel que’l movimientu de reivindicación llingüística denunciaba los atentaos que vegada tres vegada venía padeciendo la nuestra llingua nesa mesma sede". Nunes declaraciones feches esti día, la XPDLA esperen "plenos nos que vamos sentir debater na nuesa llingua sobre investidures, aprobación de presupuestos, redaición de lleis o control al gobiernu. Esperamos tamién que lo que nun va ser un conflictu pal funcionamientu de la Xunta Xeneral (nun pue selo) seya tamién normal na vida de tolos asturianos y asturianes, y que l’usu del asturianu llogre d’una vez l'estatus de llingua oficial. Nel comunicáu espardíu esti día, la XPDLA diz tamién que presta "ver na cámara que representa la voluntá del pueblu asturianu la grana semada en tantos años de reivindicación llingüística, porque bien sabemos que la Xunta Xeneral ye l’asamblea que tien que decidir pone-y fin a la situación de discriminación llingüística que sufren los y les falantes d’asturianu y que yá nun se pue sostener más tiempu. Fonte: Asturnews

L'asturianu suena más que nunca na Xunta Xeneral

por Pablo R. Guardado

Esta mañana ta celebrándose la sesión constitutiva de la Xunta Xeneral, onde l'asturianu ta teniendo más presencia que nunca. Seis diputaos de Podemos emplegaron l'idioma. Sanjurjo preside de nuevo la Cámara.

Emilio León, Daniel Ripa, Kike López, Héctor Piernavieja, Andrés Ron y Lucía Montejo son los parllamentarios de Podemos que recoyeron l'acta de diputaos usando l'asturianu. D'esta forma, el nuesu idioma, de siempres tapecíu nel Parllamentu asturianu, ta más presente que nunca.

Pedro Sanjurjo resultó escoyíu otra llexislatura más como presidente de la Xunta Xeneral tres una votación a la que tamién se presentó la popular Emma Ramos pese al alcuerdu esistente ente tolos grupos, a esceición del PP, de repartir tolos cargos de la mesa. D'esta forma, la formación lliderada por Mercedes Fernández pierde la vicepresidencia primera que-y correspondería, pasando ésta a María Josefa Miranda (IX), y tien que conformase cola vicepresidencia segunda, que va ocupar José Agustín Cuervas-Mons. Na votación pola presidencia, Sanjurjo, que ganó a Ramos en segunda ronda al nun tener mayoría absoluta na primera, cuntó col apoyu de los diputaos d'Izquierda Xunida y Ciudadanos, mentes que la popular namái algamó los de Foro.

El partíu encabezáu por Cristina Coto foi'l perxudicáu que quedó finalmente fuera de la Mesa, yá que pa la secretaría primera resultó escoyíu Ignacio Prendes (Ciudadanos) y pa la segunda, Rosa María Espiño (Podemos), que ganó na votación a Esther Landa tres empatar dambes a 14 apoyos.

Na semeya, fecha por Daniel Ripa, Piernavieja llee la constitución de la Xunta Xeneral en llingua asturiana.

Fonte: Asturies.com

Decenes de conceyales usen l'asturianu na toma de posesión

IxA informa de que conceyales de más de 20 conceyos ficieron la promesa o xuramentu n’asturianu. En Xixón hasta 7 conceyales de Xixón sí Puede, IX y Foro usaron esta fórmula

No que cinca a los conceyos de les grandes ciudaes del centru d’Asturies, hebo representantes que xuraron o prometieron n’asturianu en Xixón, Avilés y Uviéu, con conceyales del PSOE, Foro, Izquierda Xunida y les formaciones venceyaes a Podemos. Amás, xuraron cargu n’asturianu o gallego-asturiano en Villaviciosa, Carreño, Llanera, Siero, Noreña, Mieres, Llangréu, Llaviana, Ribeseya, Cangues d’Onís, Peñamellera Alta, L.lena, Uviéu, La Ribera, Sobrescobiu, Pravia, Bimenes ya Ibias.

Dende Iniciativa pol Asturianu valorase "de forma mui positiva que l’usu del asturianu fuere tresversal y qu’usaren l’asturianu, como patrimoniu que ye de toos, formaciones de tou tipu: PSOE, les candidatures de Podemos (como Xixón sí puede, Somos Llangréu, Nós Ibias, Somos Siero, etc.) Foro, Izquierda Xunida, Partíu Asturianista, IAS, Conceyu Abiertu por Noreña, asina como otres formaciones llocales".

La organización recuerda que "esti xestu, que valoramos de forma mui favorable tien d’acompañase dende’l primer día con midíes ya iniciatives empobinaes a meyorar la situación del asturianu nel ámbitu de los conceyos, onde ye necesario usar l’asturianu, recuperar y oficializar la toponimia tradicional, aprobar ordenances de normalización o poneles en marcha ellí onde yá esisten, da-yos un meyor usu y estabilidá a los servicios de normalización llingüística y facer polítiques tresversales que-y dean presencia al asturianu en tolos ámbitos de la xestión de los conceyos".

Fonte: Asturies.com